1 SAMUELE 22

₁Dafida a tloga moo a tšhabela mphomeng wa Adullama. Bjale bana babo le ba leloko la tatagwe ka moka, ge ba ekwa fao, ba fologela go yena gona moo. ₂A kgobokanelwa ke banna ka moka ba ba bego ba pateletšwe, le ba ba bego ba na le molato, le ba ba bego ba senyegile dipelo; yena a ba molaodi wa bona, ba dula le yena, e nyakile go ba banna ba makgolo a mane.

₃Gomme Dafida a tloga moo a ya motseng wa Mitsipa wa Moaba, a kgopela kgoši ya Moaba a re: A tate le mme ba khudugele mono, ba dule mo go lena go fihla ge ke bona mo Modimo a tlogo ntira ka gona. ₄A ba tliša go kgoši ya Moaba, ba dula ntshe lebaka ka moka la ge Dafida a sa le sebong.

₅Moporofeta Gada a bolela le Dafida a re: O se ke wa dula mo sebong; tloga o ye nageng ya Juda. Dafida a tloga a ya sekgweng sa Herethe.

₆Saulo a botšwa gore Dafida o kwetše le banna ba ba nago nae. Ke mola Saulo a dutše Gibea mohloping o lego kua mmotong, a swere lerumo ka seatla, bahlanka ba gagwe ka moka ba eme mo go yena. ₇Saulo a bolela le bahlanka ba gagwe ba ba bego ba eme mo go yena, a re: Hle kwang, lena barwa ba Benyamini! Afa morwa wa Isai o tlo le enetša ka mašemo le ka dirapa tša merara? A o tlo le dira ka moka balaodi ba dikete le ba makgolo? ₈Lena ka moka le ntakane, gwa hlokwa le wa go ntshebela ge morwa wa ka a gwerane le morwa wa Isai. Le gona ga go e a nkwetšego bohloko a ntsebiša ge morwa wa ka a hlohleletša mohlanka yo wa ka a ntsogela ka mokgwa wo re o bonago lehono.

₉Gwa fetola Doege, Moedomo yola, a eme le bahlanka ba Saulo a re: Nkile ka bona morwa wa Isai a etla kua Nobe go Ahimeleke morwa wa Ahitobo. ₁₀Yena eo a mo rerelela go Morena, a mo fa le mefago, a ba a mo nea le tšhoša ya Goliata Mofilisita ela.

₁₁Kgoši ya napa ya roma bahlanka ba bitša Ahimeleke morwa wa Ahitobo moperisita, le bohle ba leloko la tatagwe, baperisita ba Nobe; ba tla go kgoši ka moka ga bona. ₁₂Saulo a re: A o a nkwa, morwa wa Ahitobo?

Yena a re: Ke nna e, Mongaka!

₁₃Saulo a re: Le reng le ntakana ka moka, wena le morwa wa Isai, ge o mo neetše dinkgwa le tšhoša, wa mo rerelela go Modimo, e le gore a ntsogele a ntalele ka mokgwa wo re o bonago lehono?

₁₄Ahimeleke a fetola a re: Gomme ke mang mo go bahlanka ba gago ka moka e a botegago bjalo ka Dafida mokgonyana wa kgoši, yena a phalago bohle ba ba go kwago, moretwa mo motseng wa gago? ₁₅A o re ke mathomo lehono ge ke mo rerelela go Modimo? Aowaa hle! Kgoši a se ke a bea nna molato le ba leloko la gešo ka moka; ka gobane nna mohlanka wa gago ke be ke sa tsebe ditaba tše ka moka, goba ke tše kgolo, goba ke tše nyenyane.

₁₆Kgoši ya re: O tlo hwela sa ruri, wena Ahimeleke le ba leloko la geno ka moka.

₁₇Kgoši ya laela bahlanka ba ba bego ba eme moo, ya re: Batamelang le bolayeng baperisita ba Morena, ka gobane le tša bona diatla di ema le Dafida, le ka gobane ba be ba tseba gore o a tšhaba, mme ba lesa go ntsebiša.

Fela, bahlanka ba kgoši ba gana go iša matsogo le go bolaya baperisita ba Morena.

₁₈Ke mo kgoši e laetšego Doege ya re: Batamela wena, o bolaye baperisita ba!

Doege a batamela a bolaya baperisita bao. Ka lona tšatši leo a bolaye banna ba masome a seswai le banna ba bahlano ba ba bego ba apere kobo ya baperisita.

₁₉Gomme Saulo a bolaya ba Nobe, ba motse woo wa baperisita, ka bogale bja lerumo, banna le basadi le bana le masea, le dipholo le dipokolo le dinku, a di fetša ka bogale bja lerumo.

₂₀Gwa phonyokga morwa o tee wa Ahimeleke morwa wa Ahitobo; leina la gagwe e be e le Abyathara. Yena eo a tšhaba a latela Dafida. ₂₁Abyathara a tsebiša Dafida ge Saulo a bolaile baperisita ba Morena.

₂₂Dafida a bolela le Abyathara a re: Mohla wola ge Doege Moedomo a le ntshe, ke tsebile gobane o tlo botša Saulo. Molato ke wa ka ge go bolawa bohle ba moloko weno. ₂₃Dula le nna, o se boife; gobane e a tsomago bophelo bja ka, o tsoma le bja gago. O khutile, ge o le fa go nna.