NUMERI 2

₁Morena o boletše le Moshe le Arone a re: ₂Baisiraele ge ba aga mešaša, e mongwe le e mongwe a age sefokeng sa gabo, mo go lego leswao la leloko la gabo. Ba hlome mešaša ba dikologe le Ngwako wa Kgwerano, ba lebane nawo.

₃Ba ba tlogo hloma mešaša ka kgono ya bohlabela ke ba sefoka sa mešaša ya Juda, ka mephato ya bona. Nahasone morwa wa Aminadaba e tlo ba letona la ba Juda. ₄Sera sa gagwe ke ba dikete tše masome a šupago a metšo e mene, le makgolo a selelago, a ba ba badilwego. ₅Ba leloko la Isashara ba batagane le bona. Letona la ba moloko wa Isashara ke Nethaniele morwa wa Tsuari. ₆Sera sa gagwe ke ba dikete tše masome a mahlano a metšo e mene, le makgolo a mane a ba ba badilwego. ₇Ba batagane le ba leloko la Sebulone. Letona la Basebulone ke Eliaba morwa wa Helone. ₈Sera sa gagwe ke ba dikete tše masome a mahlano a metšo e šupago, le makgolo a mane, a ba ba badilwego. ₉Ka moka ba ba badilwego, ba e lego ba sera sa Juda e be e le ba dikete tše lekgolo le le nago le masome a seswai a metšo e selelago, le makgolo a mane. Ke bona ba go tsoga pele ge go tšwiwa ka makoko.

₁₀Ba sefoka sa mešaša ya Rubeni ke ba kgono ya borwa; ba hlome mešaša ya bona ka mephato ya bona. Letona la bona bao ba Rubeni ke Elitsuri morwa wa Sedeuri. ₁₁Sera sa gagwe ke ba dikete tše masome a mane a metšo e selelago, le makgolo a mahlano, a ba ba badilwego. ₁₂Ba leloko la Simeone ba batagane nabo. Selumiele morwa wa Tsurisadai ke yena letona la Basimeone. ₁₃Sera sa gagwe ke ba dikete tše masome a mahlano a metšo e senyane, le makgolo a mararo, a ba ba badilwego. ₁₄Ba batagane le ba leloko la Gada. Letona la Bagada ke Eliasafa morwa wa Rehuele. ₁₅Sera sa gagwe ke ba dikete tše masome a mane a metšo e mehlano, le makgolo a selelago a nago le masome a mahlano, a ba ba badilwego. ₁₆Ka moka ba ba badilwego ba e lego ba sera sa Rubeni ke ba dikete tše lekgolo le le nago le masome a mahlano a motšo o tee, le makgolo a mane a masome a mahlano, ka mephato ya bona. Ke bona ba sera sa bobedi, ge ba tsoga ba lokologana.

₁₇Ba latelwa ke Ngwako wa Kgwerano le makoko a Balefi; bona ba ba gare ga madira. Ba tsoga ba lokologana ka mešaša le ka difoka, bohle ba tseba felo ga bona.

₁₈Ba sefoka sa Efuraimi ke ba kgono ya bodikela. Ba age mešaša ya bona ka mephato ya bona. Letona la Baefuraimi ke Elisama morwa wa Amihudi. ₁₉Sera sa gagwe ke ba dikete tše masome a mane, le makgolo a mahlano, a ba ba badilwego. ₂₀Ba leloko la Manase ba batagane nabo. Letona la Bamanase ke Gamaliele morwa wa Pedatsuri. ₂₁Sera sa gagwe ke ba dikete tše masome a mararo a metšo mebedi, a ba ba badilwego. ₂₂Ba batagane le ba leloko la Benyamini. Letona la Babenyamini ke Abidani morwa wa Gideoni. ₂₃Sera sa gagwe ke ba dikete tše masome a mararo a metšo e mehlano, le makgolo a mane, a ba ba badilwego. ₂₄Ka moka ba ba badilwego, e lego ba sera sa Efuraimi ke ba dikete tše lekgolo le le nago le metšo e seswai, le lekgolo letee, ka mephato ya bona. Ke bona ba sera sa boraro ge ba tsoga ba lokologana.

₂₅Ba sefoka sa Dani ke ba kgono ya leboa; ba age mešaša ya bona ka mephato ya bona. Letona la leloko la Dani ke Ahiesere morwa wa Amisadai. ₂₆Sera sa gagwe ke ba dikete tše masome a selelago a metšo e mebedi, le makgolo a šupago a ba ba badilwego. ₂₇Ba batagane le ba leloko la Asere. Letona la ba leloko la Asere ke Pagiele morwa wa Okorane. ₂₈Sera sa gagwe ke ba dikete tše masome a mane a motšo o tee, le makgolo a fetšago seatla a ba ba badilwego. ₂₉Ba batagane le ba leloko la Nafutali. Letona la leloko la Nafutali ke Ahira morwa wa Enani. ₃₀Sera sa gagwe ke ba dikete tše masome a mahlano a metšo e meraro, le makgolo a mane a ba ba badilwego. ₃₁Ka moka ba ba badilwego, ba e lego ba sefoka sa Dani, ke dikete tše lekgolo le le nago le masome a mahlano a metšo e šupago, le makgolo a selelago. Ke bona ba khunyeletšo ge ba etšwa ka difoka.

₃₂Ke bona Baisiraele ba ba badilwego ka meloko ya bona ba ba badilwego ka mešaša ya bona. E be e le ba dikete tše makgolo a selelago a nago le metšo e meraro, le makgolo a mahlano a nago le masome a mahlano. ₃₃Balefi bona ga ba ka ba balwa gotee le Baisiraele, ka mo Morena a laetšego Moshe ka gona.

₃₄Gomme Baisiraele ba dirile tšohle tše Morena a di laetšego ka Moshe. Ba hlomile mešaša ba eya ka difoka tša bona. Le go tšwa ba tšwile ka mokgwa woo; motho a tšwa le ba leloko la gabo, a na le ba gabo bona.