IZAGA 3

₁Ndodanami, ungakhohlwa ifundiswami,

kodwana ihliziywakho ayibulunge imiyalwami;

₂Mbala izakwelula amalangakho

iye, ingezelele iminyaka nokuthula kuwe.

₃Nawungatjhiyi ukwethembeka neqiniso,

okutjho ukukubophelela entanyenakho,

ukutlole emiqebethwini yehliziywakho,

₄uzakuzuza umusa,

ubukwe nguZimu nabantu.

₅Themba uSomnini ngehliziywakho yoke,

ungeyami ekwazini kwakho.

₆Nawazisa uSomnini kizo zoke iindlela zakho,

yena uzakwenza imizilakho ilelezeke.

₇Ungaziboni inga uhlakaniphile emehlwenakho,

yesaba uSomnini, utjhide ebumbini.

₈Lokhu kuzakuletha ipilo emzimbenakho,

nokondleka emathanjenakho.

₉Nawuhlonipha uSomnini ngomnonwakho,

iye, ngesilumo semikhiqizwakho yoke,

₁₀yena uzakuzalisa iinlulu zakho ngokwaneleko

neembekelelo zakho ziphuphume ngesitjhidela sewayini.

₁₁Ndodanami, ungadeleli ukusola kwakaSomnini,

ungadinwa kukhalima kwakhe,

₁₂ngombana uSomnini uyamkhalima amthandako,

njengobaba endodanenakhe ayithandako.

₁₃Ubusisiwe umuntu ofunyana ubuhlakani,

iye, umuntu ozuza ukuzwisisa,

₁₄ngombana ingcono inzuzo yakhona kuneyesiliva,

iye, imbuyiselo yakhona kuneyegolide.

₁₅Kuligugu ukudlula amaparele;

mbala akunalitho olifisako elingafana nakho.

₁₆Ipilo ede ingesigomeni sakanokwazi,

ngesinceleni sakhe kunomnono nedumo.

₁₇Iindlela zakhe ngezithokozisako,

nemizilakhe ikuthula.

₁₈Umumuthi wokuphila kilabo abamamukelako,

abanamathela kuye

bazakubizwa bona ngabathakasileko.

₁₉USomnini wendlale iinsekelo zephasi ngobuhlakani,

wanzinzisa amazulu ngokuzwisisa,

₂₀ngelwazi lakhe amanzi agobhoza,

umkayi wathontisa umbethe.

₂₁Ndodanami, bulunga ubuhlakani nokuhlolisisa,

ungavumi kusuke emehlwenakho,

₂₂kuzakuba kuphila emphefumulwenakho,

kube mkghabiso entanyenakho.

₂₃Yeke uzakukhamba endlelenakho uphephile,

nenyawo lakho angeze lakhutjwa.

₂₄Lokha nawuyokulala, angeze wesaba,

iye, nawuleleko, uzakuba nobuthongo obumnandi.

₂₅Ungabi nevalo ngehlekelele yamsinya

nangamatshwenyeko lokha nehlela abakhohlakeleko,

₂₆ngombana uSomnini uzakuba seqadi kwakho,

alonde inyawo lakho ekubanjweni sisifu.

₂₇Ungathi nawunamandla wokwenza okuhle,

ubagodlele labo okufanele ubenzele.

₂₈Ungathi komunye umuntu:

“Khamba, ubuye kusasa, ngizakupha”,

khisibe unakho lokho akukhombelako.

₂₉Ungeluki amano wokulimaza omunye umuntu

ohlezi nawe ngokukwethemba.

₃₀Ungasoli umuntu ngaphandle kwesizathu

khisibe akakakoni ngalitho.

₃₁Ungafisi ipumelelo yomuntu onenturhu,

ungakhethi nayinye yeendlela zakhe,

₃₂ngombana uSomnini uyamnyenya ophambukela kizo,

kodwana unesikhozi nabaqotho.

₃₃Isithuweleliso sakaSomnini

siphezu kwekumba yokhohlakeleko,

kodwana ubusisa ihlalo yabalungileko.

₃₄Yena unyefula iinyefuli,

abazithobileko abaphe umusa.

₃₅Abahlakaniphileko bazuza idumo,

kodwana iindlhadlha zizandisela ihlazo.