Melao ya batho, mosadi wa Mokanana, Jesu o horiša ba 4 000
1Mehleng yeo bamangwalo le bafarisei ba ba tšwago Jerusalema, ba tla go Jesu ba re: 2Barutiwa ba gago ba selelang molao le metlwae ya ba bagolo ba sa hlape diatla ge ba eja bogobe?
3Jesu a fetola a re: Le lena le selelang molao wa Modimo le eya ka metlwae ya lena? 4Gobane Modimo o laile a re: Godiša tatago le mmago; a buša a re: E a rogago tatagwe le mmagwe o tlo hwa lehu. 5Lena la tla la re: E a botšago tatagwe le mmagwe a re: Tše ke bego ke swanetše go le hola ka tšona ke di dirile sedimo, -- le re a ka lesa go godiša tatagwe le mmagwe. 6Le lahla molao wa Modimo, le eya ka metlwae ya lena. 7Baikaketšitenang! Jesaya o porofetile gabotse a era boena, ge a re: 8Setšhaba se se mpatamela ka legano, se ntheta ka melomo; mola dipelo tša bona di le kgole le nna. 9Gomme ge ba mpoifa, e fo ba lefela, ke thuto ya malayabatho.
10A bitša lešaba la mo kgobokanela, a bolela a re: Theetšang le kwišiše! 11Motho ga a tšhilafale ka se se tsenago ka ganong; o tšhilafala ka se se tšwago ka molomo.
12Barutiwa ba gagwe ba tla ba re: A o tseba gore bafarisei, ge ba ekwa se o se boletšego, ba kgopilwe?
13Jesu a fetola a re: Dibjalo ka moka tše di sa kago tša bjalwa ke Tate wa legodimong, di tlo tomolwa. 14Ba leseng. Ke difofu dihlahladifofu; gomme ge sefofu se hlahla sefofu, di tlo wela moleteng ka dipedi.
15Petro a fetola a re: O nke o re hlathollele šwantšho seo.
16Jesu a re: A le lena le sa fela le hloka tlhaologanyo? 17A ga lešo la lemoga gore tšohle tše di tsenago ka ganong di ya mpeng, mme tša tlo lahlwa ka tsela ya tšona? 18Ge e le tše di tšwago ka molomo di botoga pelong; mme ke tšona di tšhilafatšago motho. 19Gobane mo pelong ke mo go tšwago dikgopolo tše mpe, le dipolao, le ditlhalo, le maotswa, le bohodu, le bohlatse bja maaka, le maroga. 20Ke tšona tšeo di tšhilafatšago motho. Go ja ka diatla tše di sa hlapiwago ga go tšhilafatše motho.
21Jesu a tloga moo, a širogela dinageng tša Tiro le Sidone. 22Gwa tšwelela mosadi wa Mokanana wa mathoko ao, a goeletša a re: Nkgaugele, Morena Morwa-Dafida; ngwanenyana waka o hlakišwa mo gobe ke moya o mobe.
23Yena a se mo arabe le ka lentšu le tee. Barutiwa ba gagwe ba tla ba mo rapela ba re: O nke mo hunolle, gobane o re šetše nthago ka lešata!
24Jesu a fetola a re: Ga ka rongwa gošele ge e se go dinku tše di lahlegilego tša moloko wa Isiraele.
25Mosadi yola a fihla, a mo khunamela a re: Morena, nthuše!
26Jesu a fetola, a re: Ga go botse ge motho a tšea bogobe bja bana, a bo lahlela dimpjanyana.
27Mosadi a re: Go bjalo, Morena, gomme dimpjanyana di e di je marathana a waga majelong a beng ba tšona.
28Ke mo Jesu a fetotšego a re: Mosadi! Tumelo ya gago ke e kgolo; o nke direlwe tše o di ratilego. Gomme ngwananyana wa gagwe a fola go tloga ka yona nako yeo.
29Jesu a tloga felo fao a tla lewatleng la Galilea, a namela thaba a dula. 30Mašaba a mantši a batho a tla go yena; ba tla ba na le dihlotša, le difofu, le dimuma, le digole, le ba bangwe ba bantši; ba ba bea fase maotong a gagwe, yena a ba fodiša. 31Mašaba a tlabega ge e bona dimuma di bolela, digole di fodile, dihlotša di sepela, difofu di bona; mme ba reta Modimo wa Isiraele. 32Jesu a bitša barutiwa ba gagwe a re: Batho ba ke ba kwela bohloko gobane e šetše e le matšatši a mararo, ba ehlwa le nna ba se na se ba se llego. Gomme ga ke rate go ba laela ba sa na le tlala, ba se tlo lapa tseleng.
33Barutiwa ba gagwe ba fetola ba re: Magobe a go ka horiša lešaba le lekaakaa re tlo a bona kae mona lešokeng?
34A ba botšiša a re: Le na le dinkgwa tše kae?
Bona ba re: Ke tše di šupago, le dihlapi tše di sego nene.
35Ke mo Jesu a laetšego a re mašaba a bokane fase. 36A tšea dinkgwa tšeo tše šupago, le dihlapi tšeo, a leboga, a ngwatha a nea barutiwa, barutiwa ba nea mašaba. 37Ka moka ba ja ba hora; ba topa marathana a šetšego, a tlala diroto tše di šupago.
38Gomme ba ba llego e be e le banna ba dikete tše nne, go sa balwa basadi le bana. 39A laelana le mašaba, a namela le selwatle, a tla mathokong a Magdala.
