Comfort from the Word – Day 41

₂Modimo, ako utlwe sello sa ka,

ako mamele thapelo ya ka.

₃Ke ipiletsa ho wena

ke le pheletsong tsa lefatshe,

pelo ya ka e saretswe.

O ntlhwesetse lefikeng

leo ke sitwang ho le hlwa,

₄hobane o setshabelo sa ka,

qhobosheane e matla

mahlong a dira tsa ka.

₅A nke ke dule

ka Tempeleng ya hao kamehla,

ke tle ke tshabele

tlasa mapheo a hao.

₂Ako mpholose Modimo,

hobane metsi a a nkgama.

₃Ke qahilwe tebetebeng ya seretse,

ha ho moo nka hatang teng,

ka hata ka tsitsa.

Ke fihlile kweetseng,

maqhubu a nkwahetse.

₄Ke kgathetse ke ho meketsa,

ke se ke tjhele lentswe;

mahlo a ka a se a fifetse

ke ho nna ke lebella Modimo.

₅Ba ntlhoileng ntle ho lebaka

ba bangata,

ba feta qoba tsa moriri wa ka;

dira tsa mahelehele

di mpheta ka matla,

di ntsekisa seo ke sa se utswang.

₆Wena Modimo,

o tseba bothoto ba ka,

diphoso tsa ka

ha di a pateha ho wena.

₇Ba o tshepileng

ba se hlajwe ke dihlong,

ka baka la ka,

Morena, Morena wa mabotho;

ba o batlang

ba se ke ba ferekana,

ka baka la ka,

Modimo wa Iseraele.

₈Ke ka baka la hao

ke jereng sekgobo,

fahleho sa ka

se aparetsweng ke dihlong.

₉Ke fetohile moditjhaba

ho bana beso,

ke se ke le ya sa tsejweng ke baeso.

₁₀Ho tjhesehella ntlo ya hao ho ntjele,

dinyefolo tsa ba o nyefolang

le nna di nkwetse hodimo.

₁₁Ha ke itlhokofatsa ka ho itima dijo,

hona e ba hoo ke ho nyefolelwang.

₁₂Ha ke apara tse mahwashe,

eba ke fetoha pale ho bona.

₁₃Ba dulang kgorong tsa motse

ba bua ka nna,

matahwa a qapile dipina ka nna.

₁₄Ke lebisa thapelo ya ka

ho wena Morena,

ka nako e o kgahlang, Modimo.

Ako nkarabe

ka mohau wa hao o moholo,

le ka botshepehi ba hao

bo pholosang.

₁₅Nqaholle tebetebeng ya seretse,

o nnamolele ho ba ntlhoileng,

ke phonyohe kweetseng.

₁₆Ke se ke ka nkwa

ke morallo wa metsi,

ka metswa ke bodiba,

ka kometswa ke lebitla.

₁₇Nkarabe, Morena,

hobane mohau wa hao o moholo,

o ntadime ho ya ka boholo,

boholo ba lerato la hao.

₁₈O se ke wa pata sefahleho sa hao,

wa se patela mohlanka wa hao,

o nkarabe kapele,

hobane ke matshwenyehong.

₁₉Atamela ho nna, o mpholose,

o ntopolle ka baka la dira tsa ka.

₂₀Wena o tseba sekgobo sa ka,

le dihlong tsa ka,

le ho tlontlollwa ha ka;

ba ntwantshang o ba tseba kaofela.

₂₁Sekgobo se hlabile pelo ya ka,

ke fedile;

ke ne ke lebeletse kutlwelobohloko,

empa ha ke a ka ka e fumana;

ka batla batshedisi,

ka se ke ka ba fumana.

₂₂Bakeng sa dijo ba nneile leshokgwa,

ha ke nyorilwe ba nnea asene.

₂₃Eka dijo tsa bona

di ka ba fetohela leraba,

mekete ya bona ya mahlabelo

ya ba fetohela letlowa.

₂₄Eka mahlo a bona a ka fifala,

ba se ke ba bona,

matheka a bona

a nonyoloha hoyahoile.

₂₅Theolela kgalefo ya hao

hodima bona,

mollo wa bohale ba hao

o ba fumane.

₂₆Leaho la bona le ke le fetohe lesupi,

ho se be motho

metlotlwaneng ya bona.

₂₇Ba hlorisa eo o seng o mo shapile,

ba eketsa bohloko

ba eo o mo otlileng.

₂₈Ba ekeletse bobe

hodima bobe ba bona,

ba se ke ba fumanwa ke wena

ba lokile;

₂₉ba hlakolwe bukeng ya bophelo,

ba se ke ba ngolwa le ba lokileng.

₃₀Ha e le nna ke hlophehile,

ke a opelwa;

oho, Modimo, mpholose,

ke boele ke tsohe.

₃₁Ke tla rorisa lebitso la Modimo

ka sefela,

ke le phafe ka teboho.

₃₂Hona ho tla kgahlisa Morena

ho feta hlabelo sa dipohwana,

sa pohwana tse dinaka,

pohwana tse dikgolana.

₃₃Ba eisehang ba tla bona, ba thabe;

lona, ba batlang Modimo,

betang dipelo.

₃₄Morena o utlwa mafutsana,

ha a kgese batho ba hae

ba ditlamong.

₃₅Mahodimo le lefatshe

di ke di mo rorise,

le mawatle

le tsohle tse sesang ho wona;

₃₆hobane Modimo o tla pholosa Sione,

a tsose metse ya Juda:

hore batho ba tle ba ahe ho yona,

e be lefa la bona.

₃₇Ditloholo tsa bahlanka ba hae

di tla e ja lefa,

ba ratang lebitso la hae

ba tla phela ho yona.

₂Sello sa ka se nyolohela ho Modimo,

ke llela ho yena;

sello sa ka se nyolohela ho Modimo,

o tla ntshekehela tsebe.

₃Mohla ke neng ke le matshwenyehong

ka batla Morena,

ka dula ke phahamisitse matsoho,

ke a phahamisitse hara bosiu,

moya wa ka wa hana ho tshediseha.

₄Ka hopola Modimo, ka fehelwa,

ka nahana, moya wa ka wa sarelwa.

₅O entse hore ke se ke ka bo hlotha,

ke tshwenyehile, ke sitwa le ho bua.

₆Ke hopola ditshiu tsa kgale,

le dilemo tse ileng ke a di hopola.

₇Bosiu ke fihlelwa ke pina pelong,

ke a nahana,

moya wa ka o a balabala:

₈“Na Morena o ntahletse ruri,

ha a sa tla hlola a kgahlwa ke nna?

₉Na mohau wa hae o feletse ruri,

ditshepiso tsa hae

ha di sa tla phethwa,

di phethelwa meloko yohle?

₁₀Na Modimo o lebetse

ho utlwela bohloko?

Na kgalefo ya hae

e thibetse rato la hae?”

₁₁Jwale ke re: “Se ntlhabileng ke sena:

Letsoho la Ya Hodimodimo

le fetohile.”

₁₂Ke hopola mesebetsi ya Morena,

e, ke hopola dimakatso tsa hae,

dimakatso tsa boholoholo.

₁₃Ke nahana

mesebetsi yohle ya hae,

ke imamella

diketso tsa hae tse kgolo.

₁₄Modimo, ditsela tsa hao

di a halalela;

na modimo o teng o moholo,

o moholo jwaloka wena Modimo?

₁₅Wena o Modimo

ya etsang dimakatso,

o bonahaditse matla a hao

hara ditjhaba.

₁₆Ka tsoho la hao

o lopolotse tjhaba sa hao,

bana ba Jakobo le ba Josefa.

₁₇Metsi a na a o bona, Modimo,

metsi a o bona, a tuduana,

madiba a tsukutleha.

₁₈Maru a nesa pula,

mahodimo a thwathwaretsa,

mahadima a hao a tsekema kahohle.

₁₉Letolo la hao la thwathwaretsa,

la thwathwaretsa hara setsokotsane,

mahadima a hao a bonesa lefatshe,

lefatshe la reketla, la sisinyeha.

₂₀Tsela ya hao ya tsamaya lewatleng,

le tselana tsa hao hara bodiba;

empa ha ho ya boneng

mohlala wa hao.

₂₁O tsamaisitse setjhaba sa hao,

wa se tsamaisa jwaloka mohlape,

wa se tsamaisa

ka letsoho la Moshe

le ka letsoho la Arone.

Morena, ako ntshekehele tsebe,

o nkarabe,

hobane ke hlophehile,

ke futsanehile.

₂Ako baballe bophelo ba ka,

hobane ke motshepuwa wa hao,

pholosa mohlanka wa hao

ya o tshepang.

₃Ke wena Modimo wa ka,

nkgauhele, Morena,

ke ipiletsa ho wena kamehla.

₄Ako thabise mohlanka wa hao;

ke o rapela

ka moya wa ka wohle, Morena.

₅Wena Morena, o molemo,

o a tshwarela;

mohau wa hao o moholo

ho bohle ba ipiletsang ho wena.

₆Morena, sekehela thapelo ya ka tsebe,

o mamele sello sa thapedi ya ka.

₇Ha ke le matshwenyehong

ke ipiletsa ho wena,

mme wena o a nkaraba.

₈Morena, ha ho ya tshwanang le wena,

ya tshwanang le wena hara medimo,

ha ho mesebetsi e kang ya hao.

₉Tjhaba tsohle tseo o di bopileng

di tla tla,

di itihele maotong a hao Morena,

di tlotlise lebitso la hao;

₁₀hobane o moholo, o etsa dimakatso,

ke wena Modimo o inotshi.

₁₁Nthute tsela ya hao Morena,

ke tle ke tsamaye nneteng ya hao;

tataisetsa pelo ya ka

tshabong ya lebitso la hao.

₁₂Morena, Modimo wa ka,

ke tla o boka ka pelo ya ka yohle,

ke tlotlise lebitso la hao

kamehla yohle.

₁₃Ho nna mohau wa hao o moholo,

ke wena ya ntopolotseng

botebong ba Nqalo ya Bafu.

₁₄Modimo,

baikakasi ba ntsohetse matla,

sehlopha sa ba sehloho

se batla bophelo ba ka,

ha ba na taba le wena.

₁₅Empa wena Morena, o Modimo

o na le kutlwelobohloko le mosa,

o dieha ho halefa,

o tletse mohau le botshepehi.

₁₆Ako kgutlele ho nna, o nkgauhele;

matlafatsa mohlanka wa hao,

o pholose mora

wa lekgabunyane la hao.

₁₇Bonahatsa molemo wa hao ho nna,

ba ntlhoileng ba hlajwe ke dihlong,

ha ba bona hore wena Morena,

o mothusi wa ka

le motshedisi wa ka.