AMARHUBO 121

Ngiqala eentabeni ngizibuze:

Isizo lami livelaphi na?

₂Isizo lami livela kuSomnini

owenze izulu nephasi.

₃Akasoze aliselela inyawo lakho likhutjwe,

umlondakho angekhe ayenda.

₄Mbala, umlondi ka-Israyeli

akayendi namkha alale.

₅USomnini ungumlondakho.

USomnini umthunzi ngesidleni sakho.

₆Ilanga angeze lakulimaza emini,

ngitjho nenyanga ebusuku.

₇USomnini uzakulonda ebumbini boke,

alonde nepilwakho.

₈Iye, uSomnini uzakulonda yoke indawo,

kusukela nje bekube nini nanini!