Bible Reading Plan – Day 263

₈“Hoja ke wena

nka be ke ipiletsa ho Modimo,

kapele ho Modimo

ke ipeha ka taba ya ka;

₉yena o etsa dikgolo,

mafeta-kutliwisiso-ya-motho,

o etsa dimakatso,

ntlhokapalo ke boiyane.

₁₀Lefatshe o le nesetsa pula,

pula ya ditlwebelele,

metsi a phutsalle,

a tlale dithota kahohle;

₁₁ba eisehang

a ba hlwesetse hodima ditlhoro,

ba bofifing bona a ba tshedise.

₁₂O nyopisa merero,

bo-ramasene ba e rerile,

ba be ba hloke katleho;

₁₃ka maraba a bona

o tshwasa bo-ramasene,

maqheka a bona a fetoha lefeela.

₁₄Ba aparelwa ke lefifi

tsatsi le ba tjhabetse,

ere tadi e anyesa

ba phothasele seka bosiu.

₁₅Modimo o namolela mafutsana

puong tse hlabang,

a a lopolle matsohong a ba dikgoka;

₁₆kahoo mafutsana a ruile letshepa,

molomo wa bokgopo o a kwaleha,

o didimale.”

₁₇“Ho lehlohonolo

eo Modimo a mo tshwayang phoso,

kahoo se nyatse

ha Ya Matla a o kgalema.

₁₈Modimo o a hlatha,

a be a tlame leqeba;

tsoho la hae le a otla,

le bile le a fodisa;

₁₉o tla o phemisa diwa

di o hlwele hodimo,

ka makgetlokgetlo

bobe bo ke ke ba o ama.

₂₀Nakong ya sekoboto

o tla o namolela lefung,

nakong ya dintwa

sabole a e thithibanye bohale.

₂₁O tla sireletswa puong

tsa monyefodi,

timelo o ke ke wa e tshaba

ha e fihlile;

₂₂o tla tsheha timelo le sekoboto,

batana tsa fatshe lena

o ke ke be wa di tshaba.

₂₃Majwe a ke ke a o sitisa

ho lema masimo,

batana tsa naha

di tla phela ka kgotso le wena.

₂₄O tla bona lapa la hao

le phela ka kgotso,

o fumane tsohle tsa hao

di ntse di feletse.

₂₅Bana ba hao

o tla bona ba ngatafala,

tloholo tsa hao

di ata seka jwang naheng.

₂₆O tla ya lebitleng

lemo tsa hao di ngatafetse,

jwaloka koro e yang seotlong

e se butswitse.

₂₇“Tsena di fupuditswe,

ho fela ho dutse jwalo;

di utlwe, o di tsebe,

o di fole molemo.”

₂“Ao! hoja ho komakoma ha ka

ho ka lekanngwa,

tsietsi tsa ka tsa bewa sekaleng,

₃di ne di tla feta hlabathe

la lewatle ka boima;

ke ka hona

ke ileng ka phatloha feela.

₄Metsu ya Ya Matla wohle

e ntlhabile,

mahloko a yona

a tjhatjhametsa le moya wa ka,

matshabeho a Modimo

a nteetse theko!

₅Na tonki e ka lla

kgulo le le lengata?

kapa pholo ya bohla

e ntse e fula?

₆Dijo tse bosula

di ka jewa ho se letswai?

Na mothwebe o mosweu wona

o a latsweha?

₇Dijo tse jwalo ha ke di lakatse,

di tshwana

le tse nqhuqhumisang mala!

₈“Hoja kopo ya ka

e ne ka ananelwa,

Modimo a nnea

seo ke se labalabelang;

₉Modimo a kgahlwa

ke ho mphetshela,

a nkisa letsoho, a ntimetsa.

₁₀Ke ne ke tla thaba,

ke tshedisehe,

ke tsebe ho mamella

ditlokotsi tsa ka,

hoba polelo tsa Ya Halalelang

ha ke a di hanyetsa.

₁₁“Ke sa na le matla afe,

a ho nnea letshepa?

Ke tla fella kae,

ha ke qenehetse ho phela?

₁₂Na mmele wa ka

o thata jwaloka lejwe?

Kapa nama ya ka

e entswe ka lethose?

₁₃Matla o ho ithusa a mpheletse,

sehlaha sa bohlale se setse feela.”

₁₄“Ya nyahameng pelo

eka kgona a hauhelwe, ke metswalle,

leha eba a sa tshabe Ya Matla wohle.

₁₅Bana beso ha ba tshepahale

sa melatswana,

ba ka melatswana e tlala,

e ba e feta,

₁₆e ba maduke

ke qhoqhwaane ho qhibidiha,

e patehe ke lehlwa ho kgetheha.

₁₇Ha motjheso o fihla e a nyamela,

ha tsatsi le ema a pshele ruri.

₁₈Baeti ba kgeloha tsela,

ba batla metsi,

ba ye lehwatateng,

ba be ba timele.

₁₉Baeti ba tswang Tema

ba batla metsi,

bahwebi ba Sheba

ba batla ka letshepa;

₂₀ba tsielehile,

leha ba ne ba tshepile,

ba fihlile teng, jwale ba swabile.

₂₁Ho nna, le lona le ka melatswana eo:

Le a bona ke wele ka phatla,

lona le a ntshabella!

₂₂Na nkile ka re:

‘Mpheng hona le hane’?

Kapa ‘Ntefelleng ka maruo a lona?’

₂₃Kapa: ‘Nnamoleleng

matsohong a dira tsa ka?

Mpholoseng

ho ba matla ho mpheta’?

₂₄“Nthuteng,

ke tla mamela ke didimetse,

le ntlhalosetse na phoso ya ka e kae.

₂₅Mantswe a nnete a matla hakaakang!

Polelo tsa lona ekaba di supa eng?

₂₆Ebe le rerile ho nyatsa polelo tsa ka,

le re tsa ya tsherehaneng

di ya le moya feela?

₂₇Le kgutsanyana kgudu!

le ka e rekisa,

la tjhekela motswalle wa lona lemena.

₂₈“Jwale dumelang,

le ntadime sefahlamahlo:

Taba di mahlong,

shano la ka le tla itshupa.

₂₉Ke a le kopa: Imameleng,

phoso e se be teng;

imameleng hape,

esere ho loka ha ka

ha thunthetswa.

₃₀Ebe phoso e tswile lelemeng la ka?

Na nka sitwa ho kgetha

tse molemo ho tse kgopo?”

₁“Bophelo ba motho

mona lefatsheng ke ntwa,

matsatsi a hae ekare a mohiruwa,

₂a mohlanka ya labalabelang moriti,

a mohiruwa ya lebeletseng moputso;

₃nna lefa la ka

ke kgwedi tsa ho sebeletsa lelea,

ke abetswe masiu a mokgathala.

₄Kamehla ha ke robala ke a ipotsa:

‘Ekaba neng e tla ba neng ke tsohe?’

Empa siu bo bolelele, bo a tosa,

ke hlobaela jwalo

ho fihlela mafube a hlaha.

₅Diboko le kgoho tsa mobu

di nkgometse,

tlalo la ka le dipekane,

le petla boladu.

₆Matsatsi a ka a potlaka

sa nale ya selohi,

a be a fele

tshepo yona e nkwekwetla.

₇“Modimo, hopola:

Phelo ba ka bo ka moya feela,

mahlo a ka ha a ka ke a bona

tse molemo hape.

₈Ya mponang jwale,

ha a sa tla boela a mpona,

etlare ha o mpatla

ke be ke le siyo!

₉Jwalokaha maru a fefoha, a nyamele,

ya theohelang Nqalong ya Bafu

a ke ke a nyoloha;

₁₀ha a ke ke a kgutla,

a kgutlela lapeng la hae,

tulo tsa hae di sala di le feela,

a ke ke a hlola

a dula tulong tsa hae.

₁₁Ka baka leo, nna nke ke ka kgutsa,

ke tla bua

pelo ya ka e tshwenyehile,

ke ipelaetse

pelo ya ka e ngongorehile.

₁₂“Ebe nna ke lewatle

kapa kganyapa,

ha o mpeetse balebedi ho ntisa?

₁₃Ha ke re: Phate tsa ka

ke tsona tse tla ntshedisa,

moalo wa ka

o nthethefatse ho komakoma,

₁₄wena Modimo, o ntshosa ka ditoro,

ka dipono

o mpakela ho thothomela;

₁₅kahoo ke ikgethela lefu

la ho kgangwa,

ho ena le ho phela

ke le masatswane.

₁₆Bophelo bona ba ka bo ntenne,

nke ke ka phela kamehla yohle;

ako ntese,

matsatsi a ka ke mouwane!

₁₇“Motho e ne leng,

ha o mo nketse hodimo hakaale,

o bile o mo hlokometse hakaale?

₁₈Kamehla hoseng o a mo hlahloba,

kamehla motsotso ha o fete

o sa mo leke.

₁₉O tla kgaotsa neng ho ntjamela,

o ko mphe tshweya,

ke metse mathe?

₂₀Haeba ke sitilwe,

ke o sinyeditseng?

Wena Molebedi wa batho?

Ke ka dife

o nkentseng pakane ya hao,

hoo le nna

ke seng ke bile ke itenne?

₂₁Ke hobaneng

ha o sa tshwarele tshito ya ka,

wa tlosa bokgopo ba ka ba fela?

Haufinyane ke tla robala lebitleng;

o tla mpatla, empa ke tla ba siyo.”

₂“O tla bua ntho tsee

ho fihlela neng?

Polelo tsa hao

di ka moya wa sefefo!

₃Na Modimo

a ka sokamisa kahlolo,

Ya Matla wohle

a sokamisa ho loka?

₄Haeba bara ba hao ba mo sitetswe,

o ba otlile

ho ya ka ho sitwa ha bona.

₅Haeba o ka fela wa batla Modimo,

wa ithapella ho Ya Matla wohle;

₆haeba o hlwekile, mme o lokile,

ruri le yena o tla o hlokomela,

lapa la hao a le tsose

e le sesupo sa ho loka ha hao.

₇Maruo a pele e ne le dinyane,

a morao wona e tla ba boiyane.”

₈“Ako fuputse ho meloko ya pele,

o batlisise ditsebo tsa bo-ntata yona.

₉Rona ba maobane re hloka tsebo;

matsatsi a rona ho lena lefatshe

a ka moriti ha o falola.

₁₀Ba tla o jwetsa, ba o rupele,

ba o kgokgothele bohlale ba bona.

₁₁“Na lodi le ka mela

ho se na mokgwabo,

lehlaka la ata

ho se na mohlaka?

₁₂Ha le sa helwe le sa le letalana,

le pona pele jwang bo omella.

₁₃Tsela tsa bohle

ba lebalang Modimo di jwalo,

letshepa la ya kgopo

le fela jwalo;

₁₄tshepo ya hae e a thekesela,

letshepa la hae

le ka bolepo ba sekgo;

₁₅o itshetleha ka bona,

bo hana ho tsitsa,

o itshwarella ka bona,

ha bo tshwarehe.

₁₆O ka fate se tlokomang

ha tsatsi le tjhabile,

seo makala a sona

a thathallang le tshimo yohle.

₁₇Metso ya sona

e rarahana hara qubu ya majwe,

e itshwarella hodima matlapa.

₁₈Ha se fotholwa bakeng seo,

baka seo se tla latola, se re:

‘Nna ha ke o tsebe!’

₁₉Bophelo ba sona bo fela jwalo,

mela tse ding

di mela hape mobung oo.

₂₀“Modimo a ke ke a lahla

ya se nang molato,

kapa a thusa ba etsang bokgopo;

₂₁o tla boela a etsa hore o tshehe,

molomo wa hao o howe ka thabo.

₂₂Ba o hloileng

ba tla apeswa dihlong,

malapa a ba kgopo

a nyamelle ruri.”

₂“Ruri ke a tseba,

ho fela ho le jwalo;

motho a ka loka jwang

mahlong a Modimo?

₃Haeba motho

a ka phea kgang le Modimo,

Modimo a ka mmotsa potso

di le sekete,

motho a pallwa ke ho araba

leha e le nngwe.

₄Modimo o bohlale, o bile o matla:

Ke mang ya ka mo hanyetsang,

yaba o a atleha?

₅Hanghang o suthisa dithaba,

ha a halefile a di phethole.

₆O sisinya lefatshe madulong a lona,

ditshiya tsa lona di be di reketle.

₇O laela letsatsi, le se ke le tjhaba,

a ba fifatse kganya ya dinaledi.

₈Ke yena ya sarolotseng mahodimo,

a a sarolla a le mong,

a tsamaya le hodima maqhubu,

maqhubu a Lewatle;

₉a etsa Bere e Kgolo,

le Makolobe, le Selemela,

a etsa le molala

ka borwa ho lehodimo.

₁₀O etsa dikgolo

tse fetang tlhalohanyo ya motho,

o etsa dimakatso

tse ke keng tsa balwa.

₁₁“Ha a feta pela ka

ha nke be ke mmone,

ha a itsamaela

le teng ha ke lemohe.

₁₂Ha a inkela,

a ka thibelwa ke mang?

Ke mang ya ka reng ho yena:

‘Jwale o etsa jwang?’

₁₃Modimo ha a halefile

eba o halefile,

mahlahana a Rahaba

a tjapaletse maotong a hae.

₁₄“Jwale nna

ekaba nka mo arabisa jwang?

Mantswe a dikgang

ke a kgethe jwang?

₁₅Leha ke se na molato

ke ne nke ke ka mo araba,

haese feela ho kopa mohau

ho Moahlodi wa ka.

₁₆Leha nka mo isa kgotla,

yaba o a tla,

ha ke dumele

a ka ntshekehela tsebe.

₁₇A ka mpidila ka sefefo sa kganyapa,

a nkekeletsa maqeba ho se lebaka.

₁₈A ke ke a ntumella

ka phefumoloha,

a ka ntshithabetsa

ka tse bohloko.

₁₉Haeba ho uwa ka matla,

Yena ke seqhobane!

Haeba ho uwa ka toka,

yena o tla qoswa ke mang?

₂₀Leha eba ke se molato,

ke tsuwa ke molomo wa ka,

leha eba ke se na kodi,

wona o tla nthwesa molato.

₂₁“Le hoja ke se na kodi,

ke se ke itenne;

ke nyedisa bophelo ba ka,

ke a bo nyatsa.

₂₂Ke ditshwantshwang feela;

ke ka hona ke reng:

‘O timetsa ba lokileng le ba kgopo.’

₂₃Ha kotlo e bolaya ka ho tsometsa,

O tla tsheha

ha ba otlwa ba se molato.

₂₄Lefatshe le matsohong a ba kgopo,

o kwahela baahlodi ba lona

ka lesira mahlong;

haeba e se yena,

ebe jwale ke mang?