U-EKSODUSI 11

₁USomnini wathi kuMosi: “Ngizakuletha okhunye godu ukutshwenyeka phezu kwakaFaro neGibhide. Ngemva kwalapho uzanitjhaphulula, aniqotjhe noke ngendlwana lapha. ₂Tjela abantu bonyana woke amadoda nabafazi ngokufanako bakhombele amagugu wesiliva newegolide ebakhozini babo beGibhide.”

₃USomnini wenza bonyana amaGibhide abe nomusa kuma-Israyeli begodu neenkhulu zakaFaro kanye nabantu beGibhide bamhlonipha khulu uMosi.

₄UMosi waya kuFaro wafese wathi: “Nakhu okutjhiwo nguSomnini, ‘Kuzakuthi phakathi kobusuku ngikhambele iGibhide. ₅Woke umsana olizibulo eGibhide uzakufa, ukusuka kowakaFaro esihlalweni sobukhosi ukuya kowekhobokakazi elitjeni lokusila, nawo woke amazibulo wefuyo. ₆Kuzakuba nesililo esikhulu eGibhide yoke. Sizakuba ngesingazange khesibe khona nesingasoze saba khona godu. ₇Kodwana phakathi kwama-Israyeli nefuywawo kuzokuthi nghwayi, neemvungana zingakhonkothi.’ Ngalokho nizakwazi bonyana uSomnini wenza umahluko phakathi kwamaGibhide nama-Israyeli. ₈Zoke iinkhulu zakhwezo zizakuza kimi zihlome iinhloko phasi zithi, ‘Khambani, wena nabo boke abantu abakulandelako!’ Ngemva kwalapho ngizakukhamba.”

UMosi waphuma agcwele ipotjwana, wasukela uFaro.

₉USomnini wathi kuMosi: “UFaro uzokwala ukukulalela ukuze imikariswami yande eGibhidapha.”

₁₀UMosi no-Aroni benza yoke imikariso le phambi kwakaFaro, kodwana uSomnini wakhunyalalisa ihliziyo kaFaro. Azange atjhaphulule ama-Israyeli kobana aphume enarhenakhe.