To The Word – Day 144

₁Solomone, mora wa Davida, a tsitsa mmusong wa hae; Morena Modimo wa hae, a ba le yena, mme a mo phahamisa haholo.

₂Jwale Solomone a bua le Baiseraele bohle, le balaodi ba bahlabani ba sekete, le ba bahlabani ba lekgolo, le baahlodi, le mahosana wohle a Baiseraele, e leng dihlooho tsa malapa abo bona. ₃A tsamaya le setjhaba sohle, a ya sebakeng sa borapedi se neng se le Gibeone, hobane Tente ya Modimo eo Moshe, mohlanka wa Morena, a neng a e etse ha a le lehwatateng, e ne e le hona moo Gibeone. ₄Feela Davida o ne a ile a nyolla areka ya Modimo Kiriate-Jearime, a e isa sebakeng seo a neng a e lokiseditse sona. O ne a e hlometse tente Jerusalema. ₅Le aletare ya lethose eo Besalele, mora wa Uri, setloholo sa Hure, a neng a e entse, o ne a e hlomme kapele ho Leaho la Morena moo bo-Solomone le setjhaba ba neng ba eya teng ho ya bua le Morena. ₆Solomone a hlwella aletareng ya lethose, kapele ho Morena. Aletare eo e ne e le pela Tente ya Morena, mme a etsetsa dinyehelo tsa setjheso tse sekete hodima yona.

₇Hona bosiung boo Modimo a iponahatsa ho Solomone, a re ho yena: “Kopa seo o lakatsang hore ke o fe sona!”

₈Solomone a re ho Modimo: “O bontshitse lerato le leholo ho Davida, ntate, mme o entse hore ke be kgosi, ke mo hlahlame. ₉Jwale Morena Modimo, tshepiso eo o e etseditseng Davida, ntate, e ke e phethahale, hobane ke mona o nkentse kgosi ya setjhaba se sengata jwaloka lerole la lefatshe. ₁₀Ako nnee bohlale le tsebo, e le hore ke tle ke tsebe ho etella setjhaba sena pele, hobane ke mang ya ka tsebang ho busa setjhaba see sa hao se sekaalekaale?”

₁₁Modimo a re ho Solomone: “Kaha o kopile se ka pelong ya hao, o sa ikopela matlotlo, kapa maruo, kapa tlotla, kapa hore dira tsa hao di timetswe, kapa hore o phele halelele, o mpa o ikopetse bohlale le tsebo, hore o tle o tsebe ho busa setjhaba sa ka, seo ke o beileng ho ba kgosi ya sona, ₁₂ke o nea bohlale, le tsebo. Ke tla be ke o nee le matlotlo, le tlotla, e leng tseo ho eso be le kgosi e kileng ya eba le tsona pele ho wena, kapa e tla ba le tsona kamorao ho wena.”

₁₃Yaba Solomone o kgutlela Jerusalema, a etswa sebakeng sa borapedi se neng se le Gibeone, moo a neng a le kapele ho Tente ya Morena, mme a fihla a busa Baiseraele.

₁₄Solomone a kgobokanya dikariki tsa ntwa le bahlabani ba palamang. O ne a ena le dikariki tsa ntwa tse sekete le makgolo a mane, le bahlabani ba palamang ba dikete tse leshome le metso e mmedi, bao a ileng a ba bea metseng eo ho bolokwang dikariki tsa ntwa ho yona, le Jerusalema moo a neng a le hona teng. ₁₅Kgosi ya etsa hore motseng wa Jerusalema, silefera le kgauta di be ngata jwaloka majwe, le difate tsa dikedare di be ngata jwaloka difate tsa monokotshwai tse phuleng. ₁₆Bahwebi ba kgosi Solomone ba ne ba mo rekela dipere Egepeta le Kuwe. ₁₇Kariki ya ntwa e ne e rekwa ka silefera e ka etsang boima ba dikilo tse supileng, pere yona e le silefera e boima bo ka bang kilo le halofo. Bahwebi ba ne ba rekisetsa dikgosi tsohle tsa Bahete le tsa Baarame dipere tsena.

₁Solomone a rera ho hahela Morena Tempele le ho ikgahela ntlo ya bokgosi. ₂A kgetha banna ba dikete tse mashome a supileng ho thotha thepa ya ho haha, le ba dikete tse mashome a robedi ho betla majwe thabeng. A kgetha baokamedi ba bona ba dikete tse tharo le makgolo a tsheletseng.

₃Solomone a romela molaetsa ho Hirame, kgosi ya Tire, a re: “Jwalokaha o ile wa sebetsa le Davida, ntate, wa mo romela difate tsa dikedare ho ikgahela ntlo, le nna ako sebetse le nna jwalo. ₄Bona, ke hahela Morena Modimo wa ka, Tempele moo a tla kgumamellwa teng, mme ke mo abela yona. Ke moo ke tla mo tjhesetsa mokubetso o monko o monate teng. Ke moo re tla bea bohobe bo halalelang teng, re etsetse le nyehelo ya setjheso teng, hoseng le mantsiboya, le ka disabatha, le ka mekete ya ho thwasa ha kgwedi, le ka mekete e halalelang ya Morena Modimo wa rona. Ena ke taelo ya kamehla yohle e laetsweng Baiseraele.

₅“Tempele ena eo ke tla e haha e kgolo hobane Modimo wa rona o moholo ho feta medimo yohle. ₆Empa ke mang ya ka mo hahelang Tempele, haesitana le mahodimo a maholo hakaanakaana, a ke ke a mo lekana? Jwale ebe nna ke mang, hoo nka mo hahelang Tempele, haese feela ho haha sebakana sa ho mo tjhesetsa mahlabelo?

₇“Ka lebaka lena, ako nthomelle monna wa setsebi, ya tsebang ho etsa dintho tsa kgauta, le tsa silefera, le tsa lethose, le tsa tshepe; ya tsebang le ho etsa masela a perese, le a mafubedu, le a maputswa; ya tla tseba ho rala ditshwantsho, a sebetse le banna ba ditsebi, bao ke nang le bona mona naheng ya Juda le Jerusalema, bao Davida, ntate, a seng a ba hlophile.

₈“Hape o nthomelle difate tsa dikedare, le tsa modutu, le tsa alemaka, tse tswang Lebanone. Ke a tseba hore bahlanka ba hao ke ditsebi tsa ho rema difate, moo Lebanone, mme bahlanka ba ka ba tla sebetsa le ba hao, ₉ba ntlhophele difate tse ngata, hobane Tempele eo ke tla e haha e tla ba kgolo ka mokgwa o makatsang. ₁₀Ke tla o romela koro e etsang boima ba dithane tse dikete tse pedi, le harese e etsang boima ba dithane tse dikete tse pedi, le veine e etsang dilethara tse dikete tse makgolo a mane, le ole ya mohlwaare e etsang dilethara tse dikete tse makgolo a mane, hore e be dijo tsa bahlanka ba hao ba tla rema difate.”

₁₁Yaba Hirame, kgosi ya Tire, o araba Solomone ka lengolo, o re: “Kahobane Morena a ratile setjhaba sa hae, o o entse hore o be kgosi ya sona.”

₁₂Hirame a tswela pele, a re: “Ho bokwe Morena Modimo wa Iseraele, ya entseng lehodimo le lefatshe, ya neileng Davida mora ya bohlale, ya nang le kelello le kutlwisiso, ya tla hahela Morena Tempele, a be a ikgahele ntlo ya bokgosi.

₁₃“Jwale ke o romela monna ya bohlale, ya nang le kutlwisiso, ya bitswang Hurame. ₁₄Ke mora wa mosadi e mong wa ba morabe wa Dane. Ntatae o ne a ahile Tire. Monna enwa o tseba ho etsa dintho tsa kgauta, le tsa silefera, le tsa lethose, le tsa tshepe; le ho betla majwe, le ho etsa dintho tsa lehong, le tsa masela a perese, le a maputswa, le a lene e lohehileng, le a mafubedu. O tseba le ho etsa moralo wa ntho efe le efe, le ho etsa setshwantsho sa ntho efe le efe eo ho thweng a e etse. Monna enwa o tla sebetsa le ditsebi tsa hao, le ditsebi tsa monga ka Davida, ntatao.

₁₅“Ka baka lena, monga ka a ke a romele koro, le harese, le veine, le ole, e leng tseo a buileng ka tsona, ho rona bahlanka ba hae. ₁₆Rona re tla rema difate tsohle tseo o di hlokang, mona Lebanone, re di tlamahanye, re di akgele lewatleng, di sike le lebopo di phaphametse, ho ya fihla Jopo. Jwale wena o tla di nka, o di ise Jerusalema.”

₁₇Solomone a bala bajaki bohle ba neng ba le naheng ya Iseraele; a ba bala jwalokaha Davida, ntatae, a ne a ile a ba bala. Ha fumanwa ba le dikete tse lekgolo le mashome a mahlano a metso e meraro, le makgolo a tsheletseng. ₁₈Ba dikete tse mashome a supileng a ba abela ho jara thoto; ba dikete tse mashome a robedi a ba abela ho thua majwe thabeng, mme ba dikete tse tharo le makgolo a tsheletseng bona a ba abela ho hlokomela batho ba sebetsang.

₁Jwale Solomone a qala ho haha Tempele ya Morena, Jerusalema, thabeng ya Moria, seotlong sa Orenane wa Mojebuse, moo Morena a neng a iponahatse teng ho Davida, ntatae; e leng sebaka seo Davida a neng a se kgethe. ₂A qala ho e haha ka letsatsi la bobedi la kgwedi ya bobedi, selemong sa bone sa puso ya hae.

₃Ditekanyo tsa Tempele ya Modimo, eo Solomone a ileng a e haha, ke tsena: Bolelele e ne e le dimethara tse ka bang mashome a mabedi a metso e supileng, bophara e le dimethara tse ka bang robong. ₄Bolelele ba lethule le kapele ho Tempele e ne e ka ba dimethara tse robong, bo lekana le bophara ba Tempele; bophahamo le bona e ka ba dimethara tse robong. Bokahare ba lethule a bo maneha kgauta e hlwekisitsweng.

₅Mabota a Tempele a a maneha mapolanka a modutu, le wona a a kwahela ka kgauta a hlwekisitsweng. Hodima wona a etsa ditshwantsho tsa difate tsa dipalema, le meqhaka e lohilweng jwaloka ketane. ₆A kgabisa Tempele ka majwe a bohlokwa, le ka kgauta e tswang Parefaime. ₇A maneha bokahare ba marulelo, le dikosene tsa menyako, le mabota, le mamati a Tempele ka kgauta, mme a etsa ditshwantsho tsa dikerubime maboteng.

₈A haha Sehalalelo se halalelang ka ho fetisisa. Bolelele ba sona bo ne bo lekana le bophara ba Tempele, e le dimethara tse ka bang robong, le bophara ba sona e le dimethara tse ka bang robong. A se maneha kgauta e hlwekisitsweng, e etsang boima ba dithane tse ka bang mashome a mabedi a motso o mong. ₉Boima ba dipekere tsa kgauta e ne e ka ba dikeramo tse makgolo a tsheletseng. Le bokahare ba dikamore tse kahodimo bo ne bo manehilwe kgauta.

₁₀Ka Sehalalelong se halalelang ka ho fetisisa a etsa dikerubime tse pedi, tse betlilweng, mme a di maneha kgauta. ₁₁Bolelele ba mapheo a dikerubime ha a thathaletse e ne e ka ba dimethara tse robong. Bolelele ba lepheo le le leng la kerubime ya pele e ne e ka ba dimethara tse pedi le halofo. Le ne le thetsitse lebota la Tempele, ha lepheo le leng, le ntseng le lekana le lona, lona le ne le thetsana le lepheo la kerubime e nngwe. ₁₂Ka mokgwa o tshwanang, lepheo le leng la kerubime ya bobedi le ne le etsa bolelele ba dimethara tse ka bang pedi le halofo, le thetsitse lebota le leng la Tempele, ha lepheo le leng, le bolelele bo lekanang le ba lepheo la pele, le ne le thetsitse lepheo la kerubime ya pele. ₁₃Mapheo a dikerubime tsena tse pedi, ha a thathaletse, a ne a etsa bolelele ba dimethara tse ka bang robong. Dikerubime tsena di ne di eme ka maoto, di tadimile Sehalalelong.

₁₄A etsa lesira ka masela a maputswa, le a perese, le a mafubedu, le a lene, mme a etsa ditshwantsho tsa dikerubime hodima lona.

₁₅Kapele ho Tempele a haha ditshiya tse pedi, tseo bolelele ba tsona e neng e ka ba dimethara tse leshome le metso e tsheletseng. Tshiya e nngwe le e nngwe e ne e ena le kotola eo bophahamo ba yona e neng e ka ba dimethara tse pedi le halofo. ₁₆A etsa mekgabiso e jwaloka diketane, a e bea kahodimo ho ditshiya; a etsa le dikgarenate tse lekgolo, mme a di hokela mekgabisong eo. ₁₇A hloma ditshiya tseo kapele ho Tempele; e nngwe ya eba ka letsohong le letona, mme a e bitsa Jakine, e nngwe ya eba ka ho le letshehadi, mme a e bitsa Boase.

₁Solomone a etsa aletare ya lethose. Bolelele ba yona e ne e le dimethara tse ka bang robong, bophara ba yona le bona e ka ba dimethara tse robong, bophahamo e ka ba dimethara tse nne le halofo.

₂A etsa le tanka e tjhitja ka tshepe e qhibidisitsweng. Boahlamo ba molomo wa yona e ne e ka ba dimethara tse nne le halofo, bophahamo e ka ba dimethara tse tharo. Bolelele ba ho potapota boahlamo ba yona bo ne bo etsa dimethara tse ka bang leshome le metso e meraro le halofo. ₃Katlasa molomo wa yona, ho o potapota, ho ne ho ena le ditshwantsho tsa dipohwana, mme halofong e nngwe le e nngwe ya methara ho ena le dipohwana tse leshome. Dipohwana di ne di entse mela e mmedi, di bopeletswe le tanka.

₄Tanka e ne e dutse hodima mekokotlo ya dipohwana tse leshome le metso e mmedi; tse tharo di tadimile leboya, tse tharo di tadimile bophirimela, tse tharo di tadimile borwa, tse tharo di tadimile botjhabela. Tanka e ne e beilwe hodima mekokotlo ya tsona, di furallane. ₅Morumo wa tanka e ne e le dimilemethara tse ka bang mashome a supileng a metso e mehlano, molomo wa yona o ahlame jwaloka molomo wa komiki, o ena le dithunthung tsa kgahla. E ne e tshela dilethara tse ka bang dikete tse mashome a tsheletseng.

₆Jwale Solomone a etsa dikotlolo tse leshome tsa lethose, tsa ho hlatswetsa. A bea tse hlano ka lehlakoreng le letona, tse hlano ka lehlakoreng le letshehadi. Ka ho tsona ho ne ho hlatswetswa dintho tse sebediswang ha ho etswa nyehelo ya setjheso. Tanka yona e ne e sebediswa ke baprista ha ba itlhatswa.

₇A etsa didulwana tsa mabone, tsa kgauta, tse leshome, ho ya kamoo di neng di tshwanetse ho ba kateng, a di bea ka Tempeleng, tse hlano ka letsohong le letona, tse hlano ka ho le letshehadi.

₈A etsa le ditafole tse leshome, a di bea ka Tempeleng; tse hlano ka letsohong le letona, tse hlano ka ho le letshehadi. A etsa le dikotlolo tse lekgolo tsa kgauta.

₉A etsa seotlwana sa baprista, le seotlwana se seng se seholo, le mamati a diotlwana, mme mamati ao a a maneha lethose. ₁₀A bea tanka ka lehlakoreng le letona, qetheng e ka borwa bo ka botjhabela.

₁₁Hurame a bopa dipitsa, a etsa le dikgarafu le dikotlolo. Jwale yaba Hurame o qetile mosebetsi wa Tempele ya Modimo, oo a neng a o etsetsa kgosi Solomone. ₁₂E ne e le dintho tsena: ditshiya tse pedi, le dikotola tse pedi tse neng di le hodima ditshiya, le meqhaka a mmedi e kgabisitseng dikotola tse pedi tse hodima ditshiya, ₁₃le dikgarenate tse makgolo a mane tse kgabisitseng matlowa a mabedi. Letlowa ka leng le ne le ena le mela e mmedi ya dikgarenate tse kgabisitseng dikotola tse pedi tse hodima ditshiya. ₁₄A etsa didulwana le dikotlolo tse bewang hodima tsona, ₁₅le tanka, le dipohwana tse leshome le metso e mmedi tse e jereng, ₁₆le dipitsa, le dikgarafu, le difereko, le dintho tsohle tsa tsona.

Dintho tsohle tseo Hurame a neng a di etseditse kgosi Solomone, bakeng sa Tempele ya Morena, e ne e le tsa lethose le phatsimang. ₁₇Kgosi ya etsetsa dintho tsena phuleng ya Jorodane, sethulelong sa letsopa se pakeng tsa Sukote le Sereda. ₁₈Solomone o ile a etsa dintho tsena di le ngata; le boima ba lethose leo di entsweng ka lona bo ne bo ke ke ba lekanngwa.

₁₉Solomone a etsa dintho tsohle tsa Tempele ya Morena, le aletare ya kgauta, le ditafole tse neng di bea bohobe bo halalelang. ₂₀A etsa didulwana tsa mabone le mabone a tsona ka kgauta e hlwekisitsweng, e le hore a tle a nne a tuke kapele ho Sehalalelo jwalokaha ho ne ho laetswe. ₂₁Ka kgauta e hlwekisitsweng a etsa dipalesa, le mabone, le matlao. ₂₂A etsa le dikere tse lokisang dikgwele tsa mabone, le dikotlolo, le dikgaba, le dipitsana tsa mokubetso, ka kgauta e hlwekisitsweng. Hodima monyako wa Tempele, le hodima mamati a Sehalalelo se halalelang ka ho fetisisa, le hodima mamati a Tempele, a maneha kgauta e hlwekisitsweng.

₁Yaba mosebetsi wohle, oo Solomone a neng a o etsetsa Tempele ya Morena, o a phethwa. Jwale Solomone a kenya dintho tsohle tseo Davida, ntatae, a neng a di abetse Morena, ka matlung a polokelo a Tempele. E ne e le silefera, le kgauta, le dintho tsohle.

₂Jwale Solomone a kgobokanya baholo bohle ba Iseraele, le dihlooho tsohle tsa merabe, le mahosana a malapa a bana ba Iseraele. Bohle ba tla Jerusalema ho kgosi Solomone, hore ba tlo nyolla areka ya selekane sa Morena, e tswe Motseng wa Davida, e leng Sione. ₃Banna bohle ba Iseraele ba kgobokanela ho kgosi Solomone mohla mokete, ka kgwedi ya bosupa.

₄Baholo bohle ba Iseraele ba tla, mme Balevi ba nka areka. ₅Baprista le Balevi ba nyolla areka, le Tente ya Morena, le dintho tsohle tse halalelang, tse neng di le ka Tenteng. ₆Jwale bo-kgosi Solomone le setjhaba sohle sa Iseraele, se neng se kgobokanetse ho yena, ba ema kapele ho areka, ba etsa mahlabelo ka dikgutshwane, le ka dipohwana tse ngata, hoo di neng di ke ke tsa balwa.

₇Baprista ba tlisa areka ya selekane sa Morena ka Tempeleng, ba e bea ditulong tsa yona, ka Sehalalelong se halalelang ka ho fetisisa, tlasa mapheo a dikerubime. ₈Dikerubime tseo di ne di thathaladitse mapheo a tsona hodima moo areka e bewang teng, a okametse areka le mefeng ya yona. ₉Mefeng e ne e hlahisitse dintlha tsa yona, hoo dintlha tseo di neng di bonahala ha motho a le ka Sehalalelong, a tobane le Sehalalelo se halalelang ka ho fetisisa, empa di ne di sa bonahale ha motho a le kantle ho Sehalalelo, mme di sa ntsane di le moo le kajeno-ya-bokajeno. ₁₀Ho ne ho se letho kahara areka, ha e se matlapa a mabedi, ao Moshe a neng a a kenye kateng ha ba le Horebe, mohla Morena a etsang selekane le bana ba Iseraele, ha ba ne ba etswa naheng ya Egepeta.

₁₁Baprista ba tswa ka Sehalalelong. Bohle ba neng ba etswa kamoo ba ne ba itlhwekisitse ho sa natswe dihlopha tsa bona. ₁₂Balevi bohle, bao e neng e le dibini, e leng bo-Asafo, le Hemane, le Jedutune, le bara ba bona, le bana babo bona, ba ne ba eme ka botjhabela ho aletare, ba apere diaparo tsa lene tse tshweu, ba letsa matlheretlhere, le dikatara, le diharepa. Ba ne ba tlatsitswe ke baprista ba lekgolo le mashome a mabedi, ba neng ba letsa diterompeta. ₁₃Baletsi ba diterompeta, le dibini, ba amohela pina jwalokaha eka ho bina motho a le mong, ba rorisa Morena. Ba ne ba tlatsitswe ke diterompeta, le matlheretlhere le diletsa tse ding, ba rorisa Morena, ba re:

Yaba leru le tlala ka Tempeleng ya Morena. ₁₄Baprista ba sitwa ho ntshetsa mosebetsi wa bona pele ka baka la leru, hobane tlotla ya Morena e ne e tletse ka Tempeleng ya Modimo.

₁Pesalema ya Solomone.