DILLO TSA JEREMIA 5

₁Hopola, Jehova, seo re hlahetsweng ke sona; tadima, o bone sekgobo sa rona. ₂Lefa la rona le ile ho baditjhaba, le matlo a rona ho basele. ₃Re entswe dikgutsana tse se nang ntata tsona, bomma rona ba jwaloka bahlolohadi. ₄Re nwa metsi a rona ka tjhelete, patsi ya rona re e bona ka theko. ₅Re phallelwa habohloko, re kgathetse, mme ha ho phomolo ho rona. ₆Re otlolletse matsoho a rona ho Baegepeta le ho Baassiria ho bona bohobe. ₇Bontata rona ba sitilwe, ba se ba le siyo, mme rona re jere makgopo a bona. ₈Re buswa ke makgoba, ha ho ya re namolelang matsohong a bona. ₉Re bokella bohobe ba rona ka ho ipeela lefung pela lerumo la lefeella. ₁₀Letlalo la rona le tlabohile ke bohale ba tlala, jwaloka leifo.

₁₁Ba betile basadi Sione, le barwetsana metseng ya Juda. ₁₂Marena a mang a fanyehwa ke matsoho a bona, sefahleho sa baholo ha se a ka sa hlonephuwa. ₁₃Bahlankana ba jarisitswe malwala, ba batjha ba imetswe ke diphahlo tsa dipatsi. ₁₄Baholo ba hladile lekgotla, bahlankana ba tlohetse dipina tsa bona. ₁₅Thabo ya dipelo tsa rona e fedile, pina ya rona e fetohile mahlomola. ₁₆Moqhaka o wele dihloohong tsa rona; ho madimabe rona, hobane re sitilwe. ₁₇Ka baka leo, dipelo tsa rona di a fela, ka baka la tseo mahlo a rona a fifetse. ₁₈Thaba ya Sione e senyehile, diphokojwe di itsamaela teng.

₁₉Wena, Jehova, o busa ka ho sa feleng, terone ya hao e teng kamehla le mehla. ₂₀Na o ka re lebala ka ho sa feleng? Na o ka re hloboha ka ditshiu tse telele na? ₂₁O re sokollele ho wena, Jehova, etlaba, re sokolohile; o ntjhafatse ditshiu tsa rona, di be jwaloka mehleng ya pele. ₂₂Na o re lahletse ruri na? Na o re hlonametse ka ho fetisa na?