MATEO 6

₁Itoteng gore toko ya lena e se be ya go dirwa pele ga batho gore le bonwe ke bona. Ge le dira ka mokgwa woo, moputso wa Tataweno wa magodimong le ka se o bone.

₂Ke gona ge o dira tša kgaugelo, o se iteletše phalafala boka baikaketši ge ba dira diphuthegong le mekgotheng, e le gore ba retwe ke batho. Ruri ke a le botša, ke gona ge ba tšere moputso wa bona. ₃Wena, ge o dira tša kgaugelo, seatla sa gago se setshadi se se ke sa tseba tše di dirwago ke se setona. ₄Gore ya gago kgaugelo e dule e utame; ke mo Tatago yena mošetšaphihlo a tlo go go bušetša ka tše di bonalago.

₅Le mohla le rapelago, le se etše baikaketši; gobane ba rata go rapela ba eme phuthegong le magahlanong a mekgotha, e le gore ba bonwe ke batho. Ruri, ke a le botša, ke gona ge ba tšere moputso wa bona. ₆Wena, ge o rapela, tsena phapošing ya ngwako wa gago, o tswalele mojako, o rapele Tatago o utame; ke mo Tatago yena mošetšaphihlo, a tlo go go bušetša ka tše di bonalago.

₇Ge le rapela, le se ke la touta bjalo ka ba ditšhaba; gobane bona ba re ba tlo kowa ge ba bolabola tše ntši. ₈Le se ke la etša bona; gobane Tataweno, tše le di hlokago o a di tseba le sešo la mo kgopela. ₉Lena, ge le rapela, le re: Tatawešo wa magodimong! Leina la gago a le kgethwe; ₁₀mmušo wa gago a o tle; thato ya gago a e dirwe mono lefaseng bjalo ka ge e dirwa legodimong; ₁₁re fe lehono bogobe bja rena bja ka mehla; ₁₂re lebalele melato ya rena bjalo ka ge re lebalela ba ba nago le melato go rena; ₁₃o se re iše molekong; gomme o re phološe bobeng; gobane mmušo ke wa gago, le maatla, le tumišo, ka go sa felego. Amene.

₁₄Gobane ge le lebalela batho dikarogo tša bona, gona Tataweno wa magodimong, le lena o tlo le lebalela. ₁₅Fela, ge le sa lebalele batho dikarogo tša bona, Tataweno le lena a ka se le lebalele dikarogo tša lena.

₁₆Mohla le ikonago dijo, le se ke la etša baikaketši ba go šošobanya difahlogo; gobane ba befiša defahlogo tša bona gore ba bonwe ke batho ge ba ikona. Ruri ke a le botša, ke gona ge ba tšere moputso wa bona. ₁₇Wena ge o ikona, tlola hlogo o hlape mahlo. ₁₈E le gore o se ke wa bonwa ke batho ge o ikona, o bonwe ke Tatago moiphihli; ke mo yena Tatago mošetšaphihlo a tlo go go bušetsa ka tše di bonalago.

₁₉Le se ke la ikgobelela mahumo lefaseng, mo go senyago tshwele le diji, mo go phulago mahodu a utswa. ₂₀Mahumo ikgobeleng legodimong, mo go sa senyego tshwele le diji, mo go sa phulego mahodu a utswa. ₂₁Gobane mo go lego lehumo la gago, ke mo go lego pelo ya gago.

₂₂Leihlo ke lona lebone la mmele. Bjale, ge leihlo la gago le lokile, mmele wa gago ka moka o tlo etša.

₂₃Fela, ge leihlo la gago e le le lebe, mmele wa gago ka moka o tlo ba wa lefsifsi. Bjale, ge seetša se lego go wena e le lefsifsi, lona lefsifsi e tlo ba le lekaakang?

₂₄Ga go e a kgonago go hlankela marena a mabedi; a ka tlo hloya e mongwe, a rate e mongwe; goba a gomarele e mongwe, a nyatše e mongwe. Le ka se kgone go direla Modimo, mme la direla le Mamona.

₂₅Ke ka baka leo ke rego: Le se ke la belaelela bophelo bja lena la re: Re tlo jang? Re tlo nwang? Le mmele le se ke la o belaelela la re: Re tlo aparang? Afa bophelo ga bo fete dijo ka bogolo? Le mmele, afa ga o fetiše seaparo? ₂₆Lebelelang dinonyana tša sebakeng: ga di bjale, ga di bune, ga di kgobelele dišegong; mme Tataweno o a di otla. Afa lena ga le di fetiše gagolo? ₂₇Le gona, e ka ba mang wa lena e a kago kgona go eketša leemo la gagwe ka go le belaelela, a kgona le moelonyana o tee?

₂₈Le diaparo le di belaelelang? Šetšang matšobana a naga, ka mo a melago a sa dire, a sa ohle. ₂₉Mme ke a le botša, le Salomo letagong la gagwe ka moka, ga a ka a apara bjalo ka le lengwe la ona. ₃₀Bjale, ešita le bjang bja mohla o tee wa lehono, ge bjona Modimo a bo apeša ka mokgwa woo, a ka lesa bjang go direla lena tše di fetišago? Lena bahlayatumelo!

₃₁Ke gona lesang go belaela la re: Re tlo jang? Re tlo nwang? Re tlo aparang? ₃₂Tšeo ka moka ke tše baditšhaba ba di tsomago ka kudu. Ge e le Tataweno wa magodimong o tseba gobane le lena tšeo ka moka le phela ka tšona. ₃₃Sa pele le tsome mmušo wa Modimo le toko ya wona; ke mo le tlo go ekeletšwa ka tšeo ka moka. ₃₄Ke gona, le se ke la belaelela tša ka moswana, gobane la ka moswana le tlo ipelaelela tša lona. Tšatši le lengwe le le lengwe le lekanwa ke bošula bja lona.