ISILILO 4

₁Maye, igolide elidarhileko lifiphele,

iye, igolidembala!

Amatje acwengileko arhatjhekile

emajikeni wazo zoke iindledlana.

₂Amadodana weZiyoni aligugu

ebegade alinganiswa negolidembala,

gadesi sele afaniswa nemijeka

okumsebenzi wezandla zombumbi!

₃Ngitjho neempungutjha ziyehlisa

kobana zimunyise imindlwanazo,

kodwana amadodakazi wekhethu akanasirhawu

njengeenciliba erhalawumbeni.

₄Ngebanga lokoma amalimu wamasana

anamathela kurhwalabha;

abantwana bakhombela isikwa

kodwana akunamuntu obahlephulelako.

₅Labo abakhe bagoma iinkhanakhana

bagelagela eendledlaneni batlhaphile.

Iye, labo ebebembatha ezibubende

gadesi baphendla ezaleni.

₆Isibetho secala labantu bami,

sikhulu kunesesono seSodoma

eyaketulwa ngomzuzwana

ngaphandle kwesandla somuntu.

₇Amakhosana wakhona

gade adarhe ukwedlula iliqhwa,

amhlophe ukwedlula ibisi,

imizimbawo ikhanya ukwedlula amarubi,

ukuvela kwawo kunjengamasafaya.

₈Kodwana kwanjesi sese anzima kunomsizi,

akasafaniseki eendledlaneni.

Isikhumba sawo sinamathele emathanjenawo,

sirhwatjhe inga sigodo.

₉Abahlatjwe ngesabula bangcono khulu

kunababulawa yindlala;

baqedwe liphango, baphela amandla

ngokuswela umkhiqizo wemasimini.

₁₀Izandla zabafazi abanesirhawu

zapheka abantwababo;

ababa kukudla kwabo

lokha abantu bami nabaphodlhekako.

₁₁USomnini uphelelise itukuthelwakhe,

uthulule ilaka lakhe elivuthako:

Uvuthise umlilo eZiyoni

oqothule iinsekelo zalo.

₁₂Amakhosi, ngitjho nabo boke abahlali bephasi,

azange bakholwe

kobana izitha namanaba angangena

emasangweni weJerusalema.

₁₃Kwenzeka ngebanga lezono zabaphorofidi balo

namacala wabaphristi balo,

abathulula iingazi zabalungileko

ngaphakathi kwalo.

₁₄Nje-ke bazulazula eendledlaneni,

njengabantu abangaboniko.

Basilaphazwe ziingazi

kangangobana akakho othinta ingubabo.

₁₅“Sukani! Nisilaphele!”

Iye, abantu bathi kibo:

“Sukani! Sukani! Ningasithinti!”

Nje-ke basuka, bazulazula.

Hlangana nezizwe abantu bathi:

“Bangasakhonza lapha!”

₁₆USomnini ngokwakhe ubahlakazile,

akasazobatjheja.

Abantu abasahloniphi abaphristi

begodu abasathandi abaphathi.

₁₇Amehlwethu afiphele ngokurhuluphela isizo,

kodwana kulilize lakolize.

Siseenthaleni zethu saqala isizwe esingasiza,

kodwana azange sibe khona esingasindisa.

₁₈Isitha sasihlala eenthendeni

besabhalelwa kukhamba eendledlaneni zethu.

Isiphetho sethu besele sitjhidele

namalangethu sele abaliwe,

iye, isiphetho sethu sifikile.

₁₉Abasigijimisako bebanebelo

kunamakhozi emkayini,

basilandelela basikhweza iintaba,

basilalela erhalawumbeni.

₂₀Ozesiweko kaSomnini, okuphila kwethu,

wabanjwa emgodini wezifu zabo;

iye, esadlumbana ngaye bona

emthunzinakhe sizakuhlala hlangana nezizwe.

₂₁Jekezela uthabe ndodakazi ye-Edomu;

wena ohlala enarheni ye-Utsi.

Kodwana nakuwe ikapho izakufika;

uzakudakwa, uzihlubulise.

₂₂Ndodakazi yeZiyoni,

isibetho secala lakho siphelele;

uSomnini akasazokwembula.

Kodwana wena ndodakazi ye-Edomu,

uSomnini uzakuhlunguphaza ngecala lakho,

embule isono sakho.