IZAGA 4

₁Bantwana, lalelani ukuyala kwakababa,

niyelele ilwazi lokuzwisisa,

₂ngombana ngininikela umqondo omuhle;

ngalokho ningalahli ifundiswami.

₃Lokha nangisese msana kababa,

ngisese manzi ngiyithorwana kamma,

₄ubaba wangifundisa wathi kimi:

“Ihliziywakho ayibambisise amezwami.

Nawulonda imiyalwami, uzakuphila.

₅Nawuzuza ubuhlakani, uzakufumana ilwazi.

Ungakhohlwa begodu ungaphambuki

emezwini womlomami.

₆Nawungalahli ukuhlakanipha, kuzakulonda;

nawukuthandako, kuzakubulunga ipilwakho.

₇Ukuthoma kokuhlakanipha ngilokhu:

Zuza ubuhlakani

nangepahlakho yoke zuza ilwazi.

₈Nawuphatha kuhle ubuhlakani, buzakuphakamisa,

buzakudumisa nawubugonako.

₉Buzakwethwesa umbhode wokufaneza,

bukunikele isihlohlo sedumo.”

₁₀Lalela ndodanami,

nawamukela amezwami,

uzakwengezelelelwa iminyaka yokuphila.

₁₁Ngakufundisa indlela yokuhlakanipha,

ngakurholela emizileni elungileko.

₁₂Nawukhamba kiyo, angeze wathikamezeka,

nalokha nawugijimako, angeze wakhutjwa.

₁₃Bambelela ekuyalweni,

ungakulisi, kweluse

ngombana kukuphila kwakho.

₁₄Ungakhambi emzileni wabakhohlakeleko,

ungabeki inyawo endleleni yabambi.

₁₅Icwaye, ungakhambi kiyo;

deda kiyo uhlabele phambili.

₁₆Abambi abalali bangakenzi okumbi;

ubuthongo abehli bangakakhubazi umuntu.

₁₇Iye, bagoma isikwa sobukhohlakali,

basele iwayini lenturhu.

₁₈Umzila wabalungileko

ufana nomkhanyo welanga:

Ukusukela ekuphumeni kwalo,

umkhanyo lo ukhanya

ukuya ngokuya bekube semini.

₁₉Kodwana indlela yabakhohlakeleko,

ibumnyama obuphathekako,

abazi bona bakhutjwa yini.

₂₀Ndodanami, lalela amezwami;

ubeke indlebakho kilokho engikutjhoko.

₂₁Ungavumi kusuke emehlwenakho;

kulonde ngehliziywenakho,

₂₂ngombana kuyipilo kabakufunyanako,

nokuphiliswa komzimba woke.

₂₃Kikho koke okulondako,

yelusa khulu ihliziywakho,

ngombana imuthombo wokuphila.

₂₄Susa ikulumo yokonakala kuwe

nokuphambana kweembhena kube kude nawe.

₂₅Amehlwakho akaqale phambili,

ukugolozela kwakho kube phambi kwakho.

₂₆Utjheje umzila walapha ugadanga khona,

ngalokho iindlela zakho zizakunqopha.

₂₇Ungaphambukeli ngesigomeni namkha ngesinceleni,

susa inyawo lakho ebumbini.