IZAGA 21

₁Ihliziyo yekosi isesandleni sakaSomnini,

uyinqophisa njengomsele wamanzi,

ayise nanyana kukuphi lapha athanda khona.

₂Zoke iindlela zomuntu zibonakala zizihle kuye,

kodwana uSomnini uhlola ihliziyo.

₃Ukwenza okuhle nokulungileko,

kwamukeleke khulu kuSomnini ukudlula imihlabelo.

₄Amehlo aziphakamisako nehliziyo ezigqajako

kusisono esisibani seenkhohlakali!

₅Amaqhinga wokhutheleko aletha inzuzo,

kodwana woke opharhazelako uletha ukuswela.

₆Umnono ofunyanwa ngelimu elinamanga,

umrhwamuko onyelelako;

abanjalo bazumana nokufa.

₇Inturhu yabakhohlakeleko iyabarhurhula,

ngombana bala ukwenza okulungileko.

₈Indlela yonomlandu imagwegwe,

kodwana omsulwa unezenzo ezilungileko.

₉Kungcono ukuhlala ejikeni phezu kwephahla

kunokuhlalisana nomfazi onenturhu.

₁₀Umphimbo wokhohlakeleko ukhanukela ubumbi,

umuntu wekhabo akafumani umusa kuye.

₁₁Lokha isinyefuli nasihlawuliswako

onganalwazi uzuza ukuhlakanipha;

lokha umuntu ohlakaniphileko nayalwako

uzuza ilwazi.

₁₂USokulunga uyelela ikumba yokhohlakeleko;

ahlakazele iinkhohlakali ehlekeleleni.

₁₃Ovala indlebakhe lokha nezwa ukulila kwesichaka,

naye uzakulila kodwana angaphendulwa.

₁₄Isipho sangemsitheleni sidambisa itukuthelo,

nokufunjathiswa okufihlwe ngesambatho

kwehlisa ngitjho nelaka elikhulu.

₁₅Ukwenziwa kobulungiswa

kulethela olungileko itokozo;

kodwana kabaziingilamkhuba kuletha ukubhujiswa.

₁₆Umuntu odurha endleleni yokwazi

uphumula hlangana nomkhambathi wabafileko.

₁₇Othanda ukuzithabisa uzakuswela,

iye, othanda iwayini namafutha uzakuchaka.

₁₈Okhohlakeleko utlhaga esikhundleni solungileko,

nongakathembeki esikhundleni soqotho.

₁₉Kungcono ukuhlala erhalawumbeni,

kunokuhlala nomfazi onenturhu

nobanga isizi.

₂₀Emzini wohlakaniphileko kunamagugu akhethekileko namafutha,

kodwana isidlhadlha sona sirhiribidela koke lokho.

₂₁Orhuluphela ukulunga kanye nokwethembeka

uzuza ipilo, okuhle nedumo.

₂₂Ohlakaniphileko usahlela idorobho leenrhonga,

agirize isiphephelo ezithembele kiso.

₂₃Owelusa umlomakhe nelimu lakhe

ulonda ipilwakhe ehlekeleleni.

₂₄Osideleli nozitjhayako ubizwa bona “sinyefuli”

ngombana uziphatha ngokuziphakamisa okukhulu.

₂₅Isifiso sevila sizakuba kukufa kwaso

ngombana izandla zaso azifuni ukusebenza.

₂₆Selihlala lineemfiso ezingapheliko ilanga loke,

kodwana olungileko unikela ngokungababaleli.

₂₇Umhlabelo weenkhohlakali usinyenyiso,

kangangani-ke nawulethwa ngehloso embi!

₂₈Ufakazi wamanga uzakubhubha,

kodwana ofakaza ngakuzwileko akazukuthuliswa.

₂₉Okhohlakeleko uqinisa ubuso,

kodwana oqotho uqinisa iindlela zakhe.

₃₀Akunakuhlakanipha, ukuzwisisa neseluleko

okuzakuphumelela ukujamelana noSomnini.

₃₁Injomani ilungiselelwa ilanga lepi,

kodwana ukuhlula kungekwakaSomnini.