2 BAKORINTHE 5

₁Gobane re tseba gore ge mokutwana wo wa rena wa mošaša wa mo faseng ge o phušolwa, re tlo ba le moago o tšwago go Modimo, ntlo ya go se agwe ka diatla, e tlogo ba ya neng le neng ya kua legodimong. ₂Re tseba le gore ge re sa le mokutwaneng wo, re fegelwa re hlologetšwe go apešwa tša kua legodimong; ₃Re se ke ra hwetšwa re hlobotše, re hwetšwe re apere. ₄Go bjalo, ge re sa le mošašeng wo, re sa fegelwa re imetšwe ka ge re sa rate go apolwa; re rata go fo apešwa gore se se hwago se metšwe ke bophelo. ₅Gomme e a re lokišeditšego fao ke Modimo, e a re beeleditšego ka Moya.

₆Bjale re dula re betile pelo, re tseba gore re ba Morena, le ge re sa agile mmeleng. ₇Gobane re itshepelela re dumela re sa bone. ₈Ke re: Re betile pelo re hlologetšwe gagolo go khuduga fa mmeleng, le go yo goroga Moreneng. ₉Ke ka baka leo re phegelelago go mo kgahla gohle, e ka ba ge re gorogile, le ge re sa le ba go tlo khuduga. ₁₀Gobane ka moka ga rena re swanetše go bonala pele ga sedulo sa kahlolo sa Kriste, gore mang le mang a tšee tše a itiretšego tšona a sa le mmeleng, e ka ba tše botse, e ka ba tše mpe.

₁₁Bjale, ka gobane re tseba go boifa Modimo, re leka go kgodiša batho. Ge e le pele ga Modimo ga ra utagala; gomme ke holofela gore le lena ka dipelong tša lena le re lemogile. ₁₂Ga re boeletše go ipolelela; re le anegela tše le kago fadiša rena ka tšona, la botša bao ba go kgantšha difahlogo, ka pelong go se selo. ₁₃Ge e ka ba re išitše kgole, e be e le go direla Modimo; ge re boletše ka tlhaologanyo, e be e le go direla lena. ₁₄Gobane re gapeletšwa ke lerato la Kriste, gomme re re: Ge yena a hwetše bohle e le o tee, gona go hwile bohle. ₁₅O hwile bakeng sa bohle, gore ba ba phelago ba se ke ba hlwa ba iphelela, ba phelele yena e a hwilego bakeng sa bona mme a tsoga bahung bakeng sa bona.

₁₆Bjale ga re sa tseba motho ka nama. Le ge Kriste re mo tsebile ka nama, bjale ga re sa mo tseba ka mokgwa woo. ₁₇Go bjalo, ge motho e le wa Kriste, e ba mmopša e mofsa. Tša kgale di ile; gomme šedi, tše di lego gona ke tše mpsha. ₁₈Gomme tšeo ka moka di tšwa go Modimo, e a re boelantšego le yena ka Jesu Kriste, a re dira bahlanka ba yona poelano yeo. ₁₉Ka gobane ke Modimo e a boelantšego lefase le yena ka Kriste, a lesa go balela batho dikarogo tša bona mme foko la poelano yeo ke yena a le tsemilego mo gare ga rena.

₂₀Bjale re batseta bakeng sa Kriste, e ke re molomo wa Modimo ge re le eletša. Re kgopele bakeng sa Kriste re re: A nke le boelanywe le Modimo! ₂₁Yena eo a sa kago a tseba sebe, o mo dirile sebe bakeng sa rena, gore re tle re be ba tokafatšo ya Modimo ka yena.