JOBO 22

₁Gwa fetola Elifase wa Thema a re: ₂A motho o hola Modimo? Moeletšegi o a itshetša. ₃A o re ge o thakga o hola Yomaatlakamoka? A o re tsela tšago ge di loka go tlo huma yena? ₄A re o go sola ka ge o mmoifa, a go iša kahlolong ka baka leo? ₅A ga se gobane go atile bobe bjago, le ka boati bja masenyi ago? ₆O be o swarelela motho weno a se ne molato, o be o apola bahloki dikobo. ₇Wa malapi wa mo kuna meetse, wa tlala wa mo tima dijo. ₈Gomme naga ya ba ya monna yo bogale, ya dulwa ke lehumagadi. ₉Bahlologadi wa ba raka ba le fela, wa roba dišuana matsogo. ₁₀Ke tšona di go dikišago ka malokwa, wa tšhoga o wetšwe ke poifo. ₁₁A o dirwa ke leswiswi o sa bone? O tšerwe ke mafula a meetse? ₁₂A Modimo ga se yena yo godimodimo godimong? Lebelela dinaledi di gomago kua tletlolo. ₁₃A o ka re: Modimo o tsebang? Goba wa re: O ahlola a širilwe ke boso bja maru? ₁₄Wa re: Maru a mo apešitše, ga a bone? Wa re: O itshepelela kua go lego thetebudi ya leratadima? ₁₅A o rata go tšea ka tsela ya kgale e bego e swerwe ke batho ba babe? ₁₆Ke bona ba ba lobilego lebaka la bona le sešo la fihla; metheo ya bona ya tloga le meetse. ₁₇Ke bona ba go re: Modimo, tloga fa go rena! Ba re: Yomaatlaohle o re dira eng? ₁₈Mola e le yena a tlatšago nywako ya bona tše botse, -- a kakanyo ya babe e be kgole le nna. -- ₁₉Baloki ba di bona mme ba thaba; e a se nago molato a ba sega. ₂₀Ba re: Go fedišitšwe ba ba bego ba re hloya; le mašalela a bona a llwe ke mollo. ₂₁Boelana le yena, o tle o letlege, mme o boelwe ke tše dibotse. ₂₂Amogela thuto ye e tšwago molomong wa gagwe; mme mantšu a gagwe o a boloke pelong. ₂₃Ge o ka boela go Yomaatlaohle, o tlo buša o agiwa, ge bobe mo lapeng la gago o bo lahla kgole. ₂₄Lehumo la gago le akgele leroleng, le la Ofira o le lahle magakabjeng a noka. ₂₅Ke mo Yomaatlaohle a tlogo ba humo lago letlotlo la bohlokwa lago, ₂₆mo o tlogo thabela Yomaatlakamoka, wa tlo emiša sefahlogo wa lelalela go Modimo. ₂₇O tlo loga mo kgopela mme a go kwa, wa kgona go phetha dikeno tša gago. ₂₈O tlo loga maano, a go kgonegela; mo tseleng tša gago go tlo ba le seetša. ₂₉Ge di iša tlase, o tlo re ke go ya godimo, gobane o phološa ba ipoetšago. ₃₀O tlo hunolla le yo a nago le molato; o tlo hunologa ka ge tša gago diatla di se na ditšhila.