2 JOHANE 1

₁Nna Mokgalabje ke ngwalela wena mohumagadi mohlaolwa le bana ba gago ba ke ba ratago ka go rereša; gomme ga se nna fela, le ratwa ke bohle ba ba tsebago therešo. ₂Re ratana ka baka la therešo ye e dutšego e le mo go rena; mme e tlo dula e na le rena go ya go ile.

₃A nke le be ba go gaugelwa le go šokelwa le go khutšišwa ke Modimo Tatawešo le Jesu Kriste Morwa wa Tatagwe; di le tlele ka thereso le ka lerato.

₄Ke thabile gagolo ka ge mo baneng ba gago ke hweditše ba ba swerego tsela ya therešo ka molao wo re o neilwego ke yena Tatawešo. ₅Gomme bjale ke a go kgopela, wena mohumagadi, e sego ka go re ke go ngwalela molao o mofsa; ke molao wo re bego re na nawo go tloga mathomong, o re re ratane. ₆Gomme lerato ke lona leo la gore re fele re eya ka melao ya gagwe. Molao e sa le wola le o kwelego mathomong gwa thwe le sware ka tsela ya wona.

₇Gobane lefaseng le go tsene baaroši, ba ba sa emego ka la go re: Jesu Kriste o tlile a ba motho. Motho e a sa emego ka lentšu le ke yena molwalekriste. ₈Phafogang gore le se timelelwe ke se rena re se dirilego; sa rena e tle e be go bona moputo wo o tletšego.

₉Motho e a rego ke eketša thuto, mme a se eme ka thuto ya Jesu Kriste, ga a na Modimo. E a emago ka thuto ya Kriste, o na le Tatawešo, mme le Morwa wa gagwe o na nae. ₁₀Motho e a kago tla go lena, mme a se tliše thuto ye se mo amogeleng ka gae, le lese le go mo dumediša. ₁₁Gobane e a kago re: Thabang, a era motho eo, o ikopanya le mediro e mebe ya gagwe.

₁₂Le ge ke sa na le tše ntši tša go le ngwalela, ga ke rate go dira ka matlakala le ka pilwana. Se ke se holofetšego ke go tlo ba le lena, ka tla ka bolela le lena ka molomo, gore thabo ya rena e tle e be e tletšego.

₁₃Bana ba ngwaneno yola wa mohlaolwa ba a go dumediša. Amene.