PSALME ya 105

₁Lebogang Morena, le goelele leina laagwe; le botše ditšhaba ditiro tša gagwe.

₂Le mo opelele le mminele, le bole mehlolo ya gagwe ka moka.

₃Fadišang leina lekgethwa laagwe, go thabe dipelo tša ba nyakago Morena.

₄Nyakang Morena le maatla a gagwe, le fele le nyaka sefahlogo saagwe.

₅Le se lebale mehlolo ye a e dirilego, matete a gagwe, le dikahlolo tša molomo wa agwe.

₆Le realo lena ba peu ya Aborahama mohlanka wa gagwe, lena bana ba Jakobo, bahlaolwa ba gagwe.

₇Morena ke yena Modimo wa rena; dikahlolo tša gagwe di mo go fela lefaseng.

₈Kgwerano ya gagwe ga a e lebale neng le neng, lentšu lela a go le laela meloko e dikete.

₉Kgwerano yela a go e dira le Aborahama, a go e enela le Isaka;

₁₀A e tiišetša le Jakobo, mme ya ba molao, le go Isiraele ya ba kgwerano ye e sa felego;

₁₁A re: Ke tlo go fa naga ya Kanana, ya ba ya gago, ya ba legae la lena.

₁₂Ke mola e sa ba bantši, e le ba sego nene, e sa le badiiledi,

₁₃Ba sa fela ba khuduga ba ralala le dilete, ba ralala le ditšhaba.

₁₄Ga se a lesa motho a ba pateletša, a ba a kgalema le dikgoši ka lebaka la bona.

₁₅A re: Batlotšwa ba ka ba, le se ke la ba dira selo; Baporofeta ba ka le se ke la ba hlokofatša.

₁₆A bitša tlala ya tla ya enela, a tomola medu yohle ya bogobe.

₁₇A roma monna a ba etapele, Josefa, a rekišwa a ba mohlanka.

₁₈Maoto a gagwe ba a loka diphateng, pelo ya gagwe ya tsena gare ga ditshipi.

₁₉Gwa ba gwa tla lebaka la go tšwelela ga se Morena a se boletšego, a sekegile ka taelo ya Morena.

₂₀Kgoši ya roma, ba mo hunolla; yena mmuši wa ditšhaba a mo lokolla.

₂₁A mmea a ba mong wa ngwako wa gagwe, a ba molaki wa maruo agwe ohle.

₂₂Gore, ge a rata, a tleme bakgoma ba gagwe, a rute dikala tša gagwe bohlale.

₂₃Ya ba gona Isiraele a tlago Egipita; Jakobo a ba modiiledi nageng ya Hama.

₂₄Setšhaba sa gagwe a se atiša ka gogolo, a se fa maatla se feta manaba a sona.

₂₅A phekgola dipelo tša bona, ba hloya setšhaba sa gagwe, ba dira bahlanka ba gagwe ka bomenetša.

₂₆A ba a roma Moshe mohlanka wa gagwe, le Arone yo a mo kgethilego.

₂₇A dira mehlolo ya gagwe ka bona, dimakatšo mo nageng ya Hama.

₂₈A roma leswiswi, mme la swara; ba se kgone go ganetša ditaelo tšaagwe.

₂₉A fetola meetse a bona, a ba madi; dihlapi tša bona a di bolaya.

₃₀Naga ya bona ya tlala digwegwe, le mo nywakong ya mošate.

₃₁A bolela gwa tšwelela diboba le menang mo go fela mellwaneng ya bona.

₃₂A ba nešetša pula ya sefako, ya mollo o tukago mo nageng ya bona.

₃₃A tia mehlare ya bona ya merara le ya mego, a thokgaganya mere mellwaneng ya bona.

₃₄A bolela, gwa tla tšie le diji di sa balwego.

₃₅Tša ja merogo yohle mo nageng ya bona, tša ja dibjalo tša mašemo a bona.

₃₆A otla le maitšibulo ka moka nageng ya bona, tšona dithakaletswalo tša maatla a bona.

₃₇A ba khuduša ba swere silifera le gauta, ba se na e a hlotšago mo gare ga dilete tšabo.

₃₈Baegipita ba thaba ge ba tloga, gobane ba be ba wetšwe ke tšhogo ya go ba tšhoga.

₃₉A atlatša leru la etša lekuba, mme mollo wa ba seetša bošego.

₄₀Ba kgopela, a tliša dikhwiri, a ba fepa ka bogobe bja legodimo.

₄₁A thula leswika, meetse a tšwelela, gwa ela noka kua mahanateng.

₄₂Ke ka ge a sa ka a lebala lentšu la gagwe le lekgethwa, le a le boditšego Aborahama mohlanka wa gagwe.

₄₃A realo ge a ntšha setšhaba sa gagwe, sa tswa se thabile, bakgethwa ba gagwe ba hlalala.

₄₄A ba nea naga ya bantle, ba tšea tše ditšhaba di itiretšego tšona, mme ya ba tša bona.

₄₅Ya ba gore ba boloke ditaelo tša agwe, ba diše melao ya gagwe. Haleluya.