1 BATHESALONIKA 1

₁Paulo le Silibano le Timotheo re ngwalela phuthego ya Bathesalonika. Ka Modimo Tata wešo le Morena Jesu Kriste re re:

Kgaugelo le khutšo a di be le lena di etšwa go Modimo Tata wešo le go Morena Jesu Kriste,

₂Re le lebogela go Modimo ka mehla ge re le gopola dithapelong tša rena. ₃Ge re le pele ga Modimo Tata wešo, ga re kgaotše go gopola modiro wa lena wa tumelo, ge le itapiša ka tša lerato, le kgotlelela le holofetše Mong wa rena Jesu Kriste. ₄Gobane bana bešo, baratwa ba Modimo, re tseba ge le le ba ba hlaotšwego, ₅ka ge Ebangedi ya rena e sa ka ya le tlela ka polelo fela; e le tletše ka maatla le ka Moyamokgethwa ka mokgwa o kgodišago ruri, bjalo ka ge le tseba se re bego re le sona re na le lena, le tše re di dirilwego ka baka la lena, ₆Lena la tla la ba baetši ba rena le ba Morena, la amogela lentšu ka lethabo la Moyamokgethwa mola ditlaišego e le tše ntši, ₇la ba la ba dikgwadi tša badumedi ka moka ba Matsedonia le ba Akaya. ₈Gobane lentšu la Morena ge le etšwa moo go lena le tumile, la se ke la enela naga ya Matsedonia fela le ya Akaya; tumelo ya lena ya ge le dumetše Modimo ya napa ya kwala gohle, gwa se hlwe go nyakwa se se kago bolelwa ke borena. ₉Bona ka noši ba re anegela tša matseno a rena a re a hweditšego go lena, ka mo le sokologetšego go Modimo, la lahla medimo ya diswantšho, la ba bahlanka ba Modimodimo o a phelago. ₁₀La ba ba go letela Morwa wa gagwe ya a mo tsošitšego bahung, ge a tlo boa kua magodimong, e a tlogo re namolela mohla wa bogale bjo bo tlogo tla.