U-ISAYA 57

₁Abalungileko bayabhubha,

akakho ocabangako ngalokho;

abantu abathembekileko kuZimu bayahlongakala

kungabikhona ozwisisako:

Ngebanga lobumbi abalungileko bayahlongakala.

₂Labo abakhamba ngobuqotho

bazakulala ngokuthula,

baphumule emikghadinabo.

₃Kodwana nina madodana wesanusi,

nzalo yesihlobongi esingwadlako,

tjhidelani lapha!

₄Ngubani enimenza ihlaya lo?

Ngubani enimkhamisela imilomo,

nimkokomeje na?

Anisibantwana bokonakala,

nenzalo yekohliso na?

₅Ngitjho nina enitjhiswa yikanuko

hlangana nemithi ye-owuku,

ngaphasi kwayo yoke imithi esitjhutha,

nibulala abantwana emirhobeni

ngemipharwini yamadwala.

₆Isiphetho sakho dorobho,

sisematjeni abutjhelelezi emrhobeni,

iye, wona ngiwo asisabelo sakho

ngombana bewuyawaphahlela,

uwanikela neminikelo yeenthoro.

Alo, nithi angihlekele koke lokho na?

₇Uqhise amalalwakho embundwini omude nophakemileko,

wenyuka kobana unikele imihlabelo.

₈Ngemva komnyango negoseni,

ubeke itshwayo lakho labosingazimu bembeleko.

Lokha nawugade ukude nami,

wembule umkghadakho owukhulisileko,

wangena kiwo.

Uvumelene namadodakho ngekokhelo;

wathanda ukuwembulela amabhayi

waqalana nobubhunubhunu bawo.

₉Watjhemelelela uMoleki

uphethe amafutha we-oliva,

wandisa amakha wakho.

Wathumela abazenda bakho kude,

ngitjho nendaweni yabafileko.

₁₀Bewudiniwe ngebanga leendlela zakho,

kodwana azange uthi: “Akusizi ngalitho.”

Ufumene ukuvuseleleka kwamandlakho,

ngalokho azange unyefe.

₁₁Ngubani onevalo nowesabako ngaye

kobana ungabeze ukhulume amanga,

bewungasangikhumbula,

namkha ucabange ngalokho na?

Awusangesabi ngombana ngithule

isikhathi eside na?

₁₂Mina ngizakudalula imisebenzakho

nalokho okuthiwa kulunga kwakho!

Abosingazimu bakho angeze bakubhadekela.

₁₃Isiqhenyana sabosingazimu bakho

asikusize nawulila ufuna isizo!

Ummoya uzabadudula boke njalo,

baphetjhulwe mphefumulo nje kwaphela.

Kodwana umuntu ongenza isiphephelo sakhe,

uzakuzuza inarha,

athumbe intabami ecwengileko njengelifa lakhe.

“Lelezani, lelezani, nilungise indlela!

Susani iinliyo endleleni yabantu bami.”

₁₅Kodwana kwanje,

nakhu okutjhiwo nguZimu ophakemeko nophezulu,

ophila nini nanini, obizo lakhe licwengile, uthi:

“Ngihlala endaweni ephakemeko necwengileko,

godu ngihlala naloyo

onommoya owephukileko nothobekileko.

Ngivuselela ummoya waloyo odanileko,

nehliziyo yowurubajekileko.

₁₆Yeke angeze ngalwa mndundu,

namkha ngihlale ngitjhuqile,

ngombana ummoya womuntu uvela kimi,

uzakunyefa,

khisibe ngimi owanikela ipilo emuntwini.

₁₇Bengithukuthele ngebanga lecala

labantu bami abarhubhela kesabo.

Ngabadula bengafihla ubuso bami ngokuthukuthela,

kodwana baragela phambili ngokuhlubuka,

balandela iinkanuko zehliziywabo.

₁₈Ngizibonile iindlela zabo,

nokho ngizabelapha, ngibahlahle,

ngibavuze ngenduduzo.

Kilabo abalilako ₁₉ngizakukhuluma amezwi wenduduzo

ngithi, ‘Ukuthula, iye, ukuthula

kilabo abakude nabaseduze.’

Mbala ngizabelapha.”

Watjho njalo uSomnini.

₂₀Iinkhohlakali zinjengelwandle eliyalukako:

Alikghoni ukuphumula,

amanzalo ayaluka amabibi nedaka.

₂₁UZimami uthi: “Akuzukuba nokuthula eenkhohlakalini.”