U-OBADIYA 1

“Sizwe ilizwi elibuya kuSomnini

ngombana isigijimi sathunywa ezizweni sathi,

‘Nambani sikhambeni siyokusahlela umuzi.’ ”

₂Godu uSomnini wathi ngomphorofidi ku-Edomu:

“Yelela, ngizakukwehlisa isithunzi

unyazeke ezizweni.

₃Ukuzazi kwakho kukurhwalile,

wena ohlala emipharwini yedwala,

wakhe umuzi wakho esiqongolweni,

wena ozitjela uthi,

‘Ngubani ongangihlakazela phasi?’

₄Nanyana indlwanakho ingaba phezulu njengeyedlanga,

namkha ibe phezulu hlangana neenkwekwezi,

ngizakuhlakaza khonapho.

₅“Lokha nakufika amasela ngendlini

nabagongodi ebusuku,

bathatha abakufunako kwaphela;

kodwana wena uzakuhlangulwa.

Lokha abavuni nabavuna esidiribeni

batjhiya ambalwa;

kodwana abantu bakwa-Esewu bazakukhuthuzwa koke;

₆amafa wabo afihliweko azakubhenyegululwa.

₇Boke abakhozi bakho bazakukghurumejela emkhawulweni;

onokuthula nabo bakurhwale bebakubinde;

onghwatha nabo bazakubekela isifu

esihlakeni sakho.”

Godu uSomnini wathi ngomphorofidi ku-Edomu:

“Akukasi kuye!

₈Mhlokho mina Somnini ngizokutjhabalalisa

iinhlakaniphi kwa-Edomu

nokwazi entabeni yakwa-Esewu.”

Kutjho uSomnini.

₉Temana, iintsitsirimba zakho zizakusatjiswa

kuthi woke umuntu arhayilwe

entabeni yakwa-Esewu.

USomnini wathi: “Ngebanga lokubulala

₁₀nelokobana ube nerawurawu

phezu komfowenu uJakopo,

uzokuba namatlhuwiso bewutjhabalaliswe isiphelani.

₁₁Wajamela ncanye wabukela

mhlana abaqhamuki bathumba ibutho lakaJakopo,

namhlana abatjhili bafahla emasangwenakhe;

namhlana baphosa ifumbe babelana ngeJerusalema.

Wena-ke bewufana poro nabo.

₁₂Bewungakameli ukarwe kubukela umfowenu

mhlana asematjhweni,

namkha uthabe

mhlana kurhayilwa amaJuda,

nanyana ube nomlomo omude

mhlana kunamahlungu.

₁₃Bewungakameli ufahle emasangweni wabantu bami

mhlana bavelelwe lilitjhwa,

nanyana ukarwe kubukela ingozi kaJakopo

mhlana avelelwe lilitjhwa,

nanyana uhlangule ilifa lakhe

mhlana avelelwe lilitjhwa.

₁₄Bewungakameli ukuqamulela abaphunyurhileko

nababaleka ngeendlela zamakhondlo ubatjhabalalise,

nanyana ubakhaphele ezitheni mhlana basemahlungwini.

₁₅“Ngambala, ilanga lakaSomnini selitjhidele ezizweni zoke.

Lokho okwenzileko kuzakwenziwa nakuwe,

uzakubethwa ngezakho.”

₁₆“Njengombana nina bantu bakaJakopo

nirhamule ikapho yomhlonyani entabenami

ecwengileko nje;

yeke nezizwezi zoke nje zizayirhamula mndundu.

Zizakurhamula zirhubule kube ngathi

azange khezibe khona phambilini.

₁₇“Kodwana entabeni yeZiyoni

kuzakuba nerholo lokuphephela;

intaba le izakuba ngecwengileko,

kuthi indlu kaJakopo

izuze inarha eyayilobako.

₁₈“Indlu kaJakopo izakuba mlilo,

kuthi yakaJosefa ibe lilangabu,

kodwana yaka-Esewu yona izakuba mawunguwungu;

yeke bazayithungela ngomlilo itjhe thokgho.

Akuzokuba khona ophunyurhako

endlini ka-Esewu.”

Ngambala watjho njalo uSomnini.

₁₉“Abantu besewula yakwaJuda

bazazithumbela iintaba zakwa-Esewu,

kuthi abasemibundwini engeTjingalanga

bazithumbele inarha yamaFilista.

Abantu bakwaJuda bona

bazazithumbela amasimu wakwa-Efrayimu

neweSamariya ngeTlhagwini.

UBhenjamini yena

azithumbele iGiliyadi ngePumalanga.

₂₀Isiqhema sabathunjwa bakwa-Israyeli

sizokuthumba inarha yamaKanana

bekube seSerafadi ngeTlhagwini.

Abathunjwa beJerusalema baseSefaradi

bazakuthumba amadorobho angesewula.

₂₁Abahlengi bazakukhuphukela entabeni yeZiyoni

ukuze babuse iintaba zakwa-Esewu.

Umbuso uzokuba ngowakaSomnini.”