MAREKA 15

₁E sa le bošego, baperisita ba bagolo ba lakana le ba bagolo le bamangwalo, le ba lekgotla ka moka, ba tlema Jesu, ba tloga nae ba mo gafela Pilato. ₂Pilato a mmotšiša a re: A ke wena Kgoši ya Bajuda?

Jesu a fetola a re: O boletše gona.

₃Baperisita ba bagolo ba mmega ka tše ntšf. ₄Pilato a buša a mmotšiša a re: A ga o fetole selo? O k'o bone; ke tše kaakang tše ba go begago ka tšona.

₅Jesu a se hlwe a fetola selo, le Pilato a ba a kgotsa.

₆Ka menyanya Pilato o be a e ba gololele e mongwe wa bagolelgwa, yo ba mo kgopelago. ₇Bjale go be go na le monna e mongwe e a bitšwago Baraba, e a bego a swerwe le ba ba tsošitšego mpherefere, ba bolaya motho mohla woo. ₈Gomme lešaba la rotoga, ba thoma go kgopela gore Pilato a dire ka mo a emego a ba direla ka mehla. ₉Pilato a ba botšiša a re: A le rata gore ke le lokollele Kgoši ya Bajuda? ₁₀A realo ka gobane a lemogile gore, ge baperisita ba bagolo ba bega Jesu, ba be ba dirwa ke mona.

₁₁Baperisita ba bagolo ba hlohleletša setšhaba, ba re ba kgopele gore a ba gololele Baraba. ₁₂Pilato a botšiša gape a re: Bjale le rata ge yo le rego ke Yena Kgoši ya Bajuda ke mo dirang?

₁₃Lešaba la fo goa gape la re: Mmapole sefapanong!

₁₄Pilato a re: Mme ke bofe bokgopo bja a bo direlego?

Bona ba fo goa ba re: Mmapole sefapanong!

₁₅Pilato ka gobane a rata go kgahliša setšhaba, a ba gololela Baraba, a re Jesu a otliwe a tsebo bapolwa sefapanong.

₁₆Bahlabani ba tloga le Jesu ba mo iša lapeng la ngwako wa kahlolo, ba mmokelela sephohla ka moka. ₁₇Ba mo apeša kobo ya matsaka, ba loga mphapahlogo ka metlwa, ba mo rweša wona. ₁₈Ba mo lotšha ba re: Dumela, Kgoši ya Bajuda! ₁₉Ba mo itia hlogo ka lehlaka, ba mo tshwela ka mare, ba khunama ba mo lotšha. ₂₀Ya re ge ba feditše go mo kwera ba mo apola kobo yeo ya matsaka, ba mo apeša kobo ya gagwe, ba tšwa nae ba yo mmapola.

₂₁Ba gapeletša monna e mongwe e a bego a feta a etšwa tšhemong, ba re a rwalele Jesu sefapano. E be e le Simone wa Kirene tatago Alesandere le Rufo. ₂₂Ba mo iša felo mo ba rego ke Gologotha, ke go re Magateng a dihlogo. ₂₃Ba mo nea mokgope wa morara wo o tswakilwego ka bohloko, ba re a nwe, mme yena a o gana. ₂₄Ya re ga ba mmapotše, ba abelana kobo tša gagwe, ba dira matengwa a go re kobo ke ya mang. ₂₅E be e le nako ya boraro ge ba mmapola. ₂₆Ge e le lengwalo la molato wa gagwe le be le re: KGOŠI YA BAJUDA. ₂₇Ba bapola le bahlakodi ba babedi, e mongwe a ba ka letsogong le letona la gagwe, e mongwe a ba ka go le lethsadi. ₂₈Ya ba go phethega ga lengwalo le le rego: O badilwe le badiradibe.

₂₉Ba ba fetago moo ba mo roga, ba šišinya dihlogo tša bona, ba re: Kgonee! Mo-phušola-Ntlo-kgethwa wa e aga ka matšatši a mararo! ₃₀Iphološe o fologe moo sefapanong!

₃₁Ka mokgwa o bjalo le bona baperisita ba bagolo ba mo kwera, ba boledišana le bamangwalo ba re: Ba bangwe o ba phološitše; go iphološa ga a kgone. ₃₂Ba re: Hee Kriste! Kgoši ya Isiraele! Fologa moo sefapanong re bone, re tsebo dumela.

Le ba ba bapotšwego le Yena ba mo roga.

₃₃Ka nako ya go selela gwa ba le lefsifsi nageng ka moka, go fihla ka nako ya senyane. ₃₄Ka yona nako ya senyane Jesu a goeletša ka lentšu le legolo a re: Eloi! Eloi lama sabagthani! Ke go re: Modimo waka! Modimo waka! O ntlogeletseng?

₃₅Ba bangwe ba ba bego ba eme moo, ge ba ekwa a realo, ba re: Šoo! O bitša Eliya. ₃₆E mongwe a kganyelela a ina motšitla mokgopeng wa morara, a o hlomela lehlakeng, a mo noša; a re: Lesang re bone ge Eliya a tlo tla a mo phološa.

₃₇Gomme Jesu a goeletša ka lentšu le legolo, ya ba gona ge a neela moya.

₃₈Gomme sešireletšo sa kwa Ngwakong wa Modimo sa gagoga go tloga godimo go iša tlase, sa tšwa diripa tše pedi. ₃₉Tona ya lekgolo ye e bego e eme e mo hlapeditše, ge e bona a felela ka mokgwa woo, ya re: Ka kgonthe, motho yo e be e le Morwa wa Modimo.

₄₀Le basadi ba be ba le gona, ba lebeletse ka kgole; go bona go be go le Maria Magdalena, le Maria mma go Jakobo e monyane le Jose, le Salome. ₄₁Ke bona ba ba mo latetšego a sa le kwa Galilea, ba mo direla; le ba bangwe ba bantši ba be ba le gona, ba ba sepetšego le yena ge a etla Jerusalema.

₄₂E šetše e le mantšibua a lona tšatši leo la tokišo, le le hlatlangwago ke la Sabatha. ₄₃Gwa tla Josefa wa Arimathea, monna wa lekgotla wa lehumagadi, yo le yena a bego a letetše mmušo wa Modimo, a tlema pelo, a tsena go Pilato, a kgopela mmele wa Jesu. ₄₄Pilato a kgotsa ge a ekwa gore o šetše a hwile; a bitša tona ya lekgolo, a mmotšiša ge e šetše e le lebaka ge a hwile. ₄₅Ya re a kwile se tona e se bolelago, a fa Josefa mmele. ₄₆Josefa a reka mašela, a mo fegolola, a mo phuthela ka mašela ao, a mmea libitleng le le kgorilwego lefsikeng, a pshikološetša lefsika mojako wa lebitla. ₄₇Gomme Maria Magdelena, le Maria mmago Jesu, ba bona mo a bewago gona.