Bible Reading Plan – Day 265

₁“Motho ya tswetsweng ke mosadi

o phela hakgutshwanyane,

bophelo ba hae

bo aparetswe ke ditsietsi;

₂o fupuha jwaloka palesa

a be a pone,

o baleha jwaloka seriti,

ebe o nyametse.

₃Jwale o tjamela ya jwalo ka eo?

O ntlisa kapele ho wena

ho nkahlola?

₄Na ya ditshila

a ka tswala ya hlwekileng?

Le kgale!

Ho ke ke be ha etsahala jwalo!

₅Tshiu tsa motho di badilwe,

palo ya kgwedi tsa hae

e tsejwa ke wena,

o mo sehetse moedi,

a ke ke be a o tlola.

₆Tlohela ho mo tjamela,

a fumane phomolo,

nako ya hae e be fete

jwaloka ya mohiruwa.

₇“Esita le sefate se na le tshepo:

Ha se ka rengwa se tla hlomela hape,

makala a sona a ke ke a ba a fela.

₈Leha motso wa sona

o ka tsofalla mobung,

kutu ya sona ya bolla leroleng,

₉ha se utlwa monko wa metsi

se tla hloma,

se mele makala

jwaloka tlama se setjha.

₁₀Empa motho yena o a shwa,

a fellwe ke matla,

a neele moya, ebe jwale o kae?

₁₁“Jwalokaha metsi a letsha

a nyamela, a fela,

noka e feta, e be e pshe,

₁₂le motho o a robala,

a roballe ruri!

Ho fihlela ha mahodimo a fela,

batho ba ke ke be ba tseba

le ho phaphama,

kapa ho tsoswa

phumeng sa bona sa boroko.

₁₃“Eka o ka be o mpata

Nqalong ya Bafu,

o nketsa bofihla,

kgalefo ya hao e be e fete!

Eka o ka be o mpalla nako,

eo ka yona o tlang ho nkgopola!

₁₄Hoja motho o a shwe,

a boele a phele,

ke ne nka mamella tlokotsi tsa ka

ka nako tsohle,

ka emela topoloho ya ka

ya ba ya fihla.

₁₅O no tla mpitsa, nna ke arabele,

o hlolohelwe mmopo

wa matsoho a hao.

₁₆Empa jwale mehato ya ka o a e bala,

sebe sa ka ha o kgaotse ho se natsa;

₁₇tshita tsa ka

o di bitiella ka mokotleng,

sebe sa ka

sona o a se kwahela.

₁₈“Jwalokaha thaba e ye e helehe,

e nyamele,

le lefika le suthiswe

tulong tsa lona;

₁₉jwalokaha metsi a kutlula majwe,

phororo le tsona

di baka kgoholedi mobung,

le wena tshepo ya motho

o e fedisa jwalo!

₂₀O mo hlolela ruri, ebe o iketse;

o fetola fahleho sa hae,

ebe o a mo leleka.

₂₁Ha bara ba hae ba tlotlwa,

yena ha a tsebe le letho,

le teng ha ba kokobetswa,

yena ha a bone le letho;

₂₂o utlwa bohloko

ba mmele wa hae feela,

le ho ngongoreha ha moya wa hae.”

₂“Na mohlalefi

a ka bebera manenekwane,

a pipitlelwa ke moya

wa ho phorohla?

₃A phea kgang

ka ho bua mafeelafeelane,

kapa ka puo tsa sa thuseng letho?

₄Ho tshaba Modimo

o ho phephethetse hole le wena,

ho rapela Modimo

hona o a ho fedisa.

₅Puo tsa hao

di susumetswa ke bokgopo ba hao,

boqhweleqhwele

bo ntlheng ya leleme la hao.

₆Ha o tsuwe ke nna,

o tsuwa ke dipuo tsa hao,

molomo wa hao

ke wona pakimotshwaedi.

₇“Ebe ke wena

motswalwapele wa motho?

kapa o bopilwe pele ho maralla?

₈Na merero ya phiri tsa Modimo

o a e tseba?

Na bohlale bona

ebe ke ba hao o le inotshi?

₉O tseba dife

tseo re se nang tsebo ya tsona?

O utlwisisa dife

tseo re se nang kutlwisiso ya tsona?

₁₀Bo-raputswe le maqheku

ba ka hlakoreng la rona,

bannabaholo ba boneng letsatsi

pele ho ntatao.

₁₁“Na matshediso a Modimo

o a a halala,

le mantswe a buuwang ka bonolo

tsebeng tsa hao?

₁₂O dumellang ho rwalwa

ke pelo ya hao?

Mahlo a hao wona

a tukelang malakabe,

₁₃hoo o hlatsetsang

kgalefo ya hao ho Modimo,

o buang puo tse tjee,

ka molomo wa hao?

₁₄“Motho ke ntho nngwe,

hoo a ka bang le tlhweko?

Ya tswetsweng ke mosadi

yena a ka loka jwang?

₁₅Haesita Modimo

a sa tshepe mangeloi a hae,

mahlong a hae

le mahodimo a sa hlweka,

₁₆a ka tshepa motho jwang,

a le manyala, a tletse podile,

a momorotsa bokgopo

sa metsi a mophoko?”

₁₇“Thea tsebe, o mamele,

ke o manollele,

ke o bolelle tseo ke di boneng

ka mahlo a ka;

₁₈tse boletsweng

ke banna ba bahlalefi,

ba di bolela ba sa pate letho,

ba bolela tseo ba di utlwileng,

ho baholoholo ba bona;

₁₉bona bao naha e neng

e abelwe bona feela,

ho se molata o jakileng hara bona.

₂₀“Ya kgopo

o kgwebethwa ke letswalo,

le mo kgwebetha

ka tshiu tsohle tsa hae,

mohatelli le yena

le a mo kgwebetha,

le mo kgwebethe

ka lemo tsohle tsa bophelo ba hae.

₂₁Tsebe tsa hae di tlala

medumo e tshosang,

haeka tsohle di ya hantle

batupi ba mo hlasele.

₂₂O lahlehetswe ke tshepo

ya ho tswa kahara lefifi,

kaekae sabole le yona e mo laletse.

₂₃O lelera le naha, a batla dijo,

a ntse a botsa hore na di kae;

o a tseba, tsatsi la timelo ya hae

le atametse;

₂₄matshwenyeho le mahloko

a mo kenya letswalo,

a mo pupetsa

sa kgosi e kgatheng la ho futuha,

₂₅hoba o kokoseditse Modimo letsoho,

o iketsa senatla ho Ya Matla wohle.

₂₆O mo kgorohela

a sataladitse molala,

thebe e shahlileng

a e utlile ka mallela.

₂₇“Le hoja a le fahleho se matlebele,

theka la hae le le maphethephethe,

₂₈o tla phela metseng e le dithako,

matlung a seng a setse a le feela,

a kgatheng la ho fetoha masupi.

₂₉Ha a ka ke a hlola a ba a rua,

matlotlo a hae wohle a tla timela,

fatshe le ke ke la anelwa

ke maruo a hae.

₃₀A ke ke be a phonyoha lefifing,

lakabe le tla tjhesa mahlaku a hae,

kgalefo ya Modimo e mo timetse!

₃₁A se ithetse ka ho tshepa mafeela,

hobane mafeela

e tla ba wona moputso wa hae.

₃₂Pele a eshwa hoo ho tla etsahala,

makala a hae a ke ke be a tlokoma.

₃₃O tla tshwana le morara,

o hlohlorang tholwana di sa le tala,

jwaloka mohlwaare o hlohlorang,

o hlohlorang thunthung tsa wona.

₃₄“Ba kgopo

ba ke ke ba ba le ditloholo,

mollo o tla tjhesa matlo

a ba phelang ka tjotjo.

₃₅Ba emola tlokotsi,

ba tswale bokgopo,

thetso ke yona

ngwana popelo ya bona.”

₂“Tse kang tsena

ke di utlwile hangata;

lona bohle le batshedisi

ba tenang motho!

₃Na o sa tla kgaotsa

ho shwahla mafeela?

Sesosa sa nganga ya hao ke sefe?

₄Hoja boemo ba ka e ne le ba lona,

ke ne nka nna ka bua jwaloka lona,

ka puo tse ngata ka le tlameletsa,

ka ba ka thukuthela

hlooho ya ka ho lona.

₅Empa polelo tsa ka

di ne di tla le kgothatsa,

ho bebenya melomo ha ka

ho le bebolele tlokotsi.

₆“Leha nka bua,

bohloko ba ka ha bo kokobele;

leha ke kgutsitse,

bona ha bo ntlohele.

₇Oho, Modimo, o fela o ntshotlile,

lapa la ka lohle

le timeditswe ke wena;

₈o ile wa ntlhasinya,

mme o sera sa ka;

bokojwane ba ka

ke paki e nqosang ke e shebile.

₉Ya ntlhoileng,

ka kgalefo o a ntlepolaka,

o ntsikitlanyetsa meno a hae;

sera sa ka se ntjheba

ka mahlo a ntjhotjho!

₁₀Batho ha ba kopetse melomo

ha ba ntshoma,

ba ntjabela lerameng

ba bile ba nnyefola,

ba entse setha-se-wele hodima ka.

₁₁Modimo o nneeletse ka balotsana,

o ntahletse matsohong

a batho ba kgopo.

₁₂Ke ne ke iketlile,

ke mona o ntshuhlamantse,

a mphamola ka molalana,

yaba o a mpidila,

a ntlhoma ho ba sekgopi

sa metsu ya hae.

₁₃Metsu ya hae e nketseditse lethala,

o harola dikahare tsa ka

a se na mohau,

nyooko ya ka yona

o e qhalanyetsa fatshe.

₁₄O ntlhaba a sa tswa ntlhaba,

o nkgorohela jwaloka seqhobane.

₁₅“Mmeleng wa ka

ke apere tse mahwashe,

ka phatla ya ka

leroleng ka sunyama;

₁₆mahlo a ka a fubetse ke menyepetsi,

botsho bo entse sedika-mahlwana

ntshing tsa ka;

₁₇leha matsoho a ka

a sa fuparela bokgopo,

le thapelo ya ka ho Modimo

e hlwekile.”

₁₈“Oho, wena lefatshe,

madi a ka o se ke wa a monya,

boipiletso ba ka

bo se ke ba kgaotsa!

₁₉Le jwale paki ya ka

e lehodimong,

mmuelli wa ka

le yena o hodimodimo.

₂₀Ha e le metswalle ya ka

e a ntshoma,

keledi tsa ka

di keleketlela ho Modimo.

₂₁Ke mang

ya ka mpuellang ho Modimo

jwalokaha ho buellwa motho

ho motswalle?

₂₂“Ho tla feta lemo

di le mmalwana,

ebe nna ke nka tsela

e yang bo-ya-batho.”

₁“Moya wa ka o tetebetse,

matsatsi a ka a kgutsufetse,

bitla le lona le nkemetse.

₂Basomi ba mpotapotile,

mahlo a ka a tadimile bora ba bona.

₃“Nkgolwe, Modimo, ke bua nnete,

ha ho na e mong ya ka mpakelang;

₄kelello tsa bona o di thithibantse,

kahoo o se ka ba ba thusa,

ba hlola.

₅Ya ekang motswalle

ho fumana moputso,

bana ba hae ba tla lebella

mahlo a ba kgathale.

₆“Ho bohle

ke se ke fetohile sesomo,

fahleho sa ka ba se tshwela ka

mathe;

₇mahlo a ka a fifaditswe ke maswabi,

ditho tsa ka tsohle e se e ka seriti.

₈Hona batho ba lokileng

ba ho makaletse,

ba se nang molato

ba nyatsa ba kgopo;

₉ya lokileng

o tla tiisetsa tseleng ya hae,

ya matsoho a hlwekileng

a nne a matlafale.”

₁₀“Lona bohle boelang le leke hape!

Feela hara lona

ha ke bone mohlalefi.

₁₁Matsatsi a ka a fetile,

merero ya ka e nyopile;

takatso tsa pelo ya ka

le tsona di nyopile.

₁₂Bosiu ba bo fetola motsheare,

ha ho le lefifi ba re:

‘Sedi le haufi!’

₁₃Haeba hae la ka ke Nqalo ya Bafu,

eba phate tsa ka ke di ala lefifing;

₁₄haeba ke re ho lebitla:

‘Ke wena ntate,’

ho seboko ke re:

‘O mme, o kgaitsedi,’

₁₅ebe jwale tshepo ya ka e tla ba kae?

ebe ke mang ya tla e bona?

₁₆E tla theohela le nna lebitleng,

e theohele le nna leroleng.”