MATEO 11

₁Eitše ge Jesu a feditše go laela barutiwa ba gagwe ba lesome le metšo e mebedi, a tloga moo a yo goelela a ruta batho metseng ya bona.

₂Gomme Johane a le kgolegong, a kwa go bolelwa mediro ya Kriste, mme a roma ba babedi ba barutiwa ba gagwe. ₃A botšiša Jesu a re: A ke wena e a boletšwego a thwe: O etla? Goba re sa letela e mongwe?

₄Jesu a fetola a re: Yang, le tsebiše Johane tše le di kwago le tše le di bonago. ₅Difofu di a bona; dihlotša di a sepela; ba lephera ba a fodišwa; difoa di a kwa; bahu ba a tsoga; mme bahumanegi ba begelwa taba tše botse. ₆Mme le mmotše le re: Wa lehlogonolo ke eo a sa kgopjego ka nna.

₇Ya re ge bao ba sepela, Jesu a thoma go bolela le mašaba a batho tša Johane, a re: Le be le tšwetše šokeng go bogang? A le be le bona lehlaka le le tšokotšwago ke phefo? ₈Ke re le be le tšwetše go bonang? A le be le bona motho moaparatšeboleta? Baapari ba tše boleta šebala nywakong ya dikgoši. ₉Ke re, le be le tšwetše go bonang? A le be le re le bona moporofeta? Ka kgonnthe! Ke a le botša; Ke e a fetago le moporofeta. ₁₀Gobane ke yena e a ngwadilwego a thwe: Ke nna e! Ke roma motseta wa ka wa go Go eta pele a go thulela tsela. ₁₁Ruri ke a le botša, mo go ba ba belegwego ke basadi ga go ešo gwa tsoga e mongwe e a fetago Johane Mokolobetši; fela yo e lego e monyenyane mmušong wa magodimo o a mo feta. ₁₂Go tloga mehleng ya Johane Mokolobetši, le bjale, mmušo wa magodimo o tsenwa ka bogale; mme bagale ke bona ba o thopago. ₁₃Gobane baporofeta ka moka, le wona Molao, ba be ba porofeta ba goma ka Johane. ₁₄Gomme, ge le rata go amogela lentšu le, ke yena Eliya, yo a bego a thwe o tlo tla. ₁₅E a nago le ditsebe tša go kwa, a a kwe.

₁₆Fela ba mehla yeno ke tlo ba swantšha kang? Ba swana le bana ba ba dutšego lepatlelong, ba biletšana le dithaka tša bona ba re: ₁₇Re le leleditše naka, la gana go bina; ra le hlabela sello, la gana go golola. ₁₈Gobane Johane o tlile a ikona go jeng le go nweng, mme ba re: O ne moya o mobe. ₁₉Gwa tla Morwamotho, a ja, a nwa; ba re: Bonang, motho wa sejato wa monwi, mogwera wa ba lekgetho le badiradibe. Gomme bohlale bo bonala ka bana ba bjona.

₂₀Mehleng yeo Jesu a thoma go kgalema metse yeo a dirilego ditiro tše ntši tše matla mo go yona, ka gobane e sa ka ya sokologa, a re: ₂₁Joo Koratsima joo! Joo Betsaida joo! Mediro e matla ye e dirilwego mo go lena ge e ka be e dirilwe motseng wa Tiro le wa Sidone, e ka be e sokologile kgale, e apere mankgeretla, e dutše meloreng. ₂₂Ke fetša ka go le botša gore, tša Tiro le Sidone mohla wa kahlolo e tlo ba tše kaone go tša lena. ₂₃Le wena Kaperenaume, o phagamišitswe wa goma ka legodimo; mme o tlo theošetšwa kwa bodulabahu; gobane ditiro tše matla tše di dirilwego go wene, ge e ka be di dirilwe motseng wa Sodoma, o ka be a sa le gona le lehono. ₂₄Ke fetša ka go le botša gore, ša naga ya Sodoma mohla wa kahlolo e lo ba tše kaone go tša lena.

₂₅Ka lona lebaka leo Jesu a bolela a re: Ke a go reta, wena Tate Mong a legodimo le lefase, ka gobane tšeo o di fihletše ba bohlale le ba tlhaloganyo mme wa di utollela ba e lego bana. ₂₆Go bjalo, Tate! Gobane ke tšona tše o di ratilego.

₂₇Tšohle di gafetšwe nna ke yena Tate; gomme ga go e a hlathago Morwa, ge e se Tate, le e a hlathago Tate, ge e se Morwa, le yo Morwa a ratago go mo utollela.

₂₈Tlang go nna bohle ba le lapišitšwego, ba le imelwago; nna ke tlo le khutšiša. ₂₉Le ithweše joko ya ka, le rutwe ke nna; gobane ke yo bolo le wa pelo e kokobetšego; mme le tlo hwetša khutšo ya meoya ya lena. ₃₀Gobane joko ya ka ga e robe, morwalo wa ka ke o bohwefe.