ESEKIELE 1

₁Eitse ka selemo sa mashome a mararo, ka kgwedi ya bone, ka tsatsi la bohlano la kgwedi, ha ke ne ke le hara ba isitsweng kgolehong nokeng ya Kebare, mahodimo a phetlwa, mme ka bona pono tse hlollang tsa Modimo. ₂Ka selemo sa bohlano sa ha morena Jojakine a isitswe kgolehong, ka la bohlano ho kgwedi, ₃lentswe la Jehova la tlela Esekiele, mora Busi moprista, a le naheng ya Bakalde, pela noka ya Kebare; letsoho la Jehova la eba ho yena hona teng.

₄Eitse ha ke tadima, ka bona moya wa sefefo o tswang leboya, ho le leru le leholo le tswakaneng le mollo, le benyang ka nqa tsohle; bohareng ba lona ho le ntho e kang koporo e hlenneng, kahare ho mollo; ₅bohareng ba mollo, ka bona ntho tse kang dibopuwa tse utlwang tse nne; haele tshobotsi ya tsona, di ne di na le tshobotsi ya batho. ₆Se seng le se seng se ne se na le difahleho tse nne, hape se seng le se seng se ne se na le dipheo tse nne. ₇Maoto a tsona e ne e le maoto a tsepameng; haele bohato ba maoto a tsona, e ne e ka bohato ba tlhako tsa namane; a ne a benya jwalokaha ho benya koporo e bentshitsweng. ₈Mahlakoreng a tsona a mane, ho ne ho hlaha matsoho a kang a motho, a tswang tlasa dipheo tsa tsona; haele bone ba tsona, di ne di na le difahleho tsa tsona le dipheo tsa tsona. ₉Dipheo tsa tsona di tshwarane; ho tsamayeng, di ne di sa tswedipane; di ntse di tsamaya di lokile feela. ₁₀Haele tshobotsi ya difahleho tsa tsona, bone ba tsona di ne di na le sefahleho sa monna, le sefahleho sa tau ka nqa ho le letona; hape, bone ba tsona di ne di na le sefahleho sa poho ka nqa ho le letshehadi; hapehape, tse nne di ne di na le sefahleho sa ntsu. ₁₁Ke tsona difahleho tsa tsona. Haele dipheo, di ne di arohane nqa hodimo; se seng le se seng se ne se na le dipheo tse pedi tse tshwaraneng, tse pedi tse ding di ne di apesa mmele ya tsona. ₁₂Di ne di tsamaya se seng le se seng se lokile tsela, di ya moo moya o ratang ho ya; ho tsamayeng ha tsona, di ne di sa tswedipane. ₁₃Haele ponahalo ya dibopuwa tse utlwang, ponahalo ya tsona e ne e ka mashala a mollo a hlenneng, leha e le jwaloka dirumula. Mollo oo o ne o tsamaya le dibopuwa tse utlwang; mollo oo o ne o benya, mme mollong ho ne ho etswa mahadima. ₁₄Dibopuwa di ne di ya di matha, di boye, di tshwana le tladi.

₁₅Eitse ha ke tadima dibopuwa, ka bona lebidi fatshe, pela dibopuwa ka nqa tse nne. ₁₆Ponahalo ya mabidi le mokgwa wa wona e ne e ka ponahalo ya krisolithe, bone ba wona a ne a na le sebopeho se le seng; ponahalo ya wona le mokgwa wa wona ho ne ho le jwaloka hoja lebidi le leng le kene kahare ho le leng. ₁₇Ho tsamayeng ha wona, a ne a tsamaya ka dintlha tse nne tsa wona; ho tsamayeng ha wona, a ne a sa bidikane. ₁₈Haele difeleng tsa wona, di ne di phahame, di tshabeha; hape, difeleng tsa wona, mabiding a mane, di ne di tletse mahlo kahohle. ₁₉Enereha dibopuwa di tsamaya, mabidi le wona a tsamaye maloka le tsona; enereha dibopuwa di tloha fatshe, le wona mabidi a tlohe maloka le tsona. ₂₀Di ne di ya moo moya o ratang ho ya teng; enereha moya o rata ho ya nqa e itseng, ebe mabidi a tloha maloka le tsona, hobane moya wa sebopuwa o ne o le mabiding. ₂₁Enereha di tsamaya, le wona a tsamaye; ha di ne di ema, le wona a eme; ereha di tloha fatshe, mabidi le wona a tlohe maloka le tsona, hobane moya wa sebopuwa o ne o le mabiding.

₂₂Ho okametseng dihlooho tsa dibopuwa e ne e le ntho e kang sebaka se tshwanang le kristale e tsotehang, e adilweng kahodimo ho dihlooho tsa tsona nqa hodimo. ₂₃Katlase ho sebaka, e ne e le tsona dipheo tsa tsona, di otlolohile, di bapile; se seng le se seng se ne se na le tse pedi tse apesang mmele ya sona. ₂₄Enereha di tsamaya, ke ne ke utlwa modumo wa dipheo tsa tsona eka modumo wa metsi a mangata, hape eka lentswe la Ya matla wohle, e le modumo wa tlatlarietso, o kang modumo o diahelong. Ereha di ema, di lepeletse dipheo tsa tsona. ₂₅Lentswe le ne le le teng le tlohang hodimo sebakeng se okametseng dihlooho tsa tsona. Ereha di ema, di lepeletse dipheo tsa tsona.

₂₆Kahodimo ho sebaka se okametseng dihlooho tsa tsona, ho ne ho le ntho e kang lehakwe la safire, e nang le sebopeho sa terone; mme sebopehong sa terone, ho ne ho le ntho e kang sebopeho sa motho ya dutseng ho yona, nqa hodimo. ₂₇Mme ka bona ho kang koporo e hlenneng, hoo e kang ke mollo o mo etseditseng bodulo ka nqa tsohle; ho tloha ho hoo e kang ke letheka la hae, nqa hodimo, le ho tloha ho hoo e kang le letheka la hae, nqa tlase, ka bona eka ke mollo le kganya e mo teelang hare. ₂₈Jwaloka ponahalo ya mookodi ha o bonahala lerung mohla pula, ponahalo ya kganya eo ka nqa tsohle e ne e le jwalo. E ne e ka ponahalo ya kganya ya Jehova. Eitse ha ke bona hoo, ka itiha ka sefahleho sa ka, mme ka utlwa lentswe la e mong ya buang.