Ester as koningin
1 Ná hierdie gebeure het die woede van die koning bedaar, en hy het nie meer aan Vasti gedink nie, want hy het onthou wat sy gesê het en hoe hy haar veroordeel het. 2 Gevolglik het die dienaars van die koning gesê: “Laat daar vir die koning jong meisies gesoek word met 'n goeie karakter en 'n mooi figuur. 3 Die koning kan in al die provinsies van sy koninkryk dorpsleiers aanstel dat hulle jong maagde, met 'n mooi figuur, kan uitkies vir die stad Susa, vir die harem, en laat hulle die maagde oorhandig aan die eunug van die koning, die oppasser van die vroue, en laat aan hulle skoonheidsmiddels voorsien word en die ander dinge wat hulle nodig het. 4 En watter vrou ook al die koning behaag, sal in die plek van Vasti heers.” En die koning was tevrede met die voorstel en hy het so gemaak.
5 Daar het 'n Judese man in die stad Susa gewoon en sy naam was Mordegai, seun van Jaïr, seun van Simeï, seun van Kis, uit die stam van Benjamin. 6 Hy was 'n gevangene uit Jerusalem, die stad wat Nebukadnesar, die koning van Babilonië, verower het. 7 Hy het 'n kind in pleegsorg gehad, die dogter van Amminadab, die broer van sy vader, en haar naam was Ester. Toe haar ouers gesterf het, het Mordegai haar grootgemaak, met die oog daarop om haar vir homself as vrou te neem. Die jong meisie het 'n mooi figuur gehad. 8 En toe van die bevel van die koning gehoor is, is 'n groot aantal jong meisies in die stad Susa bymekaargemaak onder toesig van Gai. Ook Ester is na Gai, die oppasser van die vroue, gebring. 9 Die jong meisie het hom geval en sy het sy guns gewen, en hy het dadelik vir haar skoonheidsmiddels en haar porsie voedsel gegee, en ook sewe jong meisies wat uit die koninklike paleis aan haar toegewys is. Hy het haar en ook haar diensmeisies in die vrouekwartiere goed behandel. 10 Ester het egter nie haar herkoms bekend gemaak, of haar vaderland nie, want Mordegai het haar beveel om dit nie bekend te maak nie. 11 En Mordegai het elke dag deur die voorhof van die vroue gaan wandel om te kyk wat met Ester gaan gebeur. 12 En wanneer 'n jong meisie twaalf maande se voorbereiding voltooi het, was dit haar beurt om in te gaan na die koning toe. Só word die tyd van die voorbereiding voltooi: Ses maande lank word hulle met mirre-olie, en daarna ses maande lank met geurige speserye en skoonheidsmiddels vir vroue gesalf, 13 en dan gaan sy in na die koning. Wat sy ook al vra, sal vir haar uit die harem gegee word om saam te neem na die paleis van die koning. 14 Sy het in die aand gegaan en in die oggend teruggekeer na die tweede harem wat onder toesig was van Saäsgas, die eunug van die koning en die oppasser van die vroue. Sy kon nie weer na die koning gaan nie, behalwe as sy by die naam geroep is.
15 En toe die tyd aanbreek vir Ester, die dogter van Amminadab, die broer van Mordegai se pa, om in te gaan na die koning, het sy niks nagelaat van dit wat die eunug, die oppasser van die vroue, haar beveel het nie. Want Ester het steeds guns gevind by elkeen wat haar gesien het. 16 Ester het na Artaxerxes, die koning, ingegaan in die twaalfde maand, dit was die maand Adar, in die sewende jaar van sy regering. 17 Toe het die koning Ester liefgekry, en sy het meer guns gevind by hom as al die maagde. Hy het die hooftooisel vir vroue op haar hoof gesit. 18 Daarop het die koning vir al sy Vriende en sy maghebbers sewe dae lank 'n fees aangebied, en sodoende die huwelik met Ester gevier; hy het ook skuld vir die mense onder sy regering afgeskryf.
Ontdekking van 'n tweede komplot
19 Mordegai het diens gedoen aan die koninklike hof. 20 Ester het nog steeds nie haar vaderland bekend gemaak nie, want Mordegai het haar beveel om God so te vrees en sy bevele te onderhou soos toe sy nog by hom gebly het. En Ester het nie haar leefwyse verander nie.
21 Die twee eunugs van die koning, die hoofde oor die koninklike lyfwag, was verbitterd dat Mordegai bevorder is, en hulle het beplan om Artaxerxes, die koning, om die lewe te bring. 22 En die saak is onder Mordegai se aandag gebring, en hy het dit bekend gemaak aan Ester en sy het die kwessie van die komplot aan die koning geopenbaar. 23 Toe het die koning die twee eunugs laat ondervra en hulle laat ophang, en die koning het beveel dat daar ter herinnering in die koninklike biblioteek 'n inskrywing gemaak word, ter ere van die welwillendheid van Mordegai.
