DANIELE 3

₁Khosi Nebukadenesare a etsa setšoantšo sa khauta: Bophahamo ba sona e le limethara tse mashome a mabeli a metso e supileng, botenya ba sona e le limethara tse tharo; a se emisa phuleng ea Dura, naheng ea Babilona. ₂Joale khosi Nebukadenesare a mema mahosana, le babusisi, le balaoli, le baeletsi, le bo-ramatlotlo, le baahlōli, le mapolesa, le babusi bohle ba linaha hore ba be teng ha ho khakoloa setšoantšo seo khosi Nebukadenesare a neng a se emisitse. ₃Eaba mahosana le babusisi, le balaoli, le baeletsi, le bo-ramatlotlo, le baahlōli, le mapolesa, le babusi bohle ba linaha, ba phutheha bohle ho tla khakola setšoantšo seo khosi Nebukadenesare a neng a se emisitse. Ba fihla ba ema kapele ho setšoantšo seo Nebukadenesare a neng a se emisitse.

₄Eaba seboholi se hōoeletsa haholo, se re: “Lōna batho ba lichaba tsohle, le ba merabe eohle, le ba lipuo tsohle, taelo ke ena: ₅Hang ha le utloa ho letsoa lenaka, le lekolilo, le harepa, le lekōōpe, le seletsa se khoele li leshome, le liphala, le 'mino oa mefuta eohle, le itihele fatše, le khumamele setšoantšo sa khauta, seo khosi Nebukadenesare a se emisitseng. ₆Mang le mang ea sa tl'o itihela fatše, a khumamele setšoantšo, hang-hang o tla akheloa kahar'a sebōpi se tukang malakabe.”

₇Ka baka leo, eitse hang-hang ha ho utloahala ho lla ha lenaka, le ha lekolilo, le ha harepa, le ha lekōōpe, le ha seletsa se likhoele li leshome, le 'mino oa mefuta eohle, batho ba lichaba tsohle, le ba merabe eohle, le ba lipuo tsohle, ba itihela fatše, ba khumamela setšoantšo sa khauta seo khosi Nebukadenesare a neng a se emisitse.

₈Ka eona nako eo, Bakalatiea ba bang ba fihla ba qōsa Bajuda. ₉Ba bua ho khosi Nebukadenesare, ba re: “Oho, uena khosi, ak'u re phelele kamehla eohle! ₁₀Uena khosi, u entse taelo ea hore motho ka mong ha a utloa ho lla ha lenaka, le ha lekolilo, le ha harepa, le ha lekōōpe, le ha seletsa se khoele li leshome, le ha liphala, le 'mino oa mefuta eohle, a itihele fatše, a khumamele setšoantšo sa khauta. ₁₁Mang le mang ea sa tl'o itihela fatše ho se khumamela, o tla akheloa kahar'a sebōpi se tukang malakabe. ₁₂Ho na le Bajuda ba bang, bao u ba beileng hore e be batsamaisi ba puso ea naha ea Babilona, e leng bo-Shaderaka le Meshake le Abedenego; banna bana, khosi, ha ba u natse. Ha ba sebeletse melimo ea hao, leha e le ho khumamela setšoantšo sa khauta seo u se emisitseng.”

₁₃Joale khalefo ea Nebukadenesare ea tlōkōma, 'me a laela hore a bitsetsoe bo-Shaderaka le Meshake le Abedenego. Eaba banna bana ba tlisoa kapele ho khosi. ₁₄Nebukadenesare a ba botsa, a re: “Na ke 'nete hore lōna Shaderaka le Meshake le Abedenego ha le sebeletse melimo ea ka, leha e le ho khumamela setšoantšo sa khauta seo ke se emisitseng? ₁₅Joale, haeba le itokiselitse hore ha le utloa ho lla ha lenaka, le ha lekolilo, le ha harepa, le ha lekōōpe, le ha seletsa se khoele li leshome, le ha liphala, le 'mino oa mefuta eohle, le tla itihela fatše, le khumamele setšoantšo seo ke se entseng, e tla ba ho lokile. Empa haeba le sa se khumamele, le tla akheloa hang-hang kahar'a sebōpi se tukang malakabe. Ebe molimo eo ea ka le namolelang matsohong a ka ke mang?”

₁₆Bo-Shaderaka le Meshake le Abedenego ba araba khosi, ba re: “Uena Nebukadenesare, ha ho hlokahale hore re ikarabelle tabeng ena. ₁₇Haeba ho ka ba joalo, Molimo oa rōna eo re mo sebeletsang, o na le matla a ho re pholosa sebōping se tukang malakabe, 'me o tla re namolela matsohong a hao, uena khosi. ₁₈Empa haeba ho ke ke ha e-ba joalo, ak'u tsebe, uena khosi, hore re ke ke ra sebeletsa melimo ea hao, kapa ra khumamela setšoantšo sa khauta seo u se emisitseng.”

₁₉Joale khalefo ea Nebukadenesare ea tlōkōma, a sosobanyetsa bo-Shaderaka le Meshake le Abedenego sefahleho. A laela hore sebōpi sa mollo se besoe hasupa ho feta mehla. ₂₀A ba a laela le bahlabani ba hae ba liqhenqhahali hore ba tlame bo-Shaderaka le Meshake le Abedenego, ba ba akhele kahar'a sebōpi se tukang malakabe. ₂₁Eaba banna bana ba tlangoa ba ntse ba apere liaparo tsa bona, ba tenne marikhoe, ba roetse lituku, ba apere le liaparo tse ling, 'me ba akheloa kahar'a sebōpi se tukang malakabe. ₂₂Ka baka la hobane khosi e ne e entse taelo e thata ea hore sebōpi se besoe ho feta tekanyo, malakabe a mollo a ile a bolaea banna ba neng ba kakasitse bo-Shaderaka le Meshake le Abedenego. ₂₃Banna ba ba bararo, e leng bo-Shaderaka le Meshake le Abedenego, ba ile ba oela ka sebōping se tukang malakabe ba ntse ba tlanngoe sekōlōkōtō.

₂₄Eaba khosi Nebukadenesare o raoha fatše, a maketse; a botsa baeletsi ba hae, a re: “Na ha rea ka ra akhela banna ba bararo kahar'a mollo, ba tlanngoe sekōlōkōtō?”

Baeletsi ba araba, ba re: “Ke 'nete ho joalo, khosi ea rōna!”

₂₅Khosi ea re: “Bonang! Ke bona banna ba bane ba tlamolotsoeng, ba ntseng ba itsamaela har'a mollo, empa ba sa che. Sebōpeho sa monna oa bone se tšoana le sa molimo!”

₂₆Eaba Nebukadenesare o atamela pel'a monyako oa sebōpi se tukang malakabe, oa hōoeletsa, o re: “Shaderaka! Meshake! Abedenego! Lōna bahlanka ba Molimo ea holimo-limo, tsoang le tle koano!”

Eaba bo-Shaderaka le Meshake le Abedenego ba tsoa kahar'a mollo. ₂₇Mahosana le babusisi le balaoli le baeletsi ba khosi ba ba bokanela, 'me ba bona hore mollo ha oa ba etsa letho 'meleng, leha e le ho tlabola qōba ea moriri oa bona. Liaparo tsa bona li ne li sa cha, le monko oa ho chesoa ke mollo o sa utloahale.

₂₈Eaba Nebukadenesare oa bua, o re: “Ho bokoe Molimo oa bo-Shaderaka le Meshake le Abedenego, ea ileng a rōma lengeloi la hae ho tla pholosa bahlanka ba hae ba mo tšepileng. Ba ile ba nyelisa taelo ea khosi, ba tela bophelo ba bona, hore ba se ke ba sebeletsa kapa ba khumamela molimo e mong osele, haese Molimo oa bona feela.

₂₉“Ka baka leo, ke laela hore batho ba lichaba tsohle, le ba merabe eohle, le ba lipuo tsohle, ba ka nyefolang Molimo oa bo-Shaderaka le Meshake le Abedenego ba tsekolloe, matlo a bona a fetoloe masupi, hobane ha ho molimo e mong ea ka pholosang ka mokhoa ona.”

₃₀Eaba khosi e bea bo-Shaderaka le Meshake le Abedenego litulong tse phahameng naheng ea Babilona.