Tšhwalalanyo ya Jerusalema; go boa ga Morwa motho
1Ge Jesu a etšwa Ntlongkgethwa, a sa tloga moo, barutiwa ba gagwe ba tla go yena, ba mo šupetša meago ya Ntlokgethwa. 2Jesu a fetola a re: A ga le di bone dilo tše ka moka? Ruri, ke a le botša felo fa ga go leswika le le tlo go leswa le le godimo ga le lengwe le sa šuthišwa.
3Ya re ge a dutše thabeng ya mehlware, barutiwa ba gagwe ba bolela le yena thopeng, ba re: O ke o re botše; tšeo di tlo direga neng? O re botše le mahlola a re tlogo bona ka ona, ge go fihla maboo a gago le bofelo bja mabaka ano.
4Jesu a fetola a re: Le bone gore le se tlo forwa ke motho. 5Gobane ke ba bantši ba ba tlo go tla ka leina la ka ba re: Ke nna Kriste! Ba tlo fora ba bantši. 6Mohla le kwago dintwa le mekgoši ya dintwa, le bone gore le se tšhoge. Tše bjalo, di swanetše go ba gona; fela, ga se bjona bofelo. 7Gobane setšhaba se tlo tsogela setšhaba; mmušo o tlo tsogela mmušo; gomme go tlo ba le ditlala le dinkhu, le ditšhišinyego kua le kua. 8Tše ka moka e tlo ba ona mathomo a ditlalelo.
9Mehleng yeo ba tlo le gafela tlaišong; ba tlo le bolaya; le tlo ba ba go hloiwa ke ditšhaba tšohle ka baka la leina la ka. 10Mehleng yeo ba ba tlogo kgopjša e tlo ba ba bantši; ba tlo ekana, ba tlo hloyana. 11Go tlo ba le baporofeta ba bantši ba maaka ba go tlo fora ba bantši. 12Gomme ka go ata makgopo go tlo notlega lerato la ba bantši. 13E a tlogo tiišetša go fihla bofelong, ke yena a tlogo phološwa. 14Gomme Ebangedi ye ya mmušo wa magodimong e tlo goelelwa lefaseng ka moka gore e be bohlatse mo go ditšhaba tšohle; ya tlo ba gona bofelo bo fihlago.
15Ge le tlo bona makgapha a tšhwalalanyo, a a boletšwego ke Daniele moprofeta a eme felo gokgethwa (e a balago a a di phafogele), 16Gona ba ba lego nageng ya Judea ba tšhabele dithabeng; 17e a nametšego seokamo sa ntlo, a se ke a fologa a yo tšea selo mo ntlong ya gagwe. 18Le e a lego mašemong, a se ke a boela gae a yo tšea kobo ya gagwe. 19Ba madimabe mehleng yeo e tlo ba baima le ba ba amušago. 20Gomme le rapele gore motšhabo wa lena e se be wa lebaka la marega le wa letšatši la Sabatha. 21Gobane masetlapelo a mohla woo e tlo ba a magolo, a a sešogo a bonwa go tloga mola lefase le thoma go ba gona, a a ka se kego a ba gona le ka mohla o mongwe. 22Gomme ge mehla yeo e ka be e sa fokotšwe, go ka be go sa phologe motho. Fela, a tlo fokotšwa ka baka la bakgethwa.
23Mehleng yeo ge motho a le botša a re: Bonang, Kriste šoo, goba a re: Šoola, se dumeleng. 24Gobane go tlo tsoga boKriste ba maaka, le baporofeta ba maaka, ba tlo tšweletša mehlolo e megolo le matete, gore, ge go kgonega, ba fore le bona bakgethwa. 25Le tsebe gobane ke le boditše di sešo tša ba gona.
26Ke gona ge ba ka le botša ba re: Šoola; o kua lešokeng! Le se ke la tšwela gona. Ge ba ka re: Šo, o ka fa phapošing ya ngwako! Le se ke la dumela. 27Gobane maboo a Morwamotho a tlo ba bjalo ka legadima ge le hlaga bohlabela la gadimela le kua bodikela.
28Gomme mo go nago le setoto, ke mo go welago manong.
29E tla re ge masetlapelo a mehla yeo a sa tšo fela, ke mo letšatši le tlogo fifala, le kgwedi ya tlo lesa go etša; mme dinaledi di tlo wa legodimong, le maatla a legodimo a tlo šišinyega. 30Ke mo legodimong go tlogo bonala sefoka sa Morwamotho; mme merafo yohle ya lefase e tlo hlaboša sello, ge ba bona Morwamotho a etla a le marung a legodimo, a etla ka maatla le ka letago le legolo. 31Mme o tlo roma barongwa ba gagwe ka phalafala ya segalo se segolo, ba bokanya bakgethwa ba gagwe, ba tlišwa ba etšwa thoko tšohle tša lefase, le moo go rumago legodimo.
32Ithuteng go swantšha ka mogo. Ge thabe ya wona e eba e tala e hloga matlakala, le tsebe gore lehlabula le batametše. 33Le realo gee mohla le bonago dilo tšeo, le tsebe ge di le kgauswi, di fihlile mojakong. 34Ruri, ke a le botša, di tlo tšwelela moloko wo o sešo wa fela. 35Legodimo le lefase di tlo feta; gomme dipolelo tša ka di ka se ke tša feta.
36Ge e le letšatši leo, le nako ya tšona, ga go e a di tsebago. Le barongwa ba magodimong, le yena Morwa, ga ba di tsebe. Go tseba Tate a nnoši. 37Maboong a Morwamotho go tlo ba bjalo ka mehleng ya Noage. 38Ba tlo dira tše ba di dirilego mola meetsefula a sešo a tla, ge ba eja, ba enwa, ba nyala, ba nyadiša, gwa ba gwa tla tsatši le Noage a tsenego polokelong ka lona. 39Ba be ba sa šetše selo; meetsefula a ba a tla, a ba tšea ka moka. Le maboong a Morwamotho go tlo ba bjalo. 40Mohla woo ba babedi ba tlo ba ba le nageng; e mongwe a tlo amogelwa, e mongwe a tlo tlogelwa. 41Ba babedi ba tlo ba ba šila lwaleng; e mongwe a tlo amogelwa, e mongwe a tlogelwa.
42Ke gona phakgamang, gobane nako ya go tla ga Morena wa lena ga le e tsebe. 43Se le se tsebago sese: Ge mong wa ngwako a ka tseba nako ya bošego yeo lehodu le tlogo tla ka yona, a ka phakgama a se dumele ge ngwako wa gagwe o ka tsenwa. 44Le lena dulang le itokišitše, gobane Morwamotho o tlo tla ka nako ye le sa e gopolego.
45Bjale ke mang molaki e a botegago yo bohlale, yo mong wa gagwe a mmeilego go laka bahlanka ba gagwe le go ba fa dijo ka lebaka la gona? 46Wa lehlogonolo e tlo ba molaki yoo, mong wa gagwe ge a etla, a mo hwetša a dira tšona tšeo. 47Ruri, ke a le botša, o tlo mmea a laka dilo tša gagwe ka moka. 48Fela, molaki ge a ka ba e mobe, mme pelong ya gagwe a re: Mong wa ka o sa ile! 49Mme a thoma go itia ba e lego bahlanka ka yena, a eja, a enwa le matagwa, 50molaki yoo o tlo tšhoga mong wa gagwe a fihlile, a etla ka lebaka le a sa le tsebego. 51Mme mong wa gagwe o tlo mo kgabutla, a mo dira se se loketšego baikaketši, ya tlo ba dillo le ditsikitlano tša meno.
