EKSODA 35

₁Yaba Moshe o bokella phutheho yohle ya bana ba Iseraele, a re ho bona: Ke tsena ditaba tseo Jehova a laetseng ho di etsa. ₂Ho tla sebetswa ka matsatsi a tsheletseng, mme letsatsi la bosupa ho lona e tla ba Sabatha ya phomolo e kgethetsweng Jehova; mang le mang ya ka etsang mosebetsi tsatsing leo, o tla bolawa. ₃Le se ke la besa mollo matlung wohle a lona ka tsatsi la Sabatha.

₄Moshe a bolella phutheho yohle ya bana ba Iseraele, a re: Se laetsweng ke Jehova ke sena: ₅Ntshang ho tsa lona seo le se abelang Jehova. Motho ka mong eo pelo ya hae e ratang, a ke a tlise se abetsweng Jehova, kgauta, silefera, le koporo; ₆purepera, sekarelata, krimsone, lene e ntle le boya ba podi; ₇matlalo a dipheleu a tlotsitsweng ka bofubedu, le matlalo a diqibi, le difate ta leoka; ₈ole ya ho bonesa, le dibano tsa ole ya setlolo, le dibano tse monko o monate; ₉mahakwe a onikse, le mahakwe a kenngwang dikoomaneng a efoda le a mokgajwana. ₁₀Banna bohle ba masene ba hara lona ba tle ba tle, ba sebetse tsohle tseo Jehova a di laetseng; ₁₁e le tabernakele le tente ya yona, le sekgurumetso sa yona, le mahokelo a yona, le dipolanka tsa yona, le maballo a yona, le ditshiya tsa yona, le didulwana tsa yona; ₁₂le areka le mejaro ya yona, le sekwahelo, le lesela le homilweng; ₁₃le tafole le mejaro ya yona, le mesebetsi yohle ya yona, le mahobe a pontsha; ₁₄le kandelare ya ho bonesa le mesebetsi ya yona, le dilampi tsa yona le ole ya ho bonesa; ₁₅le aletare ya dibano le mejaro ya yona, le ole ya setlolo le dibano tse nkgang hamonate, le lesela le homilweng la monyako le etsetswang monyako wa tabernakele; ₁₆le aletare ya ditjheso, le rostere ya koporo, le mejaro ya yona le mesebetsi ya yona, le morifi le sedulwana sa wona; ₁₇le masela a lebala, le ditshiya tsa lona le didulwana tsa tsona, le lesela le homilweng la monyako wa lebala; ₁₈le dithakgisa tsa tabernakele, le dithakgisa tsa lebala le mehala ya tsona; ₁₉le diaparo tsa ho etsa tshebeletso sehalalelong, e leng diaparo tse kgethehileng tsa Aarone moprista, le diaparo tsa bara ba hae, tsa ho etsa mosebetsi wa boprista.

₂₀Yaba phutheho yohle ya bana ba Iseraele e tloha ho Moshe.

₂₁Motho ka mong ya eleditsweng ke pelo ya hae le bohle ba pelo di ithatetseng, ba fihla ba tlisetsa Jehova dikabelo ho sebetsa tente ya pokano, le tsohle tsa tshebeletso ya yona, le diaparo tse kgethehileng. ₂₂Banna ba tla ba ena le basadi; bohle ba pelo tse ithatetseng ba tlisa dihaka, le masale, le ditona, le mefitshana, le mesebetsi e meng ya kgauta ya mefutafuta; motho ka mong a hlahisa mpho ya kgauta eo a e hlahisetsang Jehova. ₂₃E mong le e mong ya neng a ena le purepera, le sekarelata, le krimsone, le lene e ntle, le boya ba podi, le matlalo a dipheleu a tlotsitsweng ka bofubedu, le matlalo a diqibi, ba di tlisa. ₂₄Mang le mang ya ntshitseng karolo ya silefera le ya koporo e aroletsweng Jehova, a tlisa karolo e abetsweng Jehova: le bohle ba neng ba ena le difate tsa leoka tsa ho sebetsa mesebetsi ya tshebetso, ba di tlisa. ₂₅Basadi bohle ba masene ba loha ka matsoho a bona, mme ba tlisa seo ba se lohileng, e le purepera, sekarelata, le krimsone, le lene e ntle. ₂₆Basadi bohle ba eleditsweng ke pelo tsa bona, ba masene, ba loha boya ba podi. ₂₇Haele marenana, a tlisa mahakwe a onikse, le mahakwe a kenngwang dikoomaneng a efoda le a mokgajwana; ₂₈le dibano, le ole ya ho bonesa, le ole ya setlolo, le ya dibano tse monko o monate. ₂₉Bana ba Iseraele bohle le basadi bohle ba ithatetseng ho tlisa ntho tsa mosebetsi wohle oo Jehova a neng a laetse ka Moshe hore o etswe, ba tlisetsa Jehova dikabelo tsa boithatelo.

₃₀Yaba Moshe o re ho bana ba Iseraele: Bonang, Jehova o bitsitse ka lebitso la hae Betsaleele, mora Uri, mora Hure, wa leloko la Juda; ₃₁o mo tlatsitse ka moya wa Modimo, ka bohlale le ka kutlwisiso, le ka tsebo ya ho etsa mesebetsi yohle, ₃₂leha e le ho qapa e meng, le ho e etsa ka kgauta, le silefera, le koporo; ₃₃le ho betla mahakwe a kenngwang dikoomaneng, le ho betla difate, le ho etsa mesebetsi yohle e ka qapuwang. ₃₄O mo lemositse ho ruta ba bang; ho jwalo le bakeng sa Oholiabe, mora Akisamake, wa leloko la Dane. ₃₅O ba tlatsitse ka bohlale, hore ba tle ba sebetse mesebetsi yohle e sebetswang ke dibetli, le diqapi, le dihomi tsa purepera le sekarelata le krimsone le lene e ntle, le dilohi, hore ho etswe mesebetsi yohle e ka sebetswang le e ka qapuwang.