40 DAYS – Time with God – Day 32

₆“Mokgwa wa ho itima dijo

oo ke o kgethileng ke ona:

Ke hore o lokolle

mahlaahlela a bokgopo,

o imolle ba imetsweng

ke mejaro ya bona,

ba hateletsweng o ba lokolle,

mesebetsi yohle ya botlatlapi

o e fedise.

₇Ke hore o abelane dijo

le ba lapileng,

o amohele baleleri lapeng la hao,

ba hlobotseng o ba fe diaparo,

bang ka wena o ba thuse.

₈“Jwale sedi la hao le tla hlaha,

le hlahe jwaloka mafube a meso,

ho fola ha hao le hona ho akofe,

ho loka ha hao ho tla o etella pele,

tlotla ya Morena

e sireletse serao sa hao.

₉Etlare ha o ipiletsa,

Morena a o arabe,

ere ha o kopa thuso,

yena a re: ‘Ke nna enwa.’

“Haeba o fedisa

diketso tsa botlatlapi,

tsa ho supana ka menwana

le ho buisana hampe;

₁₀ha o ka ikitlaeletsa

ho fepa ba lapileng,

wa thoba meya

ya ba tshwenyehileng,

fifi le tla apoha,

sedi la hao le kganye,

bosiu ba hao

bo ke motsheare wa lengeta.

₁₁Morena o tla o tataisa kamehla,

a o fe tseo o di hlokang

leha naha e omeletse,

a matlafatse ditho tsa mmele wa hao.

O tla tshwana le serapa

se nwesetswang hantle,

o ke sediba

seo mohlodi wa sona o sa psheng.

₁₂Bara ba hao ba tla tsosa

thako tsa hao tsa kgale,

o hahe hodima metheo

ya baholoholo ba hao.

Wena o tla bitswa Motsosi

wa marako a helehileng,

o bitswe Molokisi

wa ditsela le matlo.”