3 JOHANE 1

₁Nna mokgalabje ke ngwalela wena Gayo morategi yo ke mo ratago ka makgonthe.

₂Morategi! Ke go belaelela go letlegelwa ke tšohle le go phela o thabile, bjalo ka ge o letlegetšwe ke tša moya. ₃Gobane ke be ke fela ke thaba gagolo ge bana ba borena ba fihla, mme ba go hlatsela therešo ka mo o swerego ka tsela ya therešo. ₄Nna ga ke na lethabo le le fetago leo la ge ke kwa gore bana ba ka ba swere tsela ya therešo.

₅Morategi! O botegile ka tšohle tše o di diretšego bana bešo, wa di direla le ba mohuta o šele. ₆Ba go hlatsetše le lerato ba lebane le phuthego. E tlo ba go setša ka mo go swanetšego ba Modimo ge o ka ba thuša go iša pele leeto la bona. ₇Gobane ba wetše tsela ba direla ina la gagwe, gomme bantle ga ba ba fe selo. ₈Batho ba babjalo go swanetše ge re ba amogela, gore re be bathuši modirong wa therešo.

₉Phuthego ke e ngwaletše lengwalo; fela Dioterefe, e a ratago go ba mogolo wa bona, ga a re amogele. ₁₀Ge ke etla ke mo ke tlogo mo gopotša mediro ye a e dirago ka go re phara ka dipolelo tše mpe; a se dire tšeo fela, a tloga a gana go amogela bana ba borena; mme bao ba ratilego go ba amogela a ba thibela, a ba raka phuthegong.

₁₁Morategi! O se ke wa etša ba babe, etša ba bolo. Modirabolo o tšwa Modimong; modirabobe ga a ešo a bona Modimo.

₁₂Ge e le Demetrio, bohle ba mo hlatsetše gabotse; le yona therešo e a mo emela. Le rena re dihlatse; gomme o a tseba, bohlatse bja rena ke go rereša.

₁₃Ke be ke sa na le tše ntši tše nka bego ke go ngwalela tšona; fela, ga ke rate go go ngwalela ka pilwana le ka kwadi. ₁₄Se ke se holofetšego ke go re ke tlo tloga ke go bona, ra tlo kgona re boledišana ka melomo.

₁₅A khutšo e be le wena.

Bagwera ba gago ba a go dumediša. Dumediša bagwera ba rena ka go ba bitša ka maina ka o tee ka o tee.