2 BAKORINTHE 4

₁Bjale, ge re na le botseta bjoo, ka mo kgaugelo ye e re diregetšego, ga re lape. ₂Re kgaogane le mamenemene a maseme; ga re tle ka tsela ya maano; ga re retole Lentšu la Modimo; re sekišana le matswalo a batho ka moka pele ga Modimo re bola therešo. ₃Ge Ebangedi ya rena e sa le phihlo, e fihletšwe bao ba lahlegago. ₄Ke ba ba sa dumelego, ba modimo wa lefase le o foufaditšego dipelo tša bona, gore ba se bonegelwe ke lebone la Ebangedi ya letago la Kriste, yena seswantšho sa Modimo. ₅Ga re ba go ipolela, re bolela Jesu Kriste, re re: Ke yena Morena; re re: Rena re bahlanka ba lena ka baka la yena Jesu. ₆Gobane ke yena Modimo e a itšego: Seetša a se bonege mo go lego leswiswi. Ke yena a bonegetšego dipelo tša rena, ya ba go edišwa ka go tseba letago la Modimo ka sefahlogo sa Jesu Kriste.

₇Lehumo leo re le swere ka dibja tša letsopa; gore maatla a magolo e be a Modimo, e sego a rena. ₈Re dikilwe thoko tšohle, mme ga re pitlaganywe. Re a phoraphora, mme ga re gakanege. ₉Re a tlaišwa, mme ga ra lahlega. Re digelwa fase, mme ga re senyege. ₁₀Re sepela gohle re swailwe mebele ka leswao la go hwa ga Morena; ya ba gona le bophelo bja Jesu bo bonagalago mebeleng ye rena. ₁₁Gobane ka mehla ge re sa phela, re ba go gafelwa lehu ka baka la Jesu, ya ba gona le bophelo bja Jesu bo bonagalago nameng ya go hwa. ₁₂Ge go le bjalo, mo go rena lehu le dira ka maatla; mme go lena a e be bophelo.

₁₃Re na le moya wola wa tumelo, wo lengwalo le o bolelago la re: Ke be ke holofela, ge ke bolela. Mme le rena re a holofela; ke ka baka leo re bolelago. ₁₄Re fela re tseba gore e a tsošitšego Morena Jesu, le rena o tlo re tsoša ra ba le Jesu; o tlo re bea pepeneneng gammogo le lena. ₁₅Gobane tšohle di dirwa ka baka la lena, gore kgaugelo e bonale bogolo ka bontši bja ba lebogago, ya ba go reta Modimo.

₁₆Ke ka baka leo re sa lapego. Le ge motho yo wa rena wa ntle a onala, motho wa teng o fela a mpshafatšwa ka mehla. ₁₇Gobane morwalonyana wo wa ditlaišego tša lebakanyana, e re ruiša lehumo la letago le le sa felego, le le fetišago tšohle. ₁₈Go tlo ba bjalo ge re sa late tše di bonwago ka mahlo, re lata tše di sa bonwego. Gobane tše di bonwago ka mahlo ke tša lebaka leno fela; mme tše di sa bonwego ke tša neng le neng.