Solomone o nyala morali oa Faro
1Solomone a etsa selekane le Faro, khosi ea Egepeta, ka ho nyala morali oa Faro. A mo bēkela Motseng oa Davida, hobane o ne a e-s'o hahe ntlo ea khosi, le Tempele ea Morena, le lerako le pota-potang Jerusalema. 2Feela sechaba se ne se ntse se etsetsa mahlabelo libakeng tseo ho rapelloang melimo ea bohata ho tsona, hobane ho fihlela ka nako eo, Morena o ne a e-s'o ka a haheloa Tempele.
Solomone o kōpa hore a fuoe bohlale
3Solomone o ne a rata Morena, a latela litaelo tsa Davida, ntat'ae. Feela o ne a ntse a etsetsa mahlabelo libakeng tseo ho rapelloang melimo ea bohata ho tsona, le mokubetso a e chesetsa hona teng.
4Khosi ea ea Gibeone ho ea etsetsa mahlabelo teng, hobane sebaka seo e ne e le sa borapeli se tumileng. Solomone a etsetsa linyehelo tsa secheso tse sekete holim'a aletare e hona teng. 5Hona moo Gibeone, Morena a itlhahisa ho Solomone torong, bosiu, a re: “Kōpa seo u lakatsang hore ke u fe sona.”
6Solomone a re: “U bile mohau haholo ho ntate, ho Davida mohlanka oa hao, hobane le eena a ile a tšepahala ho uena, a etsa tse lokileng, a hloka mano. Le kajeno u sa 'montšitse mohau ona o moholo, ka ho bea mora oa hae teroneng.
7“Uena, Morena Molimo oa ka, u entse hore 'na mohlanka oa hao, ke be khosi, ke hlahlame Davida, ntate. Empa 'na ke sa le ngoana, ha ke tsebe hore na ho busoa joang. 8Mohlanka oa hao o busa sechaba sa hao, seo u ikhethetseng sona, se sengata hoo se ke keng sa baloa. 9Ka baka leo, ak'u nee mohlanka oa hao bohlale, hore a tsebe ho busa sechaba sa hao, a hlalohanye botle ho bobe. Ke mang ea ka tsebang ho busa sechaba se sekaale-kaale?”
10Kōpo ena ea Solomone ea khahla Morena, 11'me Molimo a re ho eena: “Erekaha u kōpile hona, u sa ikōpela hore u phele halelele, kapa u rue, kapa u timetse lira tsa hao, u mpa u ikōpetse bohlale ba ho tseba se lokileng, 12ke u etsetsa joalokaha u kōpile. Ke u nea bohlale, le kutloisiso, tseo ho seng motho ea kileng a ba le tsona, 'me ho seng ea tla ke a be le tsona. 13Hape ke u nea le seo u sa kang ua se kōpa. Ha u sa ntse u phela, ke tla u nea maruo le tlōtla, e leng tseo ho e-s'o be le khosi e kileng ea e-ba le tsona. 14Haeba u ka tsamaea ka litsela tsa ka, ua bōlōka litaelo tsa ka, le melao ea ka, joalokaha Davida, ntat'ao, a ile a etsa, ke tla lelefatsa bophelo ba hao.”
15Ha Solomone a phaphama, a elelloa hore o ne a ntse a lora. Eaba o ea Jerusalema, o fihla a ema kapele ho areka ea selekane sa Morena, a etsa nyehelo ea secheso, le nyehelo ea teboho, 'me a etsetsa le matona 'ohle a hae mokete.
Liotsoa tse peli li ipiletsa ho Solomone
16Joale basali ba babeli ba liotsoa ba ea ho khosi, ba fihla ba ema kapele ho eona. 17Mosali e mong a re: “Oho, mong'a ka, rōna le mosali enoa re phela ka tlung e le 'ngoe, 'me ke ile ka beleha ngoana ke e-na le mosali enoa ka tlung. 18Ha ho fetile matsatsi a mararo ke belehile, mosali enoa le eena o ile a beleha. Re ne re e-na le eena, ho se motho e mong ea nang le rōna ka tlung, haese rōna ba babeli feela.
19“Ngoana oa mosali enoa a shoa bosiu, kaha 'm'ae a ile a mo hata. 20Mosali enoa ke ha a tsoha har'a bosiu, lekhabunyane la hao le sa khalehile, a nka mora oa ka lehlakoreng la ka, a robala le eena, 'me a kenya ngoana oa hae ea shoeleng ka likobong tsa ka. 21Hoseng ha ke tsoha, ke re ke nyantša ngoana oa ka, ka fumana hore o shoele. Empa ha ke mo talimisisa, ha ho se ho elile, ka bona hore hase mora oa ka, eo ke mo tsoetseng.”
22Mosali oa bobeli a re: “Che! Ngoana ea phelang ke mora oa ka; mora oa hao ke ea shoeleng.”
Oa pele le eena a re: “Che! Mora oa hao ke ea shoeleng; oa ka ke ea phelang.” Ba ngangisana joalo kapele ho khosi.
Solomone o ahlōlela liotsoa
23Joale khosi ea re: “Enoa o re: ‘Mora enoa ea phelang ke oa ka, oa hao ke ea shoeleng;’ enoa le eena o re: ‘Che! mora oa hao ke ea shoeleng, oa ka ke ea phelang.’ ”
24Khosi ea re: “Ntlisetseng sabole!” Eaba ba tlisetsa khosi sabole. 25Khosi ea boela ea re: “Khekhethang ngoana enoa ea phelang, le nee mosali e mong le e mong mokhekhetho!”
26Ka baka la motlopotlo oa ho tsoala, mosali eo ngoana ea phelang e neng e le oa hae a bua, a re ho khosi: “Oho, mong'a ka, mpe u nee mosali enoa ngoana enoa ea phelang, u se ke ua 'molaea.”
Empa mosali oa bobeli eena a re: “E se be oa ka kapa oa hao! A hle a khekhethoe!”
27Joale khosi ea re: “Neang mosali oa pele ngoana ea phelang, le se ke la 'molaea! Ke eena 'm'ae.”
28Ha Baiseraele bohle ba utloa kahlōlo e entsoeng ke khosi, ba hlompha khosi, ba e tšaba, hobane ba ile ba hlokomela hore Solomone o na le bohlale ba Molimo, ba ho ahlōla ka toka.
