Dikgarebe tše 10; mohlanka wa sebodu; kahlolo ya bofelo
1Mohla woo mmušo wa magodimo o tlo swana le dikgarebe tše lesome, tše di tšerego mabone a tšona, tša tšwela go gahlanetša monyadi. 2Tše tlhano tša tšona e be e le tše bohlale, tše tlhano e le ditlaela. 3Tše e lego ditlaela, ge di tšea mabone a tšona, ga tša ka tša tšea le makhura. 4Tše bohlale tša swara makhura ka dibjana gotee le mabone. 5Gomme monyadi ge a diega, bohle ba otsela ba robala.
6Mašegogare gwa hlabja mokgoši wa go re: Šoowe, monyadi o etla, tšwelang go mo gahlanetša! 7Dikgarebe tšeo ka moka tša tsoga, tša lokiša mabone a tšona. 8Tša ditlaela tša kgopela tše bohlale tša re: Re topeletšeng makhura a lena, gobane mabone a rena a a tima. 9Tše bohlale tša fetola tša re: Aowaa! Re ka tlo hlaelelwa bohle, rena le lena. Go kaone ge le eya go barekiši la ithekela. 10Ya re ba sa ile, monyadi a fihla gomme ba ba itokišitšego ba ya le yena monyanyeng; mme mojako wa tswalelwa.
11Ka morago gwa fihla le dikgarebe tšela tše dingwe, tša re: Morena! Morena! Re bulele! 12Yena a fetola a re: Ruri, ke a le botša, ga ke le tsebe.
13Ke gona phakgamang, gobane ga le tsebe letšatši le nako ya go tla ga Morwamotho.
14Di swana le tša motho e a rego ke a eta, a bitša bahlanka ba gagwe, a ba gafela mahumo a gagwe. 15A nea e mongwe dikete tše tlhano; e mongwe a mo nea tše pedi; e mongwe a mo nea se tee; e mongwe le e mongwe a ba lekanyetša maatla a bona; a tsebo wela tsela. 16Yola wa go fiwa dikete tše tlhano, a sepela a šaba ka tšona, a rua dikete tše dingwe tše tlhano. 17Le yola wa dikete tše pedi a rua tše dingwe tše pedi. 18Ge e le yola wa go fiwa sekete se tee, a ya a epa molete, a fihla tšhelete ya mong wa gagwe.
19Ge go fetile lebaka le letelele morena wa bahlanka bao a goroga, mme a gopola tšhelete ya gagwe le bona. 20Gwa batamela yola wa go fiwa dikete tše tlhano, a tliša le tše dingwe dikete tše tlhano, a re: Morena, o be o nneile dikete tše tlhano; šedi dikete tše dingwe tše tlhano tše ke di ruilego ka tšona. 21Mong wa gagwe a re: Agee, mohlanka o botse e a botegago! O mpotegetše ka tše nnyane; tlaa o be molaki wa tše ntši. Tsena thabong ya mong wa gago.
22Le yola wa go fiwa tše pedi a batamela a re: Morena, o be o nneile dikete tše pedi; šedi, ke ruile tše dingwe tše pedi ka tšona. 23Mong wa gagwe a re: Agee, mohlanka o botse e a botegago; o mpotegetše ka tše nnyane. Tlaa o be molaki wa tše ntši. Tsena thabong ya mong wa gago.
24Le yola wa go fiwa sekete se tee a batamela a re: Morena, ke go tsebile ge o le motho e mothata; o buna mo o sa kago wa bjala, mme o kgobela mo o sa kago wa ološa. 25Ka go boifa tšeo ka ya ka fihla sekete sa gago mobung. Dilo tša gago šedi.
26Mong wa gagwe a fetola a re: O mohlanka e mobe wa sebodu; a o re o tsebile ge ke buna mo ke sa kago ka bjala? A o re ke kgobela mo ke sa kago ka ološa? 27Gona go ka be go swanetše ge o ka be o išitše tšhelete ya ka go baadimi; mme nna ge ke boa, nka be ke e hweditše e tswetše. 28Bjale mo amogeng sekete seo, le se nee yoo a nago le dikete tše lesome. 29Gobane e a nago le tše ntši, o tlo newa wa go humišwa; e a se nago natšo, o tlo amogwa le tše a nago natšo. 30Gomme mohlanka yoo e sego wa selo mo kgoromeletšeng leswiswing la kua ntlentle. Gona moo go tlo ba le dillo le ditsikitlano tša meno.
31Mohla Morwamotho a tlago ka letago la gagwe a na le Barongwa ba gagwe ka moka, o tlo dula sedulong sa gagwe sa bogoši sa letago, 32mme ditšhaba ka moka di tlo phuthelwa pele ga gagwe, mme o tlo ba kgethologanya bjalo ka modiši ge a kgethologanya dinku le dipudi. 33Dinku o tlo di bea ka letsogong la gagwe le letona; dipudi a di bea go la ntsogošo. 34Ke mo yena kgoši a tlogo bolela le bao ba ka letsogong la gagwe le letona, a re: Tlang lena bašegofatšwa ba Tate, le tšee kabelo ya lena ya mmušo wo le o lokišeditšwego go tloga go theweng ya legohle. 35Gobane ke be ke swerwe ke tlala, la mpha dijo; ke be ke nyorilwe, la mpha ka nwa; ke be ke le moeti, mme la nkamogela. 36Ke hlobotše, la nkapeša; ke babja, la ntlhola; ke le kgolegong, la tla go nna.
37Ke mo baloki ba tlogo fetola ba re: Morena, re go bone neng o swerwe ke tlala, mme ra go fa dijo, o nyorilwe ra go fa wa nwa? 38Re go bone neng o le moeti, ra go amogela, o hlobotše ra go apeša? 39Re go bone neng o babja goba o le kgolegong, mme ra tla go Wena? 40Ke mo Morena a tlogo fetola a re: Ruri, ke a le botša: Mo le diretšego e mongwe wa bana bešo ba banyenyane ba, le di diretše nna.
41Ke mo a tlogo bolela le bao ba ka letsogong la ntsogošo a re: Tlogang fa go nna, lena balahlwa, le ye mollong o sa felego o lokišeditšwego Diabolo le barongwa ba gagwe. 42Gobane ke ke be swerwe ke tlala, le se mphe dijo. Ke be ke nyorilwe, la se mphe ka nwa. 43Ke be ke le moeti, la se nkamogele, ke hlobotše la se nkapeše, ke babja, ke le kgolegong la se tle la ntlhola.
44Ke mo le bona ba tlogo fetola ba re: Morena, re go bone neng o swerwe ke tlala, o nyorilwe, o le moeti, o hlobotše, o babja, o le kgolegong, mme re se go direle? 45Mme yena o tlo fetola a re: Ruri, ke a le botša, mo le sa kago la direla e mongwe wa ba banyenyane ba, le nna ga la ka la ntirela. 46Mme bona ba tlo ya tlhokofatšong ye e sa felego; baloki bona ba tlo ya bophelong bjo bo sa felego.
