MATEO 5

₁Eitše ge a bona mašaba, a rotogela thabeng a dula, mme barutiwa ba gagwe ba batamela. ₂A ahlama a ba ruta a re: ₃Ba lehlogonolo ke ba ba humanegilego mo moyeng, gobane bonabao mmušo wa magodimo ke wa bona. ₄Ba lehlogonolo ke ba ba nyamilego, gobane bonabao ba tlo homotšwa. ₅Ba lehlogonolo ke ba boleta, gobane bonabao ba tlo tšea lefase ya ba kabelo ya bona. ₆Ba lehlogonolo ke ba tlala ya gore ba loke, ba ba nyoretšwego gona, gobane bonabao ba tlo horišwa. ₇Ba lehlogonolo ke bagaugedi, gobane bonabao ba tlo gaugelwa. ₈Ba lehlogonolo ke ba pelotshekegi, gobane bonabao ba tlo bona Modimo. ₉Ba lehlogonolo ke badirakhutšo, gobane bonabao ba tlo bitšwa bana ba Modimo. ₁₀Ba lehlogonolo ke ba ba tlaišetšwago toko, gobane mmušo wa magodimo ke wa bonabao.

₁₁Ba lehlogonolo ke bolena, ge ba le roga, ba le tlaiša, ba le phara ka bobe ka moka ka maaka ka baka la ka. ₁₂Thabang le hlalale, gobane moputso wa lena ke o mogolo magodimong. Hleng le baporofeta ba le etilego pele, ba ba tlaišitše ka mokgwa woo.

₁₃Lena le letswai la lefase. Bjale ge letswai le tapa le sa tlo nokwa kang? Ga le sa hola selo, ge e se go lahlwa la gatwa ke batho.

₁₄Lena le seetša sa lefase. Motse wa thabeng ga o kgone go utama. ₁₅Le gona motho ga a gotetše lebone a le ribegetša ka seroto. Lebone ba le hloma sehlomong sa lona, la tsebo bonegela bohle ba ngwakong. ₁₆Le sa lena seetša a se bonegele batho ka mokgwa woo, gore ba bone mediro e mebotse ya lena, ba tumiše Tata weno wa magodimong.

₁₇Le se ke la eleletša la re ke tlile go fediša molao le baropofeta. Ga nka ka tla go fediša, ke tlile go tlatša. ₁₈Ruri, ke a le botša, legodimo le lefase di tlo šutha, go sešo gwa šutha le “i” e tee, le ge e le mothalwana o tee wa molao di sešo tša phethega tsohle. ₁₉Ke gona, e a kago fediša e nngwe ya ditaelo le ge e ka ba e nyenyane, mme a ruta batho a realo, o tlo thwe ke e monyenyane mmušong wa magodimo. -- Fela, e a di phethago a di ruta o tlo thwe ke e mogolo mmušong wa magodimo. ₂₀Gobane ke a le botša ge toko ya lena e sa phadiše kgole toko ya ba mangwalo le ya bafarisei le ka se ke la tsena mmušong wa magodimo.

₂₁Le kwele ge ba bogologolo ba boditšwe gwa thwe: O se ke wa bolaya! Mme e a bolayago o tlo swanelwa ke kahlolo. ₂₂Ge e le nna ke le botša ke re: Mang le mang e a befelelwago ngwanabo ka lefela, o tlo swanelwa ke kahlolo. E a rego: Lefela, a era ngwanabo, o swanetšwe ke tsheko ya lekgotla. E a rego: Setlaela, a era ngwanabo, o swanetšwe ke molete wa mollo. ₂₃Ke gona, ge o tliša neo ya gago aletareng, mme o le gonafao wa elelwa gore ngwaneno o na le taba le wena, ₂₄gona tlogela neo ya gago moo aletareng, o thome go yo boelana le ngwaneno, o tsebo tliša neo ya gago.

₂₅O tsome ka pele go kwana le e a sekišanago le wena o sa le tseleng le yena; mosekišananago a se tlo go gafela moahlodi, moahlodi a go gafela mohlanka, mme wa kgoromeletšwa kgolegong. ₂₆Ruri, ke a go botša, moo o ka se ke wa ba wa tšwa, o sešo wa lefa le yona tšheletana ya kgoreletšo.

₂₇Le kwele ba bogologolo ba boditšwe gwa thwe: O se ke wa otswa! ₂₈Ge e le nna ke le botša ke re: Mang le mang e a lebelelago mosadi a mo kganyoga, o šetše a otswitše pelong ya gagwe. ₂₉Ke gonagee ge o kgopišwa ke leihlo la gago la le letona, le gonye o le lahle; gobane se se tlo go go hola, ke ge se sengwe sa ditho tša gago se senyega, gore mmele wa gago ka moka o se tlo lahlelwa moleteng wa mollo. ₃₀Ge o kgopišwa ke seatla sa gago sa le letona, se ripe o se lahle kgole, gobane se tlo go go hola ke ge se sengwe sa ditho tša gago se senyega, gore mmele wa gago ka moka o se tlo lahlelwa moleteng wa mollo.

₃₁Le gona go kile gwa thwe: E a hlalago mosadi wa gagwe, a a mo fe lengwalo la tlhalo. ₃₂Ge e le Nna ke botša lena ke re: E a hlalago mosadi wa gagwe, ge e se ka baka la bootswa, o a mo otswiša; gomme e a tšeago mohlalwa, o a otswa.

₃₃Le gona le kwele ge go boditšwe ba bogologolo gwa thwe: O se ke wa ena maaka; mme o phethe tše o di enetšego Modimo. ₃₄Ge e le nna ke botša lena ke re: Le se ke la ba la ena, le ge e le ka legodimo, ka gobane ke sedulo sa Modimo, ₃₅le ge e le ka lefase, ka gobane ke bogato bja nao tša gagwe: le ge e le ka Jerusalema, ka gobane ke motse wa yena Kgoši e kgolo, ₃₆le ge e le ka hlogo ya gago, ka gobane le ntsha e tee ya moriri wa gago ga o kgone go e šweufatša goba go e fifatša. ₃₇Mo go ya lena polelo “E” e be “E”, “Aowa” e be “Aowa”; se se eketšwago se tšwa bobeng.

₃₈Le kwele ge go thwe: Leihlo le lefya ka leihlo; leino le lefya ka leino. ₃₉Ge e le nna ke botša lena ke re: Le se ke la ganela bobe. Ge motho a go phasola thama ya go le letona, o mo sekegele le e nngwe. ₄₀E a ratago go go sekiša le go go amoga kobjana, mo tlogelele le yona kobo. ₄₁E a go gapeletšago go sepela sekgala se tee, sepela nae o fetše tše pedi. ₄₂E a go kgopelago o mo nee; o se gerule e a rego: Nkadime. ₄₃Le kwele ge go thwe: Rata wa geno, o hloye lenaba la gago. ₄₄Ge e le nna ke botša lena ke re: Ratang manaba a lena; ba ba le rogago le ba šegofatše; ba ba le hloyago le ba setše, ba ba le pharago le ba le hlomarago le ba rapelele. ₄₅Ke gona ge le tlo ba bana ba Tataweno wa magodimong; gobane yena, letšatši la gagwe o le hlabišetša ba babe le ba bolo; le pula ya gagwe o e nešetša baloki le bakgopo. ₄₆Ka gobane ge le rata ba ba le ratago, le tlo bona moputso wang? A ba lekgetho ga ba dire bjalo le bona? ₄₇Gomme ge le dumedišana le bana beno fela, a ke mo le phalago ba bangwe? A ba lekgetho ga ba dire bjalo le bona? ₄₈Bjalo bang babolokatlalo, bjalo ka Tataweno wa magodimong e le Yobolokatlalo.