Tshokologo ya Paulo. Maeto a Petro
1Ge e le Saulo o be a sa fela a galefile, a rata go tšhošetša le go bolaya barutiwa ba Morena. A ya go moperisita e mogolo. 2A mo kgopela a fiwa mangwalo a go ya diphuthegong tša Damaseko, gore ge a ka hwetša ba bangwe ba e lego ba thuto ye, goba banna, goba basadi, a ba tleme a ba tliše Jerusalema.
3A sa le leetong, a šetše a batamela motse woo wa Damaseko, a tšhoga seetša se se tšwago legodimong se mo phadimela ka mešo e go fela. 4A wela fase, a kwa lentšu le bolela nae le re: Saulo! Saulo, o ntlhomaretšeng?
5Saulo a re: Ke wena mang? Morena!
Morena a re: Ke nna Jesu yo o mo hlomerego. Go raga seotledi go tlo go thatafalela. 6Saulo, a swerwe ke go roromela a tšhogile, a fetola a re: Morena, o rata ge ke dirang? Morena a re: Tsoga, o tsene motseng; moo o tlo botšwa se o swanetšego go se dira.
7Banna bao ba bego ba sepela le yena, ba be ba eme ba itše tuu; gobane lentšu ba be ba le kwele ba se bone motho. 8Saulo a tsoga fase, mme ge a ponyolla mahlo a se bone selo; ba mo hlahla ka seatla, ba mo iša motseng wa Damaseko. 9A hlwa matšatši a mararo a sa bone, a sa je, a sa nwe. 10Gomme motseng wa Damaseko go be go na le morutiwa e mongwe; leina la gagwe ke Anania. Morena a bolela le yena ponong a re: Anania!
Yena a re: Ke nna e, Morena.
11Morena a re: Tsoga, o ye mokgotheng wo ba rego ke mokgotha wa go loka; ngwakong wa Juda o botšiše motho e a bitšwago Saulo wa Tareso; gobane šoo o a rapela. 12Mo ponong o bone monna e a bitšwago Anania, a tsena a mmea seatla gore a foufologe.
13Anania a fetola a re: Morena, ke kwele ba bantši ba bolela monna eo, ka mo a dirilego ba bakgethwa ba gago gampempe kua Jerusalema. 14Le gona baperisita ba bagolo ba mo file maatla a gore le motseng wo a tleme bohle ba ba rapelago leina la gago.
15Morena a re: Yaa go yena; gobane monna eo ke mo hlaotše gore a be sebja sa ka sa go iša ina la ka go bantle, le go magoši, le go Baisiraele. 16Gobane nna ke tlo mmontšha ka mo a swanetšego go tlaišega ka baka la leina la ka.
17Anania a ya, a tsena ngwakong woo, a mmea diatla a re: Saulo! Ngwanešwana! Morena o nthomile, yena Jesu e a iponaditšego go wena tseleng o sa tla; o nthomile gore o boele o bone, o tlatšwe Moyamokgethwa. 18A sa realo, mahlong a Paulo gwa khumoga dilo tše e kego ke makgapetla, mme a boela a bona. 19A tsoga a kolobetšwa; a ja dijo, a tielela.
A dula le barutiwa ba moo Damaseko a fetša matšatši. 20E sa le semeetseng a thoma go ema diphuthegong, a ruta a re: Jesu ke yena Morwa-Modimo.
21Ba ba mo kwago ka moka ba tšhoga ba re: A ga se yena a bego a šuhla ba ba rapelago leina leo kua Jerusalema? A ga se yena wa go tlela go ba tlema le go ba iša go baperisita ba bagolo?
22Saulo yena maatla a gagwe a fela a tielela, a tlaba Bajuda ba Damaseko, ba šitwa go mo fetola ge a ba hlalosetša gore Jesu ke yena Kriste.
23Ge go fetile matšatši, Bajuda ba mo lakana, ba rata go mmolaya. 24Saulo a sebelwa gore ba mo laletše; gobane le dikgoro ba be ba di diša bošego le mosegare, gore ba mmolaye. 25Barutiwa ba mo tšea e le bošego, ba mo sediša morako wa motse, ba mo fološa a le ka sešegong.
26Mohla Saulo a tlile motseng wa Jerusalema, a leka go kopana le barutiwa. Bona ba mmoifa bohle, ba sa dumele ge e ka ba morutiwa. 27Baranaba a mo amogela, a mo iša go baapostola, a ba laodišetša ka mo Saulo a bonego Morena tseleng, le ka mo a rutilego ka leina la Jesu ka mafolofolo kua motseng wa Damaseko. 28Saulo a dula le bona, a sepela motseng wa Jerusalema a fela a tsena a etšwa le bona, a ruta ka leina la Morena Jesu. 29A ba a fetolana le ba mmolelo wa Bagerika; mme bona ba mo lalela gore ba mmolaye. 30Bana babo ba barutiwa ba ba lemoga; ba felegetša Saulo ba mo iša motseng wa Kesarea, ba mo fetetša pele a ya Tareso.
31Phuthego ya nageng ka moka ya Juda le ya Galilea ya khutša, ya agišwa e eya ka tsela ya go boifa Morena, go emelwa ke Moyamokgethwa go tletše mo go yona.
32Ya re ge Petro a le tseleng ya go ba etela bohle, a tla le go bakgethwa ba ba bego ba agile motseng wa Lida. 33Gona moo a hwetša motho yo ba rego ke Enea, a feditše nywaga e seswai a le dilaong a rephile ditho. 34Petro a bolela nae a re: Enea, Jesu Kriste o a go fodiša. Tsoga o ikalele ka noši. Enea a napa a tsoga. 35Ka moka ba ba agilego Lida le Sarona ba mmona, ba sokologa ya ba ba Morena.
36Motseng wa Jope go be go na le morutiwa e mongwe; leina la gagwe ke Tabitha, ke gore Doroka (Tshephe). Mediro e mebotse ya gagwe e be e le e mentši; le go hlallela badiidi ka kgaugelo e le mo gontši. 37Mehleng yeo a babja a hwa; ba mo hlatswa ba mmea ngwakong wa ka godimo. 38Bjale, ka ge motse wa Lida o le kgauswi le wa Jope, mme barutiwa ba kwele gore Petro o tlile moo, ba roma banna ba babedi, ba ya ba mo rapela ba re a se ke a diega go kgaoletša go bona. 39Petro a tsoga, a tla go bona; a re a sa fihla ba mo iša ngwakong wa godimo; mme basadi ba bahlologadi ba tla ba ema moo ba lla; ba laetša Petro dikobo le diaparo tše Doroka a di dirilego a sa na le bona. 40Petro a ba ntšhetša ntle bohle, a khunama ka matolo a rapela; a fetogela go setoto, a re: Tabitha, tsoga! Tabitha a ponyolla mahlo; a re go bona Petro, a tsoga a dula. 41Petro a mo swara ka seatla a mo emiša. A bitša bakgethwa le bahlologadi bala, a mo tliša go bona a phedile. 42Taba ye ya kwala motseng ka moka wa Jope; mme ba ba dumelago Morena ya ba ba bantši. 43Petro a dula a fetša matšatši a le motseng wa Jope, a le lapeng la motho e a bitšwago Simone mošogi wa mathebo.
