JAKOBO 2

₁Bana bešo! Tumelo ya go dumela Jesu Kriste Mong wa rena wa letago, ga le nayo ge le sa fela le beba batho. ₂Ge phuthegong go tsena monna wa dipalamonwana tša gauta a apere tše di phadimago, gwa tsena le modiitšana wa kobo e tšhilafetšego, ₃mme la bona eo wa diaparo tše di phadimago la re: Wena dula fa gabotse, mme modiitšana la bolela nae la re: Ema moo, goba la re: Dula fa fase bogatong bja nao tša ka! ₄a e ka se be go re le bebile batho? A ga se go re le baahlodi ba kgopolo tše mpe?

₅Kwang, lena bana bešo barategi! A Modimo ga a ka a ikgethela badiitšana ba lefase ya ba bona bahumi tumelong le baji ba bohwa bja mmušo wo a o holofedišitšego ba ba mo ratago? ₆Mme lena le nyaditše modiitšana. A bahumi ga se bona ba go le gogela ditshekong? ₇A ga se bona ba ba nyatšišago ina le lebotse leo go ipolelwago ka lona mo go lena?

₈Bjale ge le phetha molao e lego wona mong a melao ge re ya ka Mangwalo, molao wo o rego: Wa geno o mo rate ka mokgwa wo o ithatago ka wona, la dira gabotse fao, ₉la tloga la beba batho difahlogo, le dira sebe fao, mme Molao fao o le sola boka baarogi. ₁₀Gobane e a yago ka melao yohle, a tla a senya o tee, o obile molato go Molao wohle. ₁₁Gobane e a itšego. O se ke wa otswa, ke yena e a itšego: O se ke wa bolaya! Bjale ge o se seotswa, wa tla wa ba mmolai, o mosenyi wa Molao. ₁₂Bolelang ka mokgwa woo, le dire ka mokgwa woo, ka ge le le ba go tlo sekišwa ka molao wa khunologo. ₁₃Gobane tsheko ga e gaugele eo wa go se gaugele; gomme kgaugelo ke yona e fenyago tshekong.

₁₄Bana bešo! Go holang ge motho a ka re o na le tumelo, mola a se na mediro? A tumelo yeo e ka mo phološa? ₁₅Ge ngwaneno, le ge e le kgaetšedi, e ka ba o hlobotše, a hloka dijo tša mohla woo, ₁₆mme e mongwe wa lena ge a ka tla a re: Sepelang ka khutšo, le yo apara, le yo hora, mme la lesa go ba fa se se hlokwago ke mebele ya bona, go ka be go ba holang? ₁₇Le tumelo ge e le ya mohuta woo, ge e se na mediro, e ikhwetše ka noši.

₁₈Ge go ka ba le e a rego: Wena o na le tumelo nna ke na le mediro, ntaetše tumelo ya gago e se nago mediro, nna ke go laetše ya ka tumelo ka mediro. ₁₉A o re o dumela ge Modimo e le o tee? O dira gabotse; fela, le meoya e mebe e dumela fao ya roromela. ₂₀Gomme wena motho wa lefela, a o rata go tseba gore, tumelo ge e se na mediro e ikhwetše? ₂₁Šoo Aborahama tata wešo; a ga a ka a lokafala ka mediro mola a bea Isaka morwa wa gagwe aletareng? ₂₂Ke mo o bonago gore tumelo e dirišana le mediro ya gagwe, tumelo ya tlala ka mediro. ₂₃Ke gona moo go diregilego tše di ngwadilwego tša re: Aborahama o dumetše Modimo, Modimo a mmalela tumelo a re ke yona toko, mme Aborahama a bitšwa moratiwa wa Modimo. ₂₄Ke mo le bonago gore motho o lokafala ka mediro, e sego ka tumelo e nnoši.

₂₅Le go Rahaba mosadi yola wa seotswa go dutše bjalo. A ga a ka a lokafala ka modiro ge a amogela batseta bala, mme a ba ngwegiša ka tsela e šele?

₂₆Boka mmele ge e le o hwilego ge o se ne moya, le yona tumelo e hwile ge e se ne mediro.