DANIELE 11

₁“Ka selemo sa pele sa puso ea Dariuse oa Momede, ke ile ka mo tšehetsa, ka mo sireletsa.

₂“Joale ke tla u bolella 'nete. Bona mona, ho sa tla ba teng hape likhosi tse tharo naheng ea Peresiea. Ea bone e tla rua ho li feta kaofela. Ka baka la matla a eona a tsoaloang ke maruo a eona, e tla hlohleletsa tse ling tsohle ho tsohela 'muso oa Bagerike matla.

₃“Empa khosi e 'ngoe e matla, e tla hlaha, e buse ka matla a maholo, 'me e iketsetse borata. ₄Ha e se e phahame, 'muso oa eona o tla oa, o aroloe likarolo tse 'ne. Likhosi tseo e seng litlōhōlō sa khosi eo li tla busa tulong tsa eona, hobane 'muso oa eona o tla felisoa, o neoe likhosi lisele, empa li ke ke tsa e-ba le matla ao e neng e busa ka 'ona.

₅“Khosi ea Egepeta e tla ba matla, empa e mong oa balaoli ba eona o tla ba matla ho e feta, a be a okamele 'muso o fetang oa khosi eo. ₆Ha ho fetile lilemo tse itseng, khosi ea Egepeta e tla etsa selekane le khosi ea Siria, e e nyalise morali oa eona. Empa selekane seo se ke ke sa tiea, 'me morali eo, le mafielo a hae, le ngoana oa hae, le monna oa hae, batho bana bohle ba tla bolaoa.

₇“Kamora' moo, e mong oa lelōko la mosali eo e tla ba khosi. O tla futuhela mabōtho a khosi ea Siria, a hape qhobosheane ea 'ona, 'me a a hlōle. ₈O tla khutlela Egepeta a hapile melimo ea bona ea bohata le melingoana ea bona, le thepa ea bona ea silefera le ea khauta, e etselitsoeng melingoana eo. O tla qeta lilemo tse ngata a sa futuhele khosi ea Siria. ₉Khosi ea Siria e tla futuhela khosi ea Egepeta, empa e tla etsa sealō, e khutlele naheng ea eona. ₁₀Bara ba khosi eo ea Siria ba tla hlomela, ba khōbōkanye mabōtho a mangata, a maholo, a tla tla ka sekhahla joaloka morallo, a futuhele qhobosheane ea ba lireng.

₁₁“Khosi ea Egepeta e tla tlōkōma ke khalefo, e futuhele khosi ea Siria. Khosi eo ea Siria e tla khōbōkanya mabōtho a mangata, empa a tla hlōloa. ₁₂Khosi eo e hlōtseng e tla ikhōhōmōsa ka tlhōlo ea eona, le ka bahlabani ba likete-kete bao e ba bolaileng, empa e ke ke ea boela ea hlōla. ₁₃Khosi ea Siria e tla khutlela naheng ea eona, e e'o khōbōkanya mabōtho a fetang a pele ka bongata. Ha ho fetile lilemo tse itseng e tla futuha ka mabōtho a mangata, a hlometseng haholo.

₁₄“Ka nako eo, sechaba se sengata se tla fetohela khosi ea Egepeta. Le kahar'a sechaba sa heno, uena Daniele, ho tla hlaha banna ba khantšang likhōka, ba e fetohele, e le hore pono ena e tle e phethahale; feela ba tla hlōloa. ₁₅Khosi ea Siria e tla fihla e hahe marako a phahameng ho pota-pota metse e hahelelitsoeng, 'me e e hape. Bahlabani ba Egepeta ba ke ke ba ema kapele ho khosi ea Siria, esita le mokhetho oa Egepeta o tla felloa ke matla. ₁₆Khosi eo ea Siria e futuhang e tla iketsetsa borata ka bona, 'me ha ho ea tla e ema kapele. E tla kena naheng ea Kanana, eo e tla e timetsa ka letsoho le eona. ₁₇Khosi eo e tla futuha ka mabōtho a eona 'ohle. E tla etsa selekane le khosi ea Egepeta, 'me hore 'muso oa Egepeta o tle o oe, e tla nyalisa khosi eo ea Egepeta morali oa eona; feela morero oo oa ho liha 'muso o ke ke oa atleha. ₁₈Hamorao e tla futuhela lichaba tse ahileng mabōpong a leoatle, 'me e hape tse ngata. Empa molaoli e mong osele o tla e hlōla, a felise boikhōhōmōso ba eona. Ruri boikhōhōmōso ba khosi ea Siria bo tla fetohela mong'a bona. ₁₉Khosi eo e tla khutlela liqhobosheaneng tsa naha ea habo eona, empa e tla hlōloa, 'me e timelle ruri.

₂₀“E tla hlahlangoa ke khosi e 'ngoe, e tla rōmela 'mokelli oa lekhetho, e le hore leruo la 'muso oa eona le tle le eketsehe. Empa kamora' nakoana khosi eo e tla bolaoa ka sekhukhu, e seng ntoeng.

₂₁“Khosi ea Siria e tla hlahlangoa ke monna ea khopo, ea sa lokelang ho ba khosi. Monna eo o tla tla a sa lebelloa, a ikhapele 'muso ka bolotsana. ₂₂Bohle ba mo emang kapele o tla ba hōhōla joalokaha sekhōhōla se hōhōla, a ba timetse, a timetse le eona khosana ea selekane. ₂₃Ka ho etsa lilekane tsa bolotsana o tla matlafala, a hape puso, le hoja palo ea sechaba seo a se busang e fokola. ₂₄O tla tsometsa linaha tse ruileng, a li futuhele, a etse lintho tseo baholo-holo ba hae ba sa kang ba tseba ho li etsa; a arolele balateli ba hae thepa le maruo ao a a hapileng ntoeng. O tla etsa merero ea ho futuhela liqhobosheane, empa nako e tla mo khaoletsa.

₂₅“O tla ba sebete ho khōbōkanya mabōtho a mangata, a futuhele khosi ea Egepeta. Khosi eo ea Egepeta e tla itoanela ka lebōtho le leholo, le matla, empa e ke ke ea atleha, hobane e tla etsetsoa bolotsana. ₂₆Batšepuoa ba eona ba tla e liha. E tla bolaeloa bahlabani ba bangata, 'me lebōtho leo la eona le timetsoe. ₂₇Likhosi tsena tse peli li tla jela tafoleng e le 'ngoe, empa lipelo tsa tsona li tletse bokhopo, li bolellana mashano. Li ke ke tsa fumana seo li se batlang, hobane nako e baliloeng ha e e-s'o fihle. ₂₈Khosi ea Siria e tla khutlela ha habo eona le matlotlo ao e a hapileng, e ikemiselitse ho senya selekane se halalelang. E tla iketsetsa borata, e ntan'o ipoella ha habo eona.

₂₉“Ha nako e baliloeng e fihla, khosi ena ea Siria e tla futuhela Egepeta hape, empa lekhetlong lena la bobeli ho ke ke ha tšoana le lekhetlong la pele. ₃₀Ba Kitime ba tla e futuhela ka likepe, 'me e tla khathala matla. E tla khutla e halefile, e fihle e hlatsetse khalefo ea eona holim'a selekane se halalelang, ebe e hauhela ba koenehetseng selekane seo.

₃₁“Bahlabani ba khosi ea Siria ba tla silafatsa Tempele, ba felise sehlabelo sa letsatsi le letsatsi, 'me kahar'a Tempele eo ba bee Manyala a Tšenyeho. ₃₂Ba koenehetseng selekane e tla ba hapa ka leleme le monate, empa sechaba se tsebang Molimo oa sona se tla e hanyetsa se tiile.

₃₃“Bahlalefi ba tla ruta batho ba bangata, le hoja ka nakoana ba tla bolaoa ka sabole, ba chesoe ka mollo, ba thōpuoe, ba jeoe le maruo a bona. ₃₄Ha sechaba sena se ntse se bolaoa joalo, se tla fumana thuso e seng kae, empa ba bangata ba tla se khōmarela ka bolotsana. ₃₅Ba bang ba ba bohlale ba tla khōptjoa, e le hore ba tle ba lekoe, ba hloekisoe, ba ntlafatsoe, ho fihlela nako ea bofelo e beiloeng e fihla.

₃₆“Khosi ea Siria e tla iketsetsa borata, e iphahamise, e ithorise ka ho re e matla ho feta melimo eohle, 'me e nyefole le Molimo oa melimo. E tla atleha ho be ho fihle nako ea khalefo, hobane se laotsoeng eka khona se phethahale. ₃₇Khosi eo e ke ke ea tsotella melimo ea bo-ntat'a eona, kapa molimo o ratoang haholo ke basali, leha e le molimo ofe kapa ofe, empa e tla iphahamisa ho feta melimo eo eohle. ₃₈Bakeng sa melimo eo, khosi eo e tla hlompha molimo o sireletsang liqhobosheane, e leng molimo oo bo-ntat'a khosi eo ba sa kang ba o tseba. Khosi eo e tla o nyehella ka khauta, le ka silefera, le ka mahakoe a bohlokoa, le ka limpho tse khahlehang. ₃₉Ka thuso ea molimo osele, khosi eo e tla futuhela liqhobosheane tse matla ka ho fetisisia, 'me bohle ba ipeang tlas'a puso ea eona e ba tlōtle, e ba etse babusi holim'a sechaba se sengata, e ba putse ka ho ba arolela naha.

₄₀“Ha mehla ea bofelo e fihla, khosi ea Egepeta e tla futuhela khosi ea Siria, empa khosi eo ea Siria le eona e tla khahlanyetsa khosi ea Egepeta joaloka setsokotsane, ka likariki tsa ntoa, le ka bapalami ba lipere, le ka likepe tse ngata. E tla futuhela linaha tse ngata, e li hōhōle joaloka sekhōhōla. ₄₁E tla futuhela le naha ea Kanana, e hape linaha tse ngata, empa baahi ba Edomo le ba Moabe le baholo ba Baamone, bona ba tla phonyoha matsohong a eona. ₄₂Puso ea eona e tla namela linaheng tse ngata, 'me le naha ea Egepeta e ke ke ea phonyoha. ₄₃E tla ikhapela matlotlo a khauta le a silefera, le maruo 'ohle a bohlokoa a Egepeta, 'me Balebia le Bakushe ba tla e sebeletsa. ₄₄Empa e tla tšosoa ke malume a hlahang bochabela le lebōea, e futuhe ka khalefo e kholo, 'me e ripitle, e timetse ba bangata. ₄₅E tla hloma litente tsa eona tsa bokhosi pakeng tsa leoatle le thaba e tlōtlehang, e halalelang, 'me khosi eo e tla timela ho se ea e thusetsang.