JESAYA 16

₁Tlišang dibego go mmuši wa naga, di tšwe maribeng ka tsela ya lešoka, di tle mo thabeng ya morwedi wa Tsione. ₂Gobane banenyana ba Moaba ba tlo etša dinonyana tše di tšhošitšwego, mafotwana a sa tšwago go fofišwa, ge ba sela Arinoni.

₃Ke: Nkeletšeng! Nnamoleleng! Moriti wago a o ke bošego e le mosegare! Uta ba hlomarwago! Se eke batšhabi! ₄Lesa ba gešo ba go lelekwa kua Moaba ba diilele fa ga geno, o ba šegele babolai!

Gobane tšhwalalanyo e tlo fela ge babolai ba fedišwa, ge bahlakišabatho ba široga mo nageng. ₅Go tlo bewa dulo sa bogoši ka kgaugelo. Mo go sona go tlo dula moahlodimmotegi ntlong ya Dafida. Yena eo o tlo ya ka molao, o tlo phegelela toko.

₆Tša letšeke la Moaba re di kwile a ikgodišitše kudu, a ikgogomoša a ipota, a na le mahlahlo a se na mokayena.

₇Bjale Moaba llela Moaba; bohle ba a lla. Le hlologetšwe makwape a Kiri-Heresethe, la nyamela ruri. ₈Gobane mašemo a kua Hesšiboni a omile; ke merara ya Sebima ye dienywa tša yona tše botse di fentšego beng ba batho, ye e bego e fihlela kua Jasere e putlile lešoka, menamo ya yona ya nama ya ba ya sela lewatle. ₉Ke llela tšona tšeo gotee le Jasere. Joo, morara wa Sebima, ke go nošetša ka megokgo ya ka. Ke llela Hesiboni le Eleale, gobane mokgoši o le hlagetše le buna le fula dienywa. ₁₀Bjale mašemong go tlogile thabo le tlhalalo; merareng ga go sa na dikoša le mekgolokwane; go hlokwa le bafotli ba morara; megoo ya bona ke e ripile. ₁₁Ke ka baka leo pelo ya ka e llago bjalo ka lekope e llela Moaba; pelo ya ka e llela Kiri-Herese. ₁₂Le ge Moaba a ka bonwa ge a itapiša mo serwaolong, ge a tsena ntlong e kgethwa yagwe a rapela, a ka se ke a kgona selo.

₁₃Ke lona lenšu la mohlamomene le Morena a le boletšego a era Moaba. ₁₄Le Morena a le boletšego bjale šele: E tlo re ge go fetile nywaga e meraro, e etšago nywaga ya mothwalwa, ke mo letago la Moaba le tlogo nyatšega, le ge dilete tša gona e le tše di ntši; ba ba tlo go šala e tlo ba ba sego kaenyana!