MATEO 7

₁Le se ke la ahlola, gore le lena le se tlo ahlolwa. ₂Gobane moahlolelo wo le ahlolago ka wona, le lena le tlo ahlolwa ka wona; le seelo se le elago ka sona, le lena le tlo elelwa ka sona. ₃O reng o bona lehlokwana la mo ihlong la ngwaneno, o sa lemoge kwata ya mo ihlong la gago? ₄Mme o ka bolela bjang le ngwaneno wa re: Anke ke ntšhe lehlokwana mo ihlong la gago, mola leihlong la gago go na le kwata? ₅Moikaketšitena! Thoma go ntšha kwata ya mo ihlong la gago ke mo o tlo go boneša, wa kgono ntšha lehlokwana mo ihlong la ngwana weno.

₆Se sekgethwa le se ke la se neela dimpya. Dipheta tša lena le se di lahlele dikolobe, di se tlo di gata ka dihlaku, tša le kutulogela mme tša legobatša.

₇Kgopelang, ke mo le tlo go fiwa. Nyakang, ke mo le tlo go bona. Opaopang, ke mo le tlo go bulelwa. ₈Gobane mang le mang a kgopelago, o a amogela; e a tsomago o a hwetša; e a opaopago o tlo bulelwa. ₉Gobane motho ke mang mo go lena, yo e rego ge ngwana wa gagwe a mo kgopela bogobe, mme a mo nea lebje? ₁₀Yo e rego ge ngwana a mo kgopela sešeba, a mo nea noga? ₁₁Hleng lena le lego ba babe, le tseba go nea bana ba lena dineo tše botse, Tataweno wa magodimong a ka se le phale ka go ntšha tše di botse, a nea ba mo kgopelago?

₁₂Tšohle tše le ratago gore batho ba le direle tšona, le lena le ba direle tšona tšeo; gobane molao o realo, le bona baporofeta.

₁₃Tsenang ka kgoro e pitlaganego; gobane kgoro e išago tahlegong ke petleke, le tsela ye e yago gona e phatlaletše, mme ba ba tsenago ka yona ke ba bantši. ₁₄Gobane kgoro e išago bophelong e pitlagane; le tsela ye e yago gona ke e tshese; mme ba ba e bonago ga ba nene.

₁₅Phafogelang baporofeta ba maaka, ba ba tlago go lena ba apere kobo tša nku, mola ka teng ba le diphiri tše di jago batho. ₁₆Le tlo ba tseba ka dienywa tša bona. Afa dirara di fulwa meetlweng? Goba mago a a fulwa menganeng? ₁₇Šidiogee. Sehlare se se botse, e ka ba sefe le sefe, ke sona se enywago dienywa tše di botse. Mme sehlare se se sa tsebalegego se enywa dienywa tše mpe. ₁₈Sehlare se botse ga se kgone go enywa dienywa tše mpe; le sehlare se se sa tsebalegego ga se kgone go enywa dienywa tše botse. ₁₉Dihlare ka moka tše di sa enywego dienywa tše di botse, di tlo rengwa tša lahlelwa mollong. ₂₀Ke gonagee, le tlo ba tseba ka dienywa tša bona.

₂₁Mmušong wa magodimo go ka se ke gwa tsena bao bohle, ba e rego ge ba ra nna, ba re: Morena! Morena! Go tlo tsena ba ba dirago thato ya Tate wa magodimong. ₂₂Ke ba bantši, ka mohla woo ba tlo go nthera ba re: Morena! Morena! A ga ra ka ra porofeta ka leina la gago? A ga ra ka ra leleka meoya e mebe ka leina gago? A ga ra ka ra dira matete ka leina la gago?

₂₃Ke mo nna ke tlo go fetola ka la ka ka re: Ga ke ešo ka ba ka le tseba; ntlogeleng lena badirabokgopo!

₂₄Mang le mang a kwago tše ke di bolelago tše, mme a di dira, ke mo swantšha ka monna yo bohlale, e a agilego ngwako wa gagwe lwaleng. ₂₅Gwa theoga pula, gwa tla lefula, gwa tšutla ledimo, tša wela ngwako woo, mme wa se we, ka ge o theilwe lwaleng.

₂₆Gomme mang le mang e a kwago tše ke di bolelago tše, mme a se di dire, ke mo swantšha ka monna wa setlaela, e a agilego ngwako wa gagwe lešabašabeng. ₂₇Gwa theoga pula, gwa tla lefula, gwa tšutla ledimo, tša wela ngwako woo, mme wa wa; go wa ga wona ya ba mo gogolo.

₂₈Gomme ya re ge Jesu, a feditše dipolelo tše, mašaba a batho a tlabja ke thuto ya gagwe, ₂₉Ka gobane a ba ruta boka e a nago le maatla, e sego bjalo ka bamangwalo.