To The Word – Day 167

₁“Silefera

e na le morafo wa yona,

kgauta

e na le setshekelo sa yona;

₂tshepe yona e tjhekwa

e etswa katlasa lefatshe,

lethose le fumanwa

ka ho qhibidisa moralla.

₃Motho o kenella hare

mpeng ya lefatshe,

a yo fihla kgotjheletsaneng tse hole,

a etse merafo

hara lefifi le letsholetsho.

₄O tjheka tjhafo

hole le leaho la batho,

bakeng tseo

leoto le eso hate ho tsona;

a leketle marapong

a le hole le batho,

a tsokotsehe, a ye kwana le kwana.

₅Dijo di mela kahodima lefatshe,

katlase le fuduuwa

jwalokaha ho fuduuwa mollo.

₆Majwe a lona

a bopeletswe le disafire,

a bile a na le mereto ya kgauta.

₇Tsela ya teng

ha e tsejwe le ke letlaka,

esita le phakwe

ha e eso ka e e bona.

₈Batana tsa naha

ha di eso tsamaye ho yona,

esita le tau ha e eso fete le moo.

₉“Lejwe la moremaphofu

motho o a le thuaka,

thaba a di fure metheong ya tsona.

₁₀Hara mafika a phunyake mesele,

mahlo a hae a bone tsa bohlokwa

di le mefuta.

₁₁Metsi a rothelang ka merafong

o a a thibela,

tse patehileng a di bee mmananeng,

di bonwe ke bohle.”

₁₂“Ebe jwale bohlale

re ka bo fumane kae?

Lehae la kutlwisiso lona

le fumanwa kae?

₁₃Bohlale ha bo fumanwe

fatsheng la ba phelang,

ha ho ya utlwisisang

bohlokwa ba bona.

₁₄Bodiba bo re:

‘Ka ho nna bohlale ha bo yo!’

Lewatle le re:

‘Le ho nna bohlale ha bo yo!’

₁₅Ka kgauta e hlwekisitsweng

bo ke ke ba rekwa,

kapa theko ya bona ya methwa

ka boima ba silefera.

₁₆Ka kgauta ya Ofire

bo ke ke ba rekwa,

kapa ka kareneleane

le safire ya bohlokwa.

₁₇Kgauta kapa mahakwe

a ke ke a lekana le bona,

kapa ba ananngwa

ka mekgabiso ya kgauta.

₁₈Dikgetla le mahakwe

tsona ha di sa bolelwa;

theko ya bohlale

e feta le mabenyane a bohlokwa.

₁₉Jwe la bohlokwa la Kushe

le ke ke la lekana le bona,

ka kgauta e hlwekisitsweng

bo ke ke ba rekwa.”

₂₀“Ebe jwale bohlale bo tswa hokae?

Lehae la kutlwisiso lona le hokae?

₂₁Bo patetswe dibopuwa tsohle,

bo patetswe le tsona

nonyana tse fofang.

₂₂Timelo le lefu le tsona di re:

‘Re utlwa bo-fuufu ha ba bo bolela.’

₂₃“Ke Modimo feela

ya tsebang tsela ya bona,

ke yena feela

ya tsebang habo bohlale,

₂₄hoba o bona pheletso tsa lefatshe,

o bona tsohle tse tlasa mahodimo.

₂₅Ha Modimo a nea moya

matla a wona,

le mawatle a a sehela moedi;

₂₆ha a ne a beela pula taelo,

lehadima le lona a le betlela tsela,

₂₇o ila bona bohlale, a bo hlahloba,

a bo leka, a bo ananela.

₂₈“Yaba o re ho motho:

‘Ho tshaba Morena

ke bona bohlale;

ho furalla bokgopo

ke yona kutlwisiso.’ ”

₂“Eka nkabe ke phela

sa kgwedi tse fetileng,

sa matsatsi

a ha Modimo a ne a ntisitse;

₃ha bone la hae

le ne le mponesetsa tsela,

ka sedi la hae

ke tsamaya le lefifing!

₄Eka nkabe ke le matsatsing

a botjha ba ka,

ha tswalle sa Modimo

se sa sireletsa lapa la ka,

₅ha Ya Matla wohle

a ne a sa na le nna,

bana ba ka ba mpotapotile;

₆ha lebese le ne le phalla

tseleng ya ka,

mafika a kopotsa phororo tsa ole.

₇“Ha ke ne ke eya

kgorong ya motse,

ke bea tulo sa ka lebaleng la motse,

₈batjha ha ba mpona

ba ne ba sutha,

maqheku a phahame,

a eme ka maoto;

₉mahosana le wona

a kgaotse ho bua,

ka matsoho a wona a ithibe melomo;

₁₀babusi le bona

ba kgaotse ho bua,

maleme a bona

a maname mahalapeng.

₁₁“Ya neng a nkutlwa

o na mpua hantle,

ya neng a mpona yena a mpakela;

₁₂ke ne ke lopolla mafutsana

a llelang thuso,

ke lopolla le yona kgutsana

e se nang mothusi.

₁₃Ya kgatheng la ho shwa

o na ntlhohonolofatsa,

mohlolohadi yena

ke thabisa pelo ya hae.

₁₄Ho loka e ne le seaparo sa ka,

kahlolo ya ka e le kobo

le moqhaka wa ka.

₁₅Ke ne ke le mahlo

a ba foufetseng,

ke bile ke le maoto

a ba holofetseng.

₁₆Ke ne ke le ntata bafumanehi,

ke le mmuelli

wa bao ke sa ba tsebeng.

₁₇Ke ne ke roba mekwetsepe

ya ba kgopo,

ke pholose

ba seng ba le menong a bona.

₁₈“Ka ithetsa, ka re:

‘Ke tla shwela lapeng ha ka;

matsatsi a ka a ngatafale

sa lehlabathe,

₁₉metso ya ka e name

ho ya fihla metsing,

phoka e lale makaleng a ka,

e lale bosiu bohle,

₂₀tlotla ya ka e nne e ntjhafale,

seqha sa ka se ntjhafale

tsohong la ka.’

₂₁“Ha ke bua

batho ba ne ba mmamela,

ba lebelle keletso ya ka

ba kgutsitse.

₂₂Ha ke buile

e ne e ba le se le dumme,

polelo tsa ka di kena hamonate

tsebeng tsa bona.

₂₃Ba ne ba ntebella

sa ha ho lebellwa pula,

polelo tsa ka di thopothela

sa pula ya selemo.

₂₄Ha ke tsheha le bona

ba ne ba tlala letshepa;

ha fahleho sa ka se ela,

ebe ba tsoha molota.

₂₅Ke ne ke le morena,

ke ba supisa tsela,

ke phela jwaloka kgosi

hara mabotho a yona,

jwaloka ya tshedisang

ba apereng bofifi.”

₁“Ba banyenyane ho nna

jwale ba a ntshoma,

bao bo-ntata bona

ke neng ke ba nyedisa,

ke neng nke ke ka ba disisa

mohlape le ntja tsa ka.

₂Matla a bona

a na sa nthuse ka letho,

kaha bokwakwariri

bo ne bo ba feletse.

₃Ke mekojwane ya bofuma

le sekoboto,

ba phela ka ho ja metsuntsunyane,

bosiu ba lelera mahalaopeng.

₄Ba kga bodiladilane hara dihlahla,

metso ya tshinabele ke dijo tsa bona.

₅Ba lelekwa hara batho ba bang,

ba kueletswe

jwalokaha eka ke mashodu.

₆Ba phela ka mangopeng a dikgohola,

ka madumeleng le kahara mafika;

₇ba bokolla ba le kahara dihlahla,

ba sunyame mmoho katlasa bobatsi.

₈Ke bana ba mawatla,

bo-mohloka-lebitso,

ba lelekilwe lefatsheng, hara batho.

₉“Jwale ke bona ba ntlakang ka pina,

ke se ke fetohile sesomo ho bona.

₁₀Ba se ba nnyonya

ba bile ba nkwekwetla,

fahleho sa ka

ba se tshwela ka mathe.

₁₁Kahoba Modimo a mphokodisitse,

a ntshotlile,

ha ba sa itshwara

leha ba le pela ka.

₁₂Ka ho le letona

ba mphutuhela ka sekgakgatha,

ha ke baleha ba mpea merebele,

ba haha metero

ho nketsetsa thibella.

₁₃Ba tjhekile mamena tseleng ya ka,

ba atlehiswa ke tshenyeho ya ka,

ba re: ‘Ha a na mothusi!’

₁₄Ba kena jwalokaha eka rako le wele,

ba subuhlellana hara masupi!

₁₅Matshabeho wohle

a nkwetse hodimo,

a ntlositse seriti

ka ho panya ha ntshi,

maruo a ka a fedile sa mouwane.

₁₆“Moya wa ka

o qhashoha kahare ho nna,

matsatsi a ho hlokofatswa

a mphihletse;

₁₇ke lala ke tjhobelwa

ke masapo bosiu,

bohloko bo nkokonang

ha bo mphe sebaka.

₁₈Matla a bohloko ba ka

a senya aparo tsa ka,

a nkgama jwaloka molala

wa hempe ya ka.

₁₉Modimo o nkakgetse kahara seretse,

ke se ke tshwana le lerole

le wona molora.

₂₀“Ke ipiletsa ho wena, Modimo,

empa ha o nkarabe;

ke ema kapela hao,

empa o ntadima feela!

₂₁O mphuthuhela o se na mohau,

tsoho la hao le matla

le a ntwantsha.

₂₂O mphahamisetsa hodimo, moyeng,

ka sefefo

o nkakgoletse kwana le kwana.

₂₃Ke a tseba hoba

o tla nkisa lefung,

tlung e kgethetsweng bohle,

bohle ba phelang.

₂₄“Ha ke re ya shwang

o otlolla letsoho la hae,

ha a llela thuso tlokotsing ya hae?

₂₅Na ha ke a ka ka llela

ba ditsietsing?

Moya wa ka ha o a utlwela

ba maswabing bohloko?

₂₆Ha ke ne ke lebeletse molemo,

ka tlelwa ke bobe;

ha ke ne ke lebeletse lesedi,

ka tlelwa ke lefifi.

₂₇Mala a ka a a qhuqhuma,

a hloka phomolo,

matsatsi a ditlokotsi

a tobane le nna.

₂₈Ke tsamaya ke nyahame pelo,

ho se na lesedi;

ke ema hara mokgopi

ho ikopela thuso.

₂₉Ke se ke fetohile

ngwanabo phokojwe,

ke molekane wa madinyane a mpshe.

₃₀Tlalo la ka le letsho

ke ho kgakgapheha,

masapo a ka a a tjhesa

ke ho opelwa.

₃₁Harepa ya ka e letsa kodi-ya-malla,

melodi ya kodilo la ka e fetohile dillo.”

₁“Ke entse tumellano

le mahlo a ka,

hore ha a ka ke

a tjhatjhehela kgarebe.

₂“Kabelo e tswang ho Modimo

ke efe?

Lefa le tswang ho Ya Matla wohle

ke lefe?

₃Na hase timelo ho baetsadibe,

le koduwa ho ba etsang bokgopo?

₄Modimo tsela tsa ka o a di bona,

le mehato ya ka yohle o a e bala.

₅“Haeba ke sebeditse ka bolotsana,

eba oto la ka

le mpotlakiseditse ho ya thetsa;

₆a nke ke bewe sekaleng sa toka,

Modimo a tle a tsebe

ha ke na molato.

₇Haeba mehato ya ka

e kgelohile tseleng,

eba pelo ya ka

e hohetswe ke mahlo a ka,

eba manothoko

a nkgomaretse matsohong;

₈seo ke se jetseng

se ke se jewe ke e mong,

dijalo tsa ka, ka metso,

di ke di motsulwe.

₉“Haeba pelo ya ka

e hohetswe ke mosadi,

eba nkile ka lalla monyakong

wa mohaeso,

₁₀mosadi wa ka a silele monna e mong,

ba bang ba kopanele dikobo le yena.

₁₁Hona e ka ba ketso

e hlabisang dihlong,

ya eba sebe

se lokelwang ke ho ahlolwa.

₁₂Ke mollo o tjhesang

ho isa timelong,

o tla fedisa maruo a ka kaofela.

₁₃“Haeba mohlanka wa ka

le lekgabunyane la ka,

ke ba hloketse toka

ha ba tsekisana le nna,

₁₄ke tla etsang

ha Modimo a sa ntobile?

Ke tla reng

ha ke araba potso tsa hae?

₁₅Ha ke re Mmopi wa ka

ke Mmopi wa bona?

Ha ke re ke yena ya re bopileng

maleng a bo-mma rona?

₁₆“Haeba nkile ka hanyetsa

kopo ya mofutsana,

eba mohlolohadi o lebeletse,

mahlo a ba kgathala;

₁₇eba ke itjeletse thathana

ke le inotshi,

kgutsana ka e jela tjelamahlong,

₁₈ho tloha botjheng ba ka

ke e hodisitse ke le ntata,

ka baballa mohlolohadi

ho tloha mohla ke tswalwang,

₁₉haeba nkile ka bona motho

a eshwa ke ho hloka diaparo,

kapa mofumanehi

a se na le nketlana;

₂₀haeba ho se ya kileng

a ntlohohonolofatsa,

leha a ile a futhumatswa

ke boya ba nku tsa ka;

₂₁haeba nkile ka otla kgutsana

ka tsoho la ka,

hobane ke tseba hore ka kgotla

nke ke ka tsuwa,

₂₂phaka sa ka

a se motsuhe lehetleng,

tsoho la ka le robehe setsweng,

lenonyeletsong.

₂₃Ho tshaba Modimo

ho ne ho nthibela,

tlotla ya hae

e ntshabisa ho etsa tsena.

₂₄“Haeba nna

ke itshepetse kgauta feela,

eba kgauta e hlwekisitsweng

ke tshepa la ka;

₂₅haeba ke nyakaladitswe

ke ho rua haholo,

hobane ka matsoho a ka

ke sebeditse haholo;

₂₆haeba nkile ka boha

tsatsi ha le phatsima,

kapa kgwedi

e tsamaya ka leredi la yona,

₂₇kunutung la pelo ya ka ka lekeha,

ka aka tsoho la ka ho di obamela,

₂₈tsena le tsona ke dibe

tsa ho ahlolwa ke baahlodi,

hoba Modimo ya kahodimo

ke tla be ke mo latotse.

₂₉“Na nkile ka thabela bomadimabe,

madimabe ba sera sa ka,

kapa ka thoholetsa

ha se welwa ke ditsietsi?

₃₀Ka molomo wa ka

ha ke eso bue bokgopo,

ka ho lakaletsa

bophelo ba sona thohako.

₃₁Na ba lapa la ka ba kile ba re:

‘Ke mang ya sa kang a ja,

a kgotsofala?’

₃₂Ha ho na moeti

ya kila lala thoteng,

menyako ya lapa la ka

e buletswe batsamai.

₃₃“Haeba nkile ka pata sebe sa ka

jwaloka Adama,

ka ho boloka makgopo a ka

ka fubeng sa ka,

₃₄ka baka la ho tshaba

matshwele a batho,

le ho tshaba ho nyediswa

ke bang ka nna,

ke ne ke tla kgutsa,

ebe ke tswela kantle.

₃₅“Ekaba ke mang ya tla mmamela!

Bonang, mongolo wa ka ke ona!

Ya Matla wohle a ke a nkarabe,

moqosi wa ka

a ngolle nna moqosuwa qoso!

₃₆Ruri ke ne ke tla e jara

hetleng la ka,

ke e rwale

sa mofapahlooho o rwalwa.

₃₇Ke ne ke tla mmalla

mehato ya ka kanngwe,

ke atamele ho yena

ke tsamaya seka kgosana.

₃₈“Haeba masimo a ka a a nqosa,

eba foro tsa wona di tletse dikgapha;

₃₉haeba tholwana tsa wona

ke di jele lehahla,

kapa monga tsona ka mmolaya,

₄₀bakeng sa koro

ho ke ho mele meutlwa,

bakeng sa harese

ho ke ho mele lehola!”

“Ke sa le mmotlana,

lona le tsofetse,

ka hona ke ile ka itshwara,

ka tshaba ho le bolella

seo ke se tsebang.

₇Ke ile ka nahana:

‘Eka kgona baholo ba bue,

ba lemo di ngata ba rute bohlale.’

₈Empa ke moya o ka ho motho,

e leng moya wa Ya Matla wohle,

wona o neang motho kutlwisiso.

₉Hase ba baholo feela

ba nang le bohlale,

kapa maqheku feela

a utlwisisang ho lokileng.

₁₀Ka baka leo,

ke re le ke le mmamele,

le nna ke bolele seo ke se tsebang.

₁₁“Ke ile ka le emela

hore le ke le bue,

puo tsa lona ka di theela tsebe

ha le ntse le kgetha mantswe.

₁₂Ke fetse ka le mamela:

Ha ho le ya mong

ya shanofaditseng dipuo tsa Jobo,

kapa ya arabileng polelo tsa hae.

₁₃Hlokomelang, le se ke la re:

‘Rona bohlale re bo fumane;

Modimo ke yena ya tla mo hlola,

a ke ke a hlolwa ke motho.’

₁₄Polelo tsa Jobo

di ne di sa lebiswa ho nna,

nke ke ka mo araba jwaloka lona.

₁₅“Banna bana ba nyahame dipelo,

ba se ba feletswe ke dikarabo,

mantswe le wona a a ba haella.

₁₆Ebe nka lebella,

hobane ba sa arabe,

hobane ba themeletse,

ba se ba hloka puo?

₁₇Le nna ke tla hlahisa ya ka karabo,

ke be ke bolele seo ke se tsebang.

₁₈Ke pipitlelane ke mantswe,

moya wa ka o ntshusumetsa

hore ke bue;

₁₉fuba sa ka se ka veine e bitieletswe,

se kgatheng la ho phatloha

sa makuka a matjha.

₂₀Ke tla bua,

ho pipitlelwa ho fele;

ke tla tswa molomo,

le nna ke arabe.

₂₁Ha nka ke ka tadima

tshobotsi ya motho,

ha nka ke ka kakamatsa

mang le mang.

₂₂Ha ke ne ke tseba ho kakamatsa,

Mmopi wa ka o na ntlosa

ka ho panya ha ntshi!”

₁“Ka baka lena,

ke a o rapela, Jobo:

Ako mamele polelo ya ka,

mantswe a ka wohle

o a sekehele tsebe.

₂Mamela! Jwale ke lekgatheng

la ho bua,

mantswe a sa le lelemeng la ka.

₃Mantswe a ka ke a pelo

e se nang mano,

molomo wa ka o bua nnete

eo ke e tsebang.

₄Nna ke entswe ke moya

wa Modimo,

mophefumoloho wa Ya Matla wohle

o etsa hore ke phele.

₅“Haeba o ka kgona, ako nkarabe;

rala mabaka a hao,

ebe o nthula ka wona.

₆Kapela Modimo ke tshwana le wena,

ke bopilwe ka letsopa jwaloka wena.

₇Lebaka la hore o ntshabe ha le yo,

ho ba teng ha ka

ho ke ke ha o imela.”

₈“Ruri o buile

moo ke ntseng ke utlwa,

modumo wa mantswe a hao

ka o mamela:

₉‘Nna ke hlwekile, ha ke na sebe,

ke hlatswehile, ha ke na bokgopo,

₁₀empa jwale Modimo o mpea dibato,

o ntadima ke le sera sa hae.

₁₁Maoto a ka o a tlamile

ka mahlaahlela,

tselana tsa ka tsohle

o a di lekola.’

₁₂“Tabeng ena o fositse;

ke o araba ka ho re:

Modimo o moholo ho feta motho.

₁₃Ke ka baka lang

ha o phea kgang le yena,

o re polelo tsa hao ha a di arabe?

₁₄Modimo o bua

ka mekgwa e le mengata,

empa ha ho ya keng a hlokomele.

₁₅Torong le ponong tsa bosiu,

ha phume sa boroko

batho se ba katetse,

phateng tsa bona ba kgalehile,

₁₆Modimo o nyenyeletsa

tsebeng tsa batho,

a ba tshose ka keletso tsa hae,

₁₇hore tsela tse kgopo

ba di kgelohe,

boikakaso bo be hole le bona.

₁₈Modimo o phemisa motho

ho theohela lebitleng,

a mo phemise ho bolawa ka sabole.

₁₉O kgalemela motho

ka ho mo robatsa phateng tsa lefu,

a opise masapo a hae wohle

ho se kgaotso;

₂₀jwale takatso ya dijo

ebe e a fela,

a nyonye le dimonate

tseo a di ratang.

₂₁O ye a fetohe moketa,

a motele dinama,

e sale e le masatswane,

palwadikgopo.

₂₂Moya wa hae o atamela lebitla,

phelo ba hae bo atamele babolai.”

₂₃“Haeba lengeloi le leng

la a sekete,

le le hlakoreng la hae,

e le mmoelanyi,

le ruta motho seo e leng toka,

₂₄le tla mo hauhela,

le bue, le re:

‘Mo hauhele,

a se theohele lebitleng,

hobane ke se ke mo fumanetse

se mo lopollang.’

₂₅Nama ya hae e tla ntjhafala,

e tshwane le ya lesea,

a okolohe, a tshwane

le mehleng ya botjha ba hae.

₂₆O tla rapela Modimo,

yena a mo rekolohele,

fahleho sa hae a tla se bone

a nyakaletse,

hobane Modimo o mmuseletsa

ho loka ha hae.

₂₇O tla binela batho,

ebe o re ho bona:

‘Ke entse sebe,

ka kgopamisa ho loka,

empa sebe seo sa ka

ha ke a se otlelwa.

₂₈O pholositse moya wa ka

O se ye lebitleng,

ke tla boela ke phele,

ke nne ke bone lesedi.’

₂₉“Tsena tsohle

Modimo o di etsa ho motho,

a ka di etsa habedi,

a ka di etsa hararo,

₃₀hore a phemise motho

ho theohela lebitleng,

sedi la bophelo

le tle le mmonese.

₃₁“Hlokomela, Jobo,

o ke o mmamele;

ako kgutse, mme nna ke tla bua.

₃₂Haeba o na le puo, ako nkarabe;

bua, ke kgolwe hore ha o na molato.

₃₃Haeba o sa re letho,

eka kgona o mmamele;

ako kgutse,

mme ke tla o ruta bohlale.”