PESALEME YA 17

₁Jehova, mamela ho loka; o sekehele mehoweletso ya ka tsebe; o utlwe ha ke rapela ka molomo o se nang thetso! ₂Toka ya ka a e ke e hlahe pela hao, mahlo a hao a ke a lemohe bokgabane ba ka. ₃O lekola pelo ya ka, o e batlisisa le ka bosiu; o ntekile, mme ha o ka wa fihlela bobe ho nna; bokgopo ha bo yo molomong wa ka. ₄Ha ke lemoha diketso tsa batho, ka lentswe la hao ke sesefile ditsela tsa batho ba sehloho. ₅Maoto a ka a tiile mehlaleng ya hao, maoto a ka ha a thekesele.

₆Oho Modimo, ke bitsa ho wena, hobane o a nkutlwa; sekehela tsebe ho nna, o mamele polelo ya ka. ₇O bonahatse mehauhelo ya hao, wena ya bolokang ya tshabelang ho wena ka letsoho le letona la hao, ka baka la ba mo lwantshang! ₈O mpoloke jwaloka thaka ya leihlo la hao, ₉o mpate tlasa mapheo a hao, ho ba babe ba ntsohelang matla, le ho dira tse batlang bophelo ba ka, tse nkopetseng ka bohale. ₁₀Ba ikwalla dipelo tsa bona tse nonneng, ka melomo ya bona ba ipuella ka boikakaso. ₁₁Ba teetse metsamao ya rona hare, ba hlwela ka mahlo ho re dihela fatshe; ₁₂ba jwaloka tau e lakatsang ho harola, le jwaloka tawana e laletseng letsabeng la yona.

₁₃Tsoha, Jehova, o ba futuhele, o ba dihe! O mpoloke ka lerumo la hao ho bakgopo; ₁₄ka letsoho la hao, Jehova, o mpoloke ho batho, ho batho ba lefatshe lena! Ba na le kabelo ya bona bophelong bona, o tlatsitse dimpa tsa bona ka maruo a hao; bara ba bona ba kgora, mme ba siela ditloholo tsa bona ho salang. ₁₅Haele nna, ho lokeng ha ka ke boha sefahleho sa hao, mme ha ke phaphama, ke tla kgora sefahleho sa hao.