HOSEA 6

₁Tlang re boeleng go Morena! Ke yena a re garolantšego; mme ke yena a tlogo re fodiša. Ke yena a re gobaditšego; mme ke yena a tlogo re fapa. ₂Go tlo re go feta matšatši a mabedi, a re phediša; ka la boraro o tlo re emiša, gore re phele pele ga gagwe. ₃A re phafogeng re phegelele go mo tseba, yena Morena; go tleng ga gagwe o etša mahuba matlakanako. O tlo re tlela boka pula, bjalo ka tsheola ge e kolobiša naga.

₄Hee Efuraimi! Nka go dira bjang? Hee Juda! Nka go dira bjang? Gobane lerato la gago le bjalo ka mouwane ge go esa, le etša phoka e tlogago ge le hlaba. ₅Ke tšona tše ke bego ke le otla ka baka la tšona ka baporofeta, ka le bolaya ka polelo tša molomo wa ka, tsheko ya le tlela boka seetša. ₆Gobane se se kago nkgahla ke lerato, ga se didimo; go tseba Modimo go nkgahla go fetiša sehlabelo.

₇Fela, ba senya kgwerano ka mokgwa wa batho, ge ba ntlhanogela. ₈Gileada ke legae la basenyi, go tletše nao tša ba gatilego madi. ₉Sekgao sa baperisita se etša sephohla sa bahlakodi; ba bolaya batho mo tseleng ya go ya Sikeme; ba dira tša bohlola. ₁₀Mo nywakong ya Isiraele ke bona tše di šiišago; ke hwetša Efuraimi a dira bootswa mme Isiraele a itšhilafatša.

₁₁Le wena Juda o beetšwe puno ya mohla ke tlogo buša mathopša a setšhaba sa ka.