Baisiraele ba fenywa ke Bamidiani. Gideoni
1Baisiraele ba boela ba dira tše di befelago Morena; Morena a ba gafela diatleng tša Bamidiani nywaga e šupago. 2Baisiraele ba robja ke matsogo a Bamidiani, ba itirela mariba dithabeng, le mefoma, le dibo tša go tšhaba Bamidiani. 3E be e re ge Baisiraele ba lemile, go rotoge Bamidiani le Baamaleke le Matšwabohlabela, ba ba wela godimo, 4Ba ba bokanele, ba senye dikenyo tša naga go goma ka la Gasa, ba se šadišetše Baisiraele dijo, le ge e le sehuswana, goba pholo, goba pokolo. 5Ka gobane ba rotoge ka mehlape ya bona, le mešaša ya bona, ba tle e le bontši boka tšie, ba na le dikamela tše di sa balwego, ba tsena naga ba e senya. 6Baisiraele ba fokodišwa o šoro ke Bamidiani ka mokgwa woo, ba ba ba hlabela Morena mokgoši.
7Ya re ge ba hlabetše Morena mokgoši ka baka la Bamidiani, 8Morena a roma monna wa moporofeta, a tla go Baisiraele, a ba rera a re: Morena Modimo wa Isiraele o re: Ke nna ke le rotošitšego, la tšwa Egipita ke le ntšhitše ngwakong wa bohlanka. 9Ka le namolela mo diatleng tša Baegipita, le mo diatleng tša bohle ba ba bego ba le beka; ke ba lelekile ge le fihla, ka le nea naga ye ya bona, 10gomme ke le boditše ka re: Modimo wa lena ke nna Morena; le se ke la boifa medimo ya Baamoro, ba le dutšego nageng ya bona. Fela, le gana go kwa se ke se bolelago.
11Gwa tla Morongwa wa Morena, a dula fase moruleng wa kua Ofura, e bego e le wa Joase morwa wa Abiesere; gomme Gideoni morwa wa gagwe o be a fola mabele lwaleng, gore a a tšhabiše ge go tla Bamidiani. 12Ke yena a bonego Morongwa eo, a mo kwa a re: Morena o na nago, wena monna yo bogale.
13Gideoni a fetola a re: Mong wa ka hle, ge Morena a na le rena, dilo tše ka moka ke ka baka lang di re Tšwelelela? E kae mehlolo yela ya gagwe yohle, ye botatawešo ba re boditšego tša yona ba re: Ke Morena e a re rotošitšego ra tla fa re etšwa Egipita? Ga e le bjalo o re lahlile; o re gafetše diatleng tša Bamidiani.
14Bjale Morena a retologela go yena a re: Sepela o ne maatla ona a a gago o namolele Isiraele diatleng tša Bamidiani; ke nna ke go romago.
15Gideoni a re: Awoii Mong wa ka! Ke tlo namolela Isiraele kang? Etšwe leloko lešo e le lona le lenyenyane mo go Bamanase, le nna ke le yena e monyenyane mo kgorong ya tatawešo!
16Morena a re: Ke tlo ema nago, wa tlo fenya Bamidiani bjalo ka e ke ke go fenywa monna o tee.
17Gideoni a re: Ge ka kgonthe o ntebeletše ka botho, gona mpeele seka ke bone ge e le wena o bolelago le nna. 18O se ke wa tloga fa, ke be ke boe ke go tlele le sebego sa ka ke se bee fa pele ga gago.
Morena a fetola a re: O tlo nkhwetša fa ge o boa.
19Gideoni a ya a hlaba putšanyana, a tšea bupi a dira dinkgwana tše di sa omelwago, a fakela dinama serotong, a tšhela moro moruswing, a di tliša go yena gona moo moruleng, a di bea fase. 20Morongwa wa Morena a mo rera a re: Tšea dinama le dinkgwana tše, o di bee fao lwaleng, o di tšhele ka moro. Gideoni a dira ka mokgwa woo. 21Morongwa wa Morena a iša lehlotlo le a bego a le swere a kgotla dinama le dinkgwana ka ntlha ya lona; ke mo go tšwelego mollo mo lwaleng wa fiša dinama le dinkgwana tšeo. Ya ba gona Morongwa a širelago mahlong a gagwe.
22Ke mo Gideoni a lemogilego gore e be e le Morongwa wa Morena; a re: Joo-nnaa! Mong wa ka Morena, ke bone Morongwa wa Morena ra lebanya difahlogo!
23Morena a mo rera a re: Bea pelo! O se ke wa boifa! O ka se ke wa hwa. 24Gideoni a napa a agela Morena aletare gona moo, a e rea leina la “Morena Mompeapelo”. Le bjale e sa le gona moo Ofura ga Abiesere.
25Ka bjona bošego bjoo Morena a mo rera a re: Ntšha powana ya tatago, ke ra poo ya bobedi ya nywaga e šupago; O phušole aletare ya Baali ya tatago, o reme le kokwane ya medimo e lego moo. 26Gomme o agele Morena Modimo wa gago aletare gona mola sehlweng sa thaba ye, o e hlophe ka mokgwa wa yona; O tle o tšee poo yela ya bobedi o direle Morena sehlabelo ka dikgong tša kokwane ya medimo, ye o tlogo e rema. 27Gideoni a bitša banna ba lesome ba bahlanka ba gagwe, a dira ka mo Morena a mmoditšego ka gona; a se dire e le mosegare, ka gobane a boifa ba gabobona le batho ba motse; a dira e le bošego.
28Banna ba motse ge ba tsoga ka moswana, ba bona aletare ya Baali e phušotšwe, kokwane ya medimo ya gona e remilwe; poo yela ya bobedi e hlabetšwe aletareng e agilwego moo. 29Ba botšana ba re: Dilo tše di dirilwe ke mang? Ya re ba latišitše, ba tsomišitše, ba re: Taba ye e dirilwe ke Gideoni morwa wa Joase. 30Banna ba motse ba botša Joase ba re: Ntšha morwa wa gago, a bolawe, ka gobane o phušotše aletare ya Baali, a rema le kokwane ya medimo ya gona moo.
31Joase a bolela le bao bohle ba bego ba eme moo, a re: Afaea Baali ke wa go lwelwa ke lena, le wa go namolelwa ke bolena naa? E a ka rego ke a mo lwela, a a bolawe e sa le bosasa bjo, ka ge Baali e le modimo wa go itwela ka nnoši; ka gobane se se phušotšwego ke aletare ya gagwe. 32Mohlang woo ba mo reile leina la Jerubaali, ke go re “Baali a a lwe” ka gobane go phušotšwe aletare ya gagwe.
33Bamidiani ka moka le Baamaleke ba na le Matšwabohlabela ka moka, ba bokana ba sela noka, ba hloma mešaša molaleng wa Jeseriele. 34Ke mo moya wa Morena o swerego Gideoni, a letša phalafala a rapa ba ga Abiesere gore ba mo phalalele. 35A roma batseta ba ya go bohle ba ga Manase, le bona ba mo phalala. A roma batseta ba ya go ba ga Asere, le go ba ga Sebulone, le go ba ga Nafutali, ba rotoga ba tla go yena.
36Gideoni a rapela Modimo a re: Ge o rata go namolela Isiraele ka seatla sa ka ka moo boletšego ka gona. 37Gona lesa ke bee mokgopa wa boya mo seboeng; e tlo re ge phoka e ka wela mokgopeng fela, naga ka moka ya šala e omile, ke mo ke tlogo tseba gobane o tlo namolela Isiraele ka seatla sa ka ka mokgwa wo o mpoditšego ka wona. 38Gomme gwa ba bjalo; a tsoga e sa le bosasa, a gamola mokgopa, moruswi wa tlala ka meetse a phoka. 39Gideoni a buša a rapela Modimo a re: A nke o se mpefelelwe ge ke bolela gatee fela, ge ke sa leka gatee fela ka mokgopa wo; a mokgopa o šale o omile o nnoši, phoka e wele naga ka moka. 40Modimo a na a dira bjalo bošego bjoo; mokgopa wa šala o omile; naga ka moka ya welwa ke phoka.
