DIPROVERBIA 26

₁Jwaloka lehlwa ha le sa tshwanele lehlabula, leha e le pula mohla kotulo, le yona hlompho ha e lokele lehlanya.

₂Jwaloka nonyana ha e fofafofela mona le mane, le lefokotsane ha le okaokela feela, ho jwalo thohako ya lefeela, ha e sebetse letho.

₃Pere e lokelwa ke phafa, le esele ke tomo; mokokotlo wa lehlanya le wona o lokelwa ke thupa.

₄O se ke wa fetola lehlanya ka bohlanya ba lona, esere mohlomong le wena wa tshwana le lona.

₅O fetole lehlanya ka tsa bohlanya ba lona, esere mohlomong la ipona bohlale mahlong a lona.

₆Ya romelang ditaba ka lehlanya o ikgaola maoto, o inwella tshenyo.

₇Jwalokaha maoto a sehole a leketla feela, polelo ya bohlale e jwalo melomong ya mahlanya.

₈Ho rorisa lehlanya ke ho tlamella lejwana ka letjeketjaneng.

₉Polelo ya bohlale molomong wa lehlanya e jwaloka meutlwa letsohong la letahwa.

₁₀Motho ya tholang lehlanya le basebi, o jwaloka mohlabani ya hlabang bohle.

₁₁Jwaloka ha ntja e boela mahlatseng a yona, lewatla le boela jwalo bowatleng ba lona.

₁₂Ana o bone motho ya iponang bohlale? Lehlanya le tshepisa ho fetisa eo.

₁₃Sekgoba se re: Tau e rorang e teng tseleng, tau e bohale e mabaleng.

₁₄Lemati la monyako le iphetola mahokelong a lona, le motswafi diphateng tsa hae.

₁₅Sekgoba se isa letsoho ho ngwatha lefisong; empa se tswafa ho le busetsa molomong.

₁₆Sekgoba se ipona bohlale ho fetisa ba supileng ba arabang ka masene.

₁₇Mofetakatsela ya kenang komang tsa ba bang ka bohale, o tshwara ntja ka ditsebe.

₁₈Ya thetsang wa habo o tshwana le motho ya soro, ya betsang dirumula le metsu le lefu, ₁₉a re: Na ke ne ke sa bapale na?

₂₀Mollo o tima ke ho hlokeha ha patsi; ho jwalo dikomang, di fela ha mosebi a le siyo.

₂₁Mashala a matsho a etsa mashala a hlenneng, patsi e hotetsa mollo; ho jwalo motho ya dikomang, o tukisa dikgang.

₂₂Dipolelo tsa mosebi di ka dijo tse hlabosang, di kena di tebela hare ka maleng.

₂₃Melomo e tukang le pelo e mpe, di jwaloka lelwapi la silefera le manehilweng hodima pitsa ya letsopa.

₂₄Ya hloyang o ikgakanya ka melomo ya hae, mme ka pelong o rera thetso; ₂₅leha a bua ka mosa, o se ke wa kgolwa ke yena, hobane manyala a supileng a ka pelong ho yena.

₂₆Hloyo e ipata ho ikgakanyeng, empa bolotsana ba yona bo tla senolwa pitsong.

₂₇Ya tjhekang lemena o tla wela teng, mme lejwe le tla boela hodima ya le thetang.

₂₈Leleme le leshano le hloile ba hlabilweng ke lona, mme molomo o qekisang o hlahisa tshenyeho.