Metse ya Dibo. Didimo tša Salomo. Gauta ya Ofira
1Ya re ge go fetile nywaga yeo e masome a mabedi ye Salomo a bego a aga Ngwako wa Morena le ngwako wa gagwe ka yona, 2Salomo a tsebo aga metse yela a e filwego ke Hirama gore e dulwe ke Baisiraele. 3Kua motseng wa Hamathi wa Tsoba Salomo o ile, a o tšea ka maatla. 4A aga merako ya motse wa Thadimoro kua lešokeng, le ya metse e mengwe ya dišego ye a bego a e agile Hamathi. 5A aga le motse wa Bethe-Horoni wa tletlolo, le Bethe-Horoni wa tlase, ya ba metse ya dibo e nago le merako le mamati le ditswalelo. 6A aga le motse wa Baalathe, le metse e mengwe ya dišego, ye e bego e le ya gagwe, le metse yohle ya dikoloi le ya dipitsi; a aga tšohle tše a bego a rata go di aga motseng wa Jerusalema, le dithabeng tša Libanoni, le gohle nageng ya mmušo wa gagwe. 7Ge e le ba mathoko ba ba bego ba šetše, e lego Bahethe, le Baamoro, le Baperese, le Bahefi, le Bajebusi, ba e bego e se Baisiraele, 8bana ba bona ba ba bego ba šetše nageng ba sa ka ba fedišwa ke Baisiraele, bona Salomo o ba dirile ba sepalo le nankhono. 9Mo go Baisiraele Salomo ga a ka a ntšha sepalo sa go dira mediro ya gagwe; bona e be e le bahlabani, le balaodi ba dira, le balaodi ba banamedi ba dikoloi le ba dipitsi tša gagwe. 10Go bona Salomo o hlaotše bakgoma le bahlapetši ba gagwe ba e bego e le ba makgolo a mabedi le masome a mahlano ba go buša setšhaba.
11Morwedi yola wa Farao, Salomo o mo ntšhitše motseng wa Jerusalema a mo iša mo ngwakong wo a mo agetšego wona, gobane a re: Mosadi wa ka yo a se ke a dula mo ngwakong wa Dafida kgoši ya Isiraele, gobane felo mo go rotogetšego polokelo ya Morena ke mo go kgethwa.
12Mehleng yeo Salomo o be a tlišetša Morena dihlabelo aletareng ya Morena ye a e agilego mo pele ga mathudi. 13Ba di hlaba ka mehla ye e bego e boletšwe ke Moshe ka disabatha, le ka dikgwedi tše mpsha, le ka menyanya gararo ka ngwaga, ka monyanya wa dinkgwa tše di sa omelwago, le ka monyanya wa dibeke, le ka monyanya wa mešaša. 14Le dihlopha tšela tša baperisita a di bea ka mokgwa wo o beilwego ke Dafida tatagwe; le Balefi a ba diriša wa bona modiro, ba reta Morena, ba thuša baperisita ka go šielana matšatši, le baletakgoro ba leta ba eya ka dihlopha tša bona dikgorong tsohle, gobane molao wa Dafida monna wa Modimo o be o realo. 15Ga ba ka ba tlogela le molao o tee wa kgoši yeo, e ka ba wa baperisita, le ge e le wa Balefi, goba wa balaki ba nywako ya matlotlo.
16Mediro ka moka ya Salomo ye e thomilwego mohla wola go thewa Ngwako wa Morena, ya ba ya phethega ka mokgwa wo, Ngwako wa Morena wa ema o phethegile.
17Mehleng yeo Salomo a ya motseng wa Etsionegebere le Elathe, lebotong la lewatle nageng ya Edomo. 18Hirama a mo romela maselawatle ka bahlanka ba gagwe; gwa tla le bahlanka ba bangwe ba ba tsebago lewatle. Bona bao ba ya Ofira ba na le bahlanka ba Salomo, ba boa le gauta ya ditalente tše makgolo a mane a masome a mahlano, ba e tliša go Salomo.
