Dafida o namolela ba Kegila; o dula lešokeng la Sifi
1Dafida a sebelwa gore Bafilisita ba rakeletše motse wa Kegila, mme ba thopa mabele a mo diboeng. 2Dafida a botšiša Morena a re: A nka se ye ka bolaya Bafilisita bao?
Morena a fetola a re: Sepela o ba bolaye, o namolele motse wa Kegila.
3Banna ba Dafida ba bolela nae ba re: Ge ešita mono nageng ya Juda re phela re boifa, re tlo kgona bjang go tšwa ra hlabana le madira a Bafilisita? 4Dafida a buša a botšiša Morena. Morena a fetola a re: Tsoga o fologele Kegila. Bafilisita ke tlo ba gafela diatleng tša gago.
5Ke mo Dafida le banna ba gagwe ba ilego Kegila, ba hlabana le Bafilisita, ba thopa mehlape ya bona, ba ba bolaya o šoro; ya ba go namolela ba motse wa Kegila.
6Mohla Abyathara morwa wa Ahimeleke a tšhabela go Dafida, o be a tlile le kobo ya moperisita.
7Ge Saulo a tsebišwa gore Dafida o tlile motseng wa Kegila, a re: Modimo o mo gafetše diatleng tša ka, gobane o itswaleletše motseng o nago le dikgoro le mapheko. 8A rapa batho ka moka gore go iwe Kegila tlhabanong, gore ba rakelele Dafida le banna ba gagwe.
9Dafida ge a lemoga gore Saulo o mo reretše bošula, a bitša Abyathara a re: Tlaa le kobo ya moperisita. 10Gomme Dafida a re: Morena Modimo wa Isiraele, nna mohlanka wa gago ke kwele gobane Saulo o rata go tla fa Kegila, gore a senye motse wo ka baka la ka. 11A beng ba motse wa Kegila ba tlo nkgafela diatleng tša gagwe? Le gona, a Saulo o tlo tla bjalo ka ge nna mohlanka wa gago ke ekwa? Morena Modimo wa Isiraele, a ko ntsebiše tšeo, nna mohlanka wa gago.
Morena a re: Ee, o tlo tla.
12Dafida a re: Gomme beng ba motse wa Kegila a ba tlo nkgafela diatleng tša Saulo, nna le banna ba ka?
Morena a re: Ba tlo go gafela.
13Ke mo Dafida a tsogilego a na le banna ba gagwe, ba e bego e ka ba ba makgolo a selelago; ba tloga Kegila ba ya mo ba yago. Saulo, ge ba mo tsebiša gore Dafida o tšhabile, a thiša a lesa go tšwa dira.
14Dafida a dula lešokeng mo dibong, a dula dithabeng tša šokeng la Sifi, Saulo a se kgaotše go mo tsoma; fela, Modimo a se mo gafele diatleng tša gagwe. 15Dafida ge a bona Saulo a tšwetše go tsoma bophelo bja gagwe, a ya a dula lešokeng la Sifi mo lesoding. 16Jonathane morwa wa Saulo a wela tsela, a tla go Dafida a le gona moo lesoding, a mo tiiša maatla ka Modimo. 17A bolela le yena a re: O se boife; seatla sa Saulo tate se ka se go fihlele. Ke wena o tlogo ba kgoši ya Isiraele; gomme nna ke tlo ba letona la gago. Le Saulo tate o tseba fao. 18Ba tiiša kgwerano ya bona pele ga Morena e le babedi. Dafida a šala lesoding; Jonathane a boela gae.
19Gomme Basifi ba rotoga ba tla Gibea go Saulo, ba re: Dafida o iphihla kua ga gešo sebong sa mo lesoding thabaneng ya Hakila, e bataganego le lehanata ka thoko ya le letona. 20Bjalo wena Kgoši, akgofa o fologe ka mo pelo ya gago e belaelago ka gona; gomme sa rena e tlo ba go mo gafela seatleng sa gago. 21Saulo a re: Le bašegofatšwa ba Morena, ka gobane le nkwela bohloko. 22Hle yang bjale le nape le mo tsomišiše, le boneše felo mo nao tša gagwe di yago gona, le e a mmonego gona; gobane ba mpoditše gore o bata maano kudu. 23Lebelešang le tsomišiše dikhung ka moka mo a utamago gona. Ge le šetše le tseba ruri, gona le boe, gore ke ye le lena; gomme ge a ka ba mo nageng yeo, ke tlo mo ntšha mo go diketekete tša Juda.
24Ba wela tsela ba boela Sifi, ba eta Saulo pele. Dafida yena le banna ba gagwe ba be ba le lešokeng la Maone, mo molaleng o bataganego le lehanata ka thoko ya le letona. 25Saulo a tla le banna ba gagwe, ba mo tsoma. Dafida ge a sebelwa, a fologela lentsweng, a dula mo lešokeng la Maone. Saulo ge a ekwa fao, a latela Dafida a tsena mo lešokeng leo la Maone. 26Saulo a sepela a hlehla le thaba ka thoko yeno; Dafida le banna ba gagwe ba hlehla le thaba ka thoko yela. Gomme Dafida ge a re ke a akgofa ke šie Saulo, Saulo le banna ba gagwe ba tiela Dafida le banna ba gagwe gare, gore ba ba sware. 27Ke ge motseta a etla go Saulo, a re: Akgofa o tle; Bafilisita ba hlagetše nageng. 28Ke moka Saulo a gomela Dafida, a yo gahlana le Bafilisita. Ke mo go tšwago leina la felo fao, ge ba re ke lentswe la Kgomelano.
