U-ISAYA 58

“Rhuwelela, ungazibambi!

Phakamisa ilizwi lakho njengepalapala.

Memezela ebantwini bami iimphambeko zabo

nekumbeni kaJakopo izono zayo.

₂Imihla ngemihla bafunana nami,

bazimisele ukwazi iindlela zami,

kwanga basisizwe esenza okufaneleko,

nesingakalahli imiyalo kaZimaso.

Babuza kimi imithetho efaneleko,

bazimisele bona uZimu atjhidele kibo.

₃Bathi, ‘Sizakuthi sizileleni ukudla nawungayeleliko nje?

Sithe siyazithoba, nalapho azange bewusinake.’

“Bantu bami, qalani la,

ngelanga lokuzila kwenu ukudla

nizenzela umathanda,

nigandelela zoke iinsebenzi zenu.

₄Qalani, nizilela ukuphikisana nokulwa kwaphela,

iye, ukumadlhana ngamaguduva wobukhohlakali.

Ukuzila okufana nokwenu namhlanjesi,

angeze kwenza bona isililo senu

sizwakale ezulwini.

₅Ingabe kuzila engikukhethileko lokho,

kube lilanga lokuzithoba na?

Kulilanga lokuhloma ihloko phasi njengomgaba

nelokulala phezu kweenzilo nomlotha na?

Nikubiza bona kuzila lokho

nelanga elamukelekako kuSomnini na?

₆Nakhu ukuzila ukudla engikukhethileko:

Kunyefisa amakhamandela wobukhohlakali,

ukuqhusula imitja yejogi,

ukutjhaphulula abagandelelweko

nokuqoba woke amajogi.

₇Kukwabela abalambileko isikwa sakho,

ukunikela abanganamakhaya iphahla,

ukwembathisa ombona ahlubule

nokungafihli ubuso koziingazi zakho.

₈Nje-ke, ukukhanya kwakho kuzakudarha njengokusa,

nokuphola kwakho kubonakale masinyana;

ukulunga kwakho kukhambe phambi kwakho

nephazimulo kaSomnini izakuba ngekwelusileko

ngemva kwakho.

₉Nje-ke, uzakubiza uSomnini akuphendule,

ulilele isizo, athi kuwe, ‘Ngilapha.’

“Nawususa ijogi phakathi kwenu

umuno okhombakhombako

nekulumo ekhohlakeleko;

₁₀iye, nawunakekela abalambileko

ngeemfiso zakho,

okutjho ukwanelisa iimfiso zabagandelelweko,

khona-ke isibani sakho sizakukhanya ebumnyameni

nobusuku bakho bufane nemini ekulu.

₁₁USomnini uzakuhlahla njalonjalo,

asuse umrhawu wakho enarheni enesomiso,

akuphe ummongo emathanjenakho.

Uzakufana nesivande esisezelwako

nanjengomthombo onamanzi angatjhiko.

₁₂Abanye benu bazakuvuselela amarubhi wakade,

wena Israyeli uzakwakha kabutjha iinsekelo zakade,

ubizwe ngokuthi, ‘Umvali wesikhala somthangala’

nangokuthi, ‘Umvuli weendledlana ukuze abantu bahlale’.

₁₃“Nawulonda iinyawo zakho ekuratheni iSabatha,

ngokungazenzeli umathanda ngelanga lami elicwengileko,

kodwana ngokubiza iSabatha bona lilanga lokwenama

nelanga elicwengileko lakaSomnini kobana lihloniphekile;

iye, nawulihloniphako ngokungenzi kwangemihla,

nangokungenzi irhwebo,

namkha ukukhuluma ngalo,

₁₄khona-ke uzakufumana ithabo kuSomnini.

Ngizakwenza bona ulawule inarha

bewuzitike ngelifa lakayihlo uJakopo.”

Mbala, watjho njalo-ke uSomnini ngomlomakhe!