SEFELA SA DIFELA 6

₁Moratwa wa gago, o ile kae? Wena yo botse gara basadi. O lebile kae, moratiwa wa gago? Re go nyakiše.

₂Moratwa wa ka o sobetše serapeng sa gagwe sa dinoko le maroke; o ile go fudiša mašemong; o ile go ikgela matšobana.

₃Nna ke wa gagwe, yena moratwa wa ka; mme yena ke wa ka, yena modiša wa matšobaneng.

₄O yo botse, wena moratwa wa ka; o etša motse wa Thiritsa, o ratega bjalo ka Jerusalema; o tšhabega boka dira tša difoka.

₅Ribamiša mahlo ago, a a ntsena; meriri ya gago e etša mohlape wa pudi tše di ologago Gileada.

₆Meno a gago a etša mohlatswana wa kwanyana di tšo go hlatswiwa, tša go tlo tswala tšohle ka mafahla, di se ne ngopa le e tee.

₇Thama tša gago, le go širwa ka lešira, ke seenywa se se fatotšwego.

₈Bahumagadi ke ba masome a a selelago, basadi ba direthe ke ba masome a seswai; dikgarebe tšona ga di balwe.

₉Fela, yo e lego leebana la ka ke o tee, mosekegi wa ka, ngwanannoši wa mmagwe, mothotiwa wa motswadiagwe. Barwedi ba Jerusalema ge ba mmona, ba re o lehlogonolo; bahumagadi le basadi ba mo opa,

₁₀ba re: Ke mang yola mogalogawamahuba, motagabokangwedi, mokganyawaletšatši? O tšhabega boka dira tša difoka.

₁₁Ke be ke fologetše serapeng, dikgerung; ka yo bona dihlašana nokaneng; ka yo bona mahlogedi a morara, le matšoba a morapa ge a palegile.

₁₂Ke be ke sa lemoge ge pelo ya ka e nkiša go koloi tša madira a mošate.