Bible Reading Plan – Day 264

₂₅“Tshiu tsa ka di lebelo

ho feta semathi,

di baleha di eso bone molemo;

₂₆di fefoha jwaloka sekepe sa lehlaka,

jwaloka ntsu

ha e ubella phofu ya yona.

₂₇Ha nka re:

‘Ke tla lebala pelaelo tsa ka,’

fahleho sa ka se tla ela,

ke bobothehe.

₂₈Tlokotsi tsa ka tsohle

ke a di tshaba,

ke a tseba

o ke ke wa re ha ke molato.

₂₉Kaha ke fumanwe ke le molato,

ke hobaneng ha ke sebeletsa lelea?

₃₀Leha eba nka itlhatswa ka lehlwa,

ka sesepa matsoho a ka ka a hatlela,

₃₁wena o tla nkakgela ka tebetebeng,

aparo tsa ka le tsona

di be di nnyonye!

₃₂“Modimo hase motho jwaloka nna,

ka hona nke ke ka ba ka mo araba,

fahleho bobedi tsa thulana

re le ka kgotla.

₃₃Hoja pakeng tsa rona

mmoelanyi o teng,

a sebedisa matla a hae hodima rona;

₃₄thupa Modimo e ke e shape fatshe,

kgalefo ya hae e se ke ya ntshosa;

₃₅ke bue ka bolokolohi

ke se ne tshabo,

athe hona jwale

nna ke tletswe ke tshabo.”

₁“Bophelo bona ba ka bo ntenne,

kahoo ke tla boledisa

tsa ka dipelaelo,

ke bue moya wa ka o tubehile.

₂Ke tla re ho Modimo:

‘Se ke be wa nkahlola;

mpolelle tseo o nqosang ka tsona.

₃O bona ho le molemo

ho nna o nkataka,

o nyedisa mmopo wa matsoho a hao,

o thabela merero ya ba kgopo?

₄Na o na le mahlo a nama?

Na o bona jwalokaha batho ba bona?

₅Na tshiu tsa hao

di tshwana le tshiu tsa batho?

Na ngwaha tsa hao

di tshwana le ngwaha tsa batho?

₆Ha e le moo o tswile bosele

ho tsoma bokgopo ba ka,

o batla, o batlisisa le sebe sa ka?

₇Wena o a tseba

ho nna bokgopo ha bo yo,

mme ha ho ya ka ntopollang

matsohong a hao.

₈“ ‘Kahohlehohle ke bopilwe

ke matsoho a hao,

empa jwale

ke se ke timetswa ke wena!

₉Ako hopole,

o mpopile seka letsopa;

na o tla nkgutlisetsa leroleng hape?

₁₀Na ha o a nqhatsa

jwalokaha ho qhatswa lebese,

wa mphehla

jwalokaha leokwana le fehlwa?

₁₁Wa nkapesa

ka letlalo le ka dinama,

wa ntlamahanya

ka masapo le ka mesifa?

₁₂O nneile bophelo,

wa ba wa nnea lerato,

wa mpoloka,

wa baballa le moya wa ka.

₁₃“ ‘Tsena e ne le kunutu

la pelo ya hao,

ke a tseba,

tsena e ne le morero wa hao:

₁₄Ha ke etsa sebe

o ntadima ka le ntjhotjho,

o ke ke wa ntokolla molatong wa ka.

₁₅Haeba ke molato

bomadimabe ke ba ka!

Leha ke se molato

nke ke ka tadima motho,

ke hlajwa ke dihlong

ke lweba ka hara tlokotsi.

₁₆Ha hlooho ya ka e phahama

o tla ntsoma jwaloka tau,

o ntlhokofatsa

ka ho nketsetsa dimakatso.

₁₇O tlisa paki tse ntjha

ho nnyopisetsa bopaki,

le kgalefo ya hao

e ntlokomela ho feta,

mara a hao

a mphutuhela ka mekgahlelo.

₁₈“ ‘Ke hobaneng o entseng

hore ke tswalwe?

Eka nkabe ke shwele

ke eso bonwe ke motho!

₁₉Eka nkabe ke sa ka ka ba ka tswalwa,

kapa ka iswa lebitleng

ha ke qeta ho tswalwa!

₂₀Tshiu tsa ka di kgutshwanyane,

di a feta;

ako ntlohele,

ke re kgefu! ho se hokae,

₂₁ke eso ikele kwana bo-ya-batho,

fatsheng le lefifi,

le meriti e metsho;

₂₂fatsheng le lefifi la bo-nka-ntjana,

moo e leng lapeng habo morusu,

moo sedi la teng e leng lefifi!’ ”

₂“Puo tse ngatangata tsee

ha di lokele ho arajwa?

Ebe motho wa lehehle

yena o nepa kamehla?

₃O re batho ba kgutsiswe

ke ho berabera ha hao?

Ere o soma,

o se kgalemelwe ke motho?

₄O re ho Modimo:

‘Thuto ya ka e hloka kodi,

le mahlong a hao ke hlwekile!’

₅Eka Modimo

a ka be a dumela ho bua,

a ahlamisa molomo,

a ka a bua le wena;

₆a o senolela phiri tsa bohlale ba hae,

hore bohlale ba sebele

bo mehlahlwe-mengata.

Tseba Modimo o a o leballa,

o o leballa tse ding

tsa tshito tsa hao!

₇“Na o ka tseba phiri sa Modimo

ka ho fuputsa?

Kapa wa fihlela bohlale

ba Ya Matla wohle?

₈O ka etsang?

Bo phahametse le mahodimo!

O ka tsebang?

Bo tebile ho feta lebitla!

₉Bolelele ba bona

bo feta le ba lefatshe,

bophara ba bona

bo feta le ba lewatle!

₁₀“Ha a ka o tshwara,

a o isa tjhankaneng,

a o qosa ka kgotla,

a ka hanyetswa ke mang?

₁₁Bolotsana ba batho

o bo tseba hantle;

ha a bona bokgopo,

na a ka kgutsa feela?

₁₂Empa sethoto se ke ke be sa hlalefa,

jwalokaha petsana tonki,

e ke ke ya ba ya tswalwa e le motho.

₁₃“Empa ha o boela

o mo nea pelo ya hao,

o otlollela matsoho a hao ho yena;

₁₄haeba o lahla sebe

seo o se kwetlileng,

o sa dumelle bobe

ho phela tlung ya hao;

₁₅ruri o tla tseba

ho tadima motho o se na dihlong,

o tsitse hantle, o hloke tshabo.

₁₆Tsietsi tsa hao

o tla di lebala tsohle,

o di hopole jwaloka metsi

ha a sa fetile.

₁₇Bophelo ba hao

bo tla hlaka ho feta motsheare,

fifi la bona

le tshwane le tsatsi le tjhaba.

₁₈O tla ba sebete,

hobane tshepo e teng;

o qamake kahohle,

o robale o iketlile.

₁₉O tla ithoballa

ho se ya ka o tshosang,

ba bangata

ba qekise setswalle sa hao.

₂₀Empa mahlo a ba kgopo a tla eba,

ba hloke le wona monyetla

wa ho pholoha,

tshepo ya bona

e be ya ho neela moya.”

₂“Ha ho pelaelo,

batho ke lona feela!

Bohlale bo tla ya le lona lebitleng.

₃Le nna ke na le kelello jwaloka lona,

etswe le hona ha le mphete ka letho;

ke mang ya sa tsebeng

dintho tsee tsohle?

₄Kajeno ke fetohile sesomo

ho metswalle,

ke fetohile sesomo ke lokile,

ke se na kodi,

nna ya neng a ipiletsa ho Modimo,

a nkarabe.

₅Ba iketlileng

ba nyedisa bomadimabe,

ba re ke pheletso

ya ba kgatheng la ho thella.

₆Malapeng a batupi

teng ho rena kgotso,

ba phephetsang Modimo

ba phela ka boiketlo,

bao matla a bona

e leng wona modimo wa bona.

₇“Ako botse diphoofolo,

tsona di tla o ruta,

nonyana tsa lehodimo

le tsona di o kaele;

₈o bue le lefatshe le tle le o rupele,

le tlhapi tsa lewatle di ke di o qoqele.

₉Ke efe ho tsona tsohle

e hlokang tsebo

ya hore Morena o entse tsohle

ka letsoho la hae?

₁₀Bophelo ba sebopuwa ka seng

bo matsohong a hae

le meya ya batho bohle

e phela ka yena.

₁₁Ha ke re tsebe

e mamela ho kgetha mantswe,

jwalokaha leleme

le kgetha dijo ka ho di latswa?

₁₂Bohlale ba sebele

bo hahetse ho bo-raputswe,

ho phela halelele

ho fana ka kutlwisiso.

₁₃“Empa bohlale le matla

tsona ke tsa Modimo,

ke yena monga kelello

le kutlwisiso;

₁₄moo a heleditseng

ho ke ke ha tsoswa marako,

eo a mo kentseng tjhankaneng

a ke ke a lopollwa.

₁₅Ha a thibela pula,

metsi a pshela ruri,

ha a nesa ya ditlwebelele,

fatshe lohle le a senyeha.

₁₆Matla le bohlale ba sebele

ke tsa hae;

mothetsi le mothetsuwa

ba matleng a hae.

₁₇Baeletsi o ba tlosa

ba se na le nketlana,

baahlodi bona

a ba fetole ditsheretshere!

₁₈O lokolla mahlaahlela

a dikgosi a bohatelli,

mathekeng a tsona

a kgaole maqhama a puso;

₁₉baprista o ba tlosa

ba se na le nketlana,

dinatla tsona a di theole

tulong tsa tsona;

₂₀baeletsi ba mmakgonthe

a ba fetole dimumu,

maqheku wona a a amohe meelelo.

₂₁O soma mahosana, a a teole,

a kokobetse boikalatiso

ba mahosana;

₂₂a senole le diphiri tsa mafifing,

meriti e metsho

a e tjhabisetse lesedi.

₂₃O hodisa ditjhaba

a be a di timetse,

a di anafatse, a be a di hasanye;

₂₄babusi ba ditjhaba

a ba amohe meelelo,

a ba lelerise mahwatateng

ho se na tsela,

₂₅ba phopholetse lefifing

ho se lesedi,

a ba thekesedise

sa mahlena a bo habotse.”

₁“Tsena tsohle ke di bone

ka mahlo a ka,

ka tsebe tsa ka ka di utlwa,

ka di utlwisisa.

₂Ke tseba tsena

jwalokaha le lona le di tseba,

etswe le hona ha le mphete ka letho!

₃Ke lakatsa ho bua le Ya Matla wohle,

ho ipiletsa ho Modimo

ke ho tjhesehela haholo.

₄Lona le baqapi ba mashano

a se na ditswako,

kaofela ha lona

le bo-ngakana-kea-hetla.

₅Eka le ka kgutsa ho bua,

la kgutsetsa ruri!

Hoo e ne tla be e le bohlale,

e le bohlale ho lona!

₆Jwale mamelang ha ke ikarabella,

le utlwe ha ke ipuella

ka molomo wa ka.

₇Na le buella Modimo

ka ho bua bokgopo?

Na le ka mmuella

ka ho bua mashano?

₈Ebe le leka ho sekamela

ka ho Modimo,

kapa le iketsa babuelli

ba hae nyeweng?

₉Ha a le hoqisa ka dipotso

ho tla ba jwang?

Le tla mo soma

jwalokaha le soma motho?

₁₀Ruri o tla fela a le kgaleme,

ha le sebetsa leeme ka lekunutu.

₁₁Na tlotla ya hae

ha e tlo le kenya letswalo,

kgalefo ya hae

e tsubellele hodima lona?

₁₂Maele a lona

a tshwana le molora hantle,

boitshireletso ba lona

bo tshwana le ba letsopa.

₁₃“Kgutsang, le nna ke tsebe ho bua,

se ntlhahelang

se mpe se ntlhahlele.

₁₄Ke kena kotsing ke ntse ke tadimile,

bophelo ba ka

ke bapala diketo ka bona!

₁₅Haeba a mpolaya

ke tla nne ke mo tshepe,

ke tla buella metsamao ya ka

thaka di tadimane.

₁₆Hona e tla ba yona pholoho ya ka:

Moetsadibe a ke ke a ema

kapele ho yena.

₁₇Mamelang mantswe ana a ka,

le a mamele ka hloko,

polelo tsena tsa ka

le di sekehele tsebe.

₁₈Bonang jwale,

nyewe ya ka ke e radile,

ke a tseba

ke tla fumanwa ke se molato.

₁₉Ke mang ya ka tsekisanang le nna?

Ha a le teng ke tla kgutsa,

ke itjhwelle.

₂₀“Oho, Modimo,

ako ntumelle ka ntho di le pedi,

mme nke ke be ka ipatela wena:

₂₁Ako tlosetse tsoho la hao

hole le nna,

kgalefo ya hao

e se ke ya ntshosa;

₂₂nkise kgotla ke tle ke o arabe,

o ntumelle ke bue,

le wena o nkarabe.

₂₃Ke entse makgopo

le dibe di le kae?

Ako ntsebise tshito tsa ka

le sebe sa ka.

₂₄Ke hobaneng

ha o mpatela fahleho sa hao,

o ntadima ke se ke le sera sa hao?

₂₅O tla lelekisana le lehlaku,

lehlaku le feferetseha le moya,

o lelekisane le mmoko o omeletse?

₂₆O nqosa ka tse bohloko,

o nkotlela makgopo a botjha ba ka.

₂₇Maoto a ka

a tlamilwe ka mahlaahlela,

tselana tsa ka tsohle

o a di lekola,

bohato ba maoto a ka

o a bo thaleha.

₂₈“Kahoo motho o motela

sa ntho e bodile,

o naphoha sa kobo

e jelwe ke tshwele.”